『假人真事』我的宅男脫毒日記: 26.十一月十七日

十一月十七日        晴
 
「唔比你送返屋企？」
 
我上堂果陣同湯米講，因為湯米係我認識嘅人裡面最熟悉阿田。
 
「好小事姐，啲女仔第一次通常都對男仔有戒心啦，另外唔想比人誤會姐。」
「誤會乜嘢？」
「誤會你係佢男朋友呀！」
「咩呀，我想識多個朋友姐。」




「我識你咁耐，知你咁毒，咪鬼扮啦。」
 
講到依度湯米就冇再講阿田，剩係祝我好運咁話。我當然一頭霧水，不過大好機會唔把握又浪費。於是我又去問文西。
 
「表白囉。」
 
我心諗，冇啦啦表乜鬼嘢白。不過文西一聽到我話約到囡囡睇戲，就同佢女朋友一路討論我點表白好，一時又話送禮物，一時又話包自己送比佢。真係火都黎埋。
 
扶老會有一個叫卡勞嘅毒男好鬼八卦，今日佢就係個Whatsapp 群組到爆尋晚我同囡囡睇戲，之後個群組哄動左一陣，當然蘊妏都有份。
 




「阿飛，尋晚見到你同女仔一齊睇戲喎，有冇下文先？」
「吓咩下文呀？更係冇，唔通去爆房咩。」
「更係問你有冇機會發展啦。」
 
我發現大學同學係好八卦其他人幾時拍拖，唔知係咪因為競爭關係，少個對手，少個敵人。
 
「睇落就冇乜機會。」
「點解先？」
「睇戲果陣，佢好似冇乜反應。」
「哦，咁你努力啦，實有機會嘅。」




「咁你點睇？」
「追女你自已追嘛，冇得教嫁。」
 
唓，咁你又問。我覺得卡勞真係好八，佢已經唔係第一次問人男女感情，每當個群組有人行為出界少少，佢就會去問。但都有唔少人過料比佢，我諗大家可能當佢係紅娘先咁做。