毒撚響補習社夢遺: 1.01

講返小小自己既background先。我叫做劉一華，一個中五學生，樣貌普通身材中等，係勒，你如果想像唔到，就當住我係毒撚樣先啦
 
雖然成績唔算好好但轉數都幾快，只係好懶，同埋冇乜人生目標，日日返學都嘻嘻哈哈唔知做過d乜咁
 
因為升到高中後眼見身邊個個都出去補習，所以我同兩個老死 - 萬刀甲(灰甲)同敦當域(肥敦)一齊報左補習班
 
仲記得之前果晚太夜訓，所以全日都好眼訓
 
黃昏要出去補習，就約埋灰甲同肥敦一齊去補習社
 




相信有補過習既人都會知，次次去補習總會有一班人晨咁早排定隊走去霸靚位(即係最前排果d位）
 
而我地講真去補習社都唔係真係聽書，純粹抱住人補我又補既心態，所以從來都係臨上堂一刻先到門口
 
亦因為咁，好多時我地都會坐響最後一排
 
不過今日好古怪，因為入到課室後發現竟然唔係得返最後果排，而係中間位置有幾個空出黎既位
 
平時我地坐開既最後排反而比人坐左
無辦法之下，唯有同兩個老死分開坐




 
因為就快開始上堂，所以我地都係求其有位就坐，坐低先發現原來我左右邊都係女仔黎，仲要係同一間中學
 
白色連身校裙，淺藍色bow tie，深藍色冷衫，感覺好pure好true
 
左邊果個身材豐滿，個樣有d似襲嘉欣；右邊果個就瘦小小，雖然輪廓好靚但個樣就有D西口西面，同時間又滲出一種病態美
 
望下望下，突然有種好熟悉既感覺
 
拿，我唔係d死狗公




「小姐，我地係咪見過面？」
呢d咁老土既識女仔方法我真係講唔出口
 
只係當望住果兩個女仔時，特別係右手邊果個病態女時，就有種親切感，好似識左好耐，已經係好close咁既感覺
 
但好肯定我係完全唔識佢地
 
至於點解會有咁既感覺，我都真係完全唔知
 
唔知係咪比病態女發現我望住佢，佢突然擰個頭過黎我果邊
 
作為響高登就天下無敵，現實就肥矮柒毒既毒撚，一見到條女想望過黎果下我已經淆到即刻dup低頭扮冇野
 
點知病態女竟然開聲主動同我講野：「你好呀，我頭先買咖啡飲時佢送多左一杯，但我飲唔哂，我想請你飲呀！」
 




「嗯，好呀。」我口震震淆哂底但又扮哂冇野咁答佢。
 
「咁就好勒，唔駛哂左杯野飲。」病態女好開心咁笑住講。
 
如果細心既朋友應該會記得，我頭先描述病態女既時候，係話佢個樣西口西面；所以一個西口西面既女仔突然笑笑口對住你，果種感覺其實係有d怪異,什至覺得佢個表情有種邪惡既感覺。
 
不過果刻我當然冇諗咁多，只係chok哂聲咁回應一聲：「多謝！」
 
作為單身左十六年，從來孤獨時只有左手同右手陪住我既死毒撚，居然今日遇到有靚女主動請野我飲，心諗可能我既小春天終於要來臨了！
 
我接過杯咖啡
 
「快d飲啦。」病態女好似好期待我快d飲佢請我既野咁
 
唔通佢真係對我有意思？




 
突然間我個咀角不自覺咁向上橋
 
唔得，要忍住，唔可以笑出黎，要繼續扮cool，如果唔係會好柒
 
我幾經辛苦終於壓住向上仰既咀角，然後飲左幾啖咖啡，同時間亦開始補習了
 
「各位同學，請打返開筆記既第3版。」果個肥肥地既補習阿sir周sir開始教書了。
 
我同病態女亦同時間望返出去阿sir度準備聽書。
 
明明肥周sir平時講書好生動有趣，連我呢d冇人生目標冇讀書動力既學生，都因為佢有趣既講課要變到愛上數學，但唔知點解今日上堂會覺得好眼訓，重皮好重咁…
 
頂唔訓，訓陣先…