再一次愛上沒有放下的舊情人: 三十九
收線後,我走到Leo房間,告知佢Karen既意願,佢見Karen不願意亦無再強逼
「咁好啦,我再搵個其他人選啦,以後就要你強強指教啦」
Leo那個虛偽既笑容,叫我心裡無名火起
「無野我出番去先啦」我沒有領佢情,無情地離開
心裡愈諗就愈覺得佢心入面唔知有咩企圖,依個人,我日後還得多啲提防佢
放工之後,我同平常一樣同Karen收工
「成呀,不如你今晚上黎我到食飯囉」Karen突然說
「咁突然...我咩都未準備好喎」
雖然佢屋企人無再睇唔起我,但突然上去都會好尷尬
再者,我又約左呀邦,做兄弟又點可以言而無信呢
「唔洗準備架啦,其實係我屋企主動叫我請你上去,佢地可能想同佢關係好啲呢」
「我打個電話先」
眼見女朋友雙眼充滿期望,我又唔想令佢失望,雖然俗語都話兄弟如手足,女人如衣服
但依件衫我唔想失去
「喂呀邦呀」
「喂點撚樣」
「無呀我女人屋企人要我上去食飯呀,我夜啲再搵你好無」
「屌又係女人,得得得,無問題啦,重色輕人,正仆街」
雖然呀邦句句粗口,但睇得出佢好重視兄弟,而且聽佢語氣笑笑口咁
相信佢亦都替佢朋友有個女朋友開心,果然,前人所講既真心人比偽君子好,係無錯
「好啦,我食完再打比你啦」
「得啦,揸車呀唔撚講啦」又再一次比人cut線
「得啦依家,我一陣買個果籃上去啦」我收線之後同Karen講
「你本身約左人架?咁就無謂推左人地啦」佢眼神似是內疚
「無啦,緊係你重要啲,我愛你,都預左要愛屋及烏架啦,係咪」我安慰佢
「不過咁夜生果鋪都收曬啦,不如平平地買啲啤酒上去算啦」
Karen所講亦不無道理,但為免得罪伯母,我諗都係買啲野比佢穩陣啲
我去左圓圈K便利店買左半打啤酒,再係銀包拎左張一千蚊封左放係利是封就上去