『假人真事』我的宅男脫毒日記: 23.十月三十一日

十月三十一日        陰
 
文西嘅衣著越嚟越奇怪，今日佢著左件粉紅色低胸T-恤。
 
「喂，比條片你睇下。」
 
片入面有好多可愛女仔著住內衣訓係張大床到，場面好香艷，不過有又好做作。
 
「AKB呀？」
 




我跟據片入面女仔面容同身高判斷。雖然我都係毒男，不過比起AKB，我更中意熱血機械人動畫。
 
「係呀，正唔正？」
「嘛嘛，拍到咁不如睇AV，冇哂日本妹果陣可愛感覺。」
 
文西好冇癮，唯有埋首做即將到死期嘅功課。文西比已往更殘，唔知幾時開始，石他嘅功課大部分都由文西幫佢做埋。
 
「點呀？又同囡囡Whatsapp。」
 
我同蘊妏Whatsapp 比文西發現咗。雖然我同蘊妏最近都經常Whatsapp 講嘅都係公事。




 
「你咁樣唔得喎，咁攪法下年都未到手。」
 
文西偷睇完我手機講。咁又係嘅，剩講公事真係溝到出年，我聽講溝女要女仔同你講心事先有機會。
 
「車，你好得好多？」
 
我試圖反擊。文西聽到竟然冇出聲，冷笑左聲就算，果然有古怪。
 
「睇嚟仲有好多，今晚都唔走得。」




 
啱啱先串完我嘅文西，轉頭又陰聲細氣咁同人講電話。
 
「你成日要幫人做埋，梗係有排都唔走得啦！」
 
我專登大大聲講等個電話對家都聽到，我講完文西安撫左對面幾句就收左線。
 
「咁怪死多事你，今晚留唔留係到做埋佢。」
「有得揀？」
 
功課實在太多，今晚我哋又一齊食飯。食食下有個女仔行入嚟，坐左係文西旁邊。
 
「喂，嚟左呀。」
 
個女仔都未坐低，文西就將個頭申埋個女仔到係咁索， 我同阿魚只好你眼望我眼。




 
「依位係？」
 
我等佢地親熱完一輪，終於引唔住講。
 
「佢叫阿盧呀。」
 
文西好求其介紹完佢。
 
「死仔，唔怪得最近咁八卦我溝到女未。」
 
我心諗，原來自己攪掂左。
 
難怪文西依排黑眼圈大左咁多，一方面又要幫石他做埋佢果份，另一方面，佢又學埋石他啲衰嘢，搵條女旁住邊玩邊做功課。
 




我有啲嬲，個個一拍拖就唔做功課，我好快將自己果份做完，搭車閃左。