超靈視雜誌社: 三章－上帝的手指（８）
星期日的晚上，Candy 答應了我的請求，相約明天在第一次碰面的咖啡店再聚。翌日本來我打算把約會告訴給紡瑩，誰不知首先卻是接到她被女王虜走的電話。
「阿翔唔好意思呀，陪唔到你去搵 Candy。」
「唔緊要，妳都有自己野要忙既。」
「嗯。八月就黎完，再唔交稿就會俾霜姐姐大懲罰架喇。」
因為我們一早已經有共識不會用 Candy 的經歷作為題材，所以紡瑩算是幫我善後吧。
「辛苦妳喇。」
「你嗰邊都要加油呀！」
這樣也好，接下來的事情我也不希望紡瑩參與。
由早上開始，天色就十分陰沉，隨時要下一場大雨似的。我把雨傘收起，放到咖啡店門外的雨傘架時，聽到後面有人和我打招呼。
「早晨。」
「哦，Candy，咁啱既。」
「嗯。」
Candy 今天穿著長袖襯衫，和炎熱的天氣有點不相符。
推開大門後，我們各自買了一杯咖啡，然後找一張梳化坐下來。
「你有野想同我講？」Candy 問道。
「係。先此聲明，我同紡瑩唔一樣，我係唔相信冇科學證據既人。所以我都唔相信占星、占卜、命運呢啲野。」
「所以你唔會幫我做見證？」Candy 顯得有點失望。
我刻意迴避了她的問題，說：「妳話過妳有靈力，對其他人既死特別敏感？」
「係。」
「如果有一個就快要死既人出現係妳面前，妳都會感覺得到？」
「嗯……」
「咁妳証明一下比我睇啦。」
「點證明？」
「出去搵一個妳知道就快要死既人。」
Candy 首先是沉默一會，然後才神色凝重地開口說：「你知唔知道自己講緊咩？睇住一個人死唔係你想像中咁簡單。」
「妳咁樣唔係自相矛盾咩？原先都係妳叫我幫妳見證自己既死架。」
「……好，咁我明白喇。」Candy 補充說：「不過唔係咁容易搵到就黎要死既人，香港始終係一個好地方。」
「我地先出街睇下，搵唔到就再去多人啲既地方行下。」
「你究竟想點……？」
「我有無論如何都想要確認既事。」
「隨你喜歡吧。」
Candy 拋下這句話後便站起來，離開了咖啡店。
我們走了大約十分鐘，大雨就開始嘩啦嘩啦地下。因為 Candy 沒有帶雨傘，我們只好共用一把在雨中漫步。緃使這種漫步一點都不浪漫，我還是盡一點紳士風度走在接近馬路的一旁，避免汽車把水花濺到她的身上。
「前面嗰個人。」Candy 指著前方的一個中年男人說：「大概佢既生命好快會完結……應該會係今日之內。」
「啊……嗯。」雖然我事先已有心理準備，但聽到 Candy 像死神一般宣告別人的死期時，我還是有點不寒而慄。如果可以的話我始終不願看見其他人死去。
「不過就算我感覺到佢今日會死，但係我都唔可以好準確咁講係幾時……你打算點？」
「呃……」
難道要一直跟蹤他嗎？
正如 Candy 之前所說，見證一個人的死不是那樣兒戲的事情。或者我還是太過不顧後果了。
可是，突然間在馬路上傳來十分刺耳的煞車聲，路人的焦點都集中在馬路中心。只見到剛才 Candy 所指的男人躺在地上，雨水和血水融在一起；旁邊停下了一輛小巴，小巴司機慌忙地下車報警。
Candy 離開了我的雨傘，獨自走到那個中年男人前蹲下。她沒有理會雨水的拍打，只是默默地為男人蓋上眼睛。她知道那個男人已經離開了。
良久，她站了起來，望著我，但什麼話都沒有說。
我走近 Candy，舉起雨傘：「小心感冒呀。」
「嗯。」她低著頭，慢慢回來我的身旁，說：「你而家應該相信命運？」
我搖頭否認：「唔會，我話左唔信就唔信。」
「所以你點都唔會相信我。」
「唔係。我唔相信命運，但我相信妳。」
「有咩分別……？」
「我知道妳十二年前既事。然後我一直係度諗，如果我係妳既話，我會點做；如果我每日都見到有人要離開既話我會變成點。」
一定會很難過吧，一定會很孤單吧。
我接著說：
「就算嗰個人好憎我，但如果佢死左我都會好傷心，始終我地以前都係朋友。但係又可以點？要死既人只能夠眼白白睇住佢地死，咩都做唔到。唯一可以做既就只係希望佢地可以去得安樂。」
「妳曾經講過話自己死左都冇所謂，反正冇人會唔開心。冇可能。如果我知道自己就黎要死既話我自己會係第一個唔開心既人。其實妳心入面都唔想死，係唔係？」
我分不清楚到底 Candy 臉上的是雨水還是淚水，但她的聲音變得沙啞：「唔係我想唔想死，而係我一定會死……你頭先都見到嗰個男人既下場係點架。」
「我唔理。妳話妳今個星期四係妳既最後一日，我就由星期三開始一直陪住妳，大家一齊留係屋企。邊個我都唔會俾佢帶走妳，要死就一齊死！」
縱使在馬路旁圍觀車禍的人十分嘈吵，加上救護車的鳴笛聲都要把雨聲蓋過，可是這一刻世界好像靜止了一樣，十分寧靜。眼前的少女就像雨中被遺棄的小貓，瑟縮在紙箱內發抖。
她點了一下頭，然後讓我送回家。
「星期三我會再黎搵妳。」
「嗯。」