『假人真事』我的宅男脫毒日記: 27.十一月二十一日

十一月二十一日    陰
 
今日我為扶老會聖誕派對做準備，要同蘊妏一齊去預訂場地都傾啲野。早兩日我同阿田睇戲嘅事已經係個Whatsapp 群組入面通哂天，連蘊妏都借機抽我水。
 
「阿飛，恭喜你喎，幾時請食出Pool 飯？」
「邊有呢？睇場戲咋喎。」
「咁又係，睇場戲又唔代表啲乜。」
「咁你知就好啦。­」
「你對人有冇意思先？」
 




老老實實，毒男有女就狗衝嫁啦，邊有話乜野有冇意思，大把囡揀咩！當然，如果蘊妏做我女朋友最好啦，話哂，男人都係睇樣做人！
 
「咁你又有冇同人睇戲先？」
 
我嘗試反客為主，套蘊妏啲料。
 
「一時時啦。」
 
咩係一時時？好耐冇人約？定時時都有人約？女仔講野嘅曖昧程度，真係唔係我依啲工程毒男參透得到。我想再追問嘅時候，蘊妏已經轉返正經話題。
 




訂場果都係一個社區中心，我地同職員傾坐啲活動細節，例如：人數、時間同器材等等。傾完後時間係六點半，正好係食飯時間。我開口問蘊妏會去邊食飯，佢竟然話冇。我即刻去廁所打比阿媽話我今晚唔食飯，仲比佢鬧到死。
 
同女神食飯，在所不惜啦。
 
「咁你想去邊到食？」
 
蘊妏問我。咦，我從來冇同女仔單獨食飯，去邊好呢？我平時剩係去扑野家，茶記，大不了去豬扒王「咋咋」聲鋸下扒。我再望望佢今日嘅衣著，白色長裙上身牛仔褸，去咋咋聲實殺左我。
 
無辨法，唯有再打電話問朋友。
 




我借機話去撳錢，打比石他救求。當然佢係冇聽電話，我都估到。我再打比文西，文西話，做男人一定要有主見，去邊度食第一次唔可以比女仔話事。咁我問佢有乜好介紹，佢話高級西餐廳啦，行個個牌過一舊果啲實冇死。
 
「我今日想食西餐，你ok唔ok？」
 
蘊妏好爽快咁話冇問題，食乜都得。咁我去左條街都幾多餐廳，見到間過一舊，就入左去。
 
餐廳都係啲普通意粉，味道普普通通，冇離特別。期間蘊妏講左好多扶老會嘅趣事比我知。不過我就冇乜話題講到，因為我生活實在太毒！好彩係冇乜沉默氣氛。
 
埋單兩個人加埋一百一十，合哂文西教嘅預算。蘊妏好滿意，我又話送佢返屋企。
 
「唔駛啦，你陪我去搭車就OK。」
 
經過上次同阿田睇戲，我已經慣左比人拒絕，送返屋企只係循例問下。最後我目送佢架巴士離開我先走。