『假人真事』我的宅男脫毒日記: 22.十月二十七日

十月二十七日        晴
 
學校已經進入中期測驗期，嚟網球學會打波嘅人十隻手指都數得哂。個場少左好多新人，左右兩邊都變哂正式嘅雙打場，網球散落係地下冇人執，同開學時期人多波已經相距什遠。
 
我同阿田之前幾次都合作打雙打，已經熟絡左唔少。依家搵佢打波，佢都好自然咁應承。
 
今日我好早就去到球場，我同細粒白淨嘅莊員Cherry 練習單打。
 
Cherry 佢球技一般，同我哋新人差唔多。阿田技術就好得多，聽聞佢仲曾經入選校隊。咁都解釋到點解Cherry 白雪雪，阿田就小麥啡。
 




「阿飛，你都進步得幾快喎，以前有打開？」
「冇呀，不過打開乒乓波同壁球。」
「哦，咁都算有關，唔怪得你進步得咁快。」
「多謝，都係你哋教得好姐。」
「你把口真係識講野，進步又快，唔怪得阿田成日同你夾。」
 
我同Cherry 坐係一邊休息果陣吹咗陣水。的確，依個兩個月嚟，除左球技進步左，溝通技巧都進步埋。有女仔坐埋嚟同自己吹水，兩個月前真係諗都唔敢諗。
 
「係咩，點會呀，我明明係毒男嚟。」
 




我借機試探我係Cherry 心目中嘅形象。
 
「咁你又真係幾毒，係最近把口啷過油。」
 
我聽到好失望，估唔到我攪咁多嘢，又買衫又學溝女，都係被評為毒男。
 
「不過睇你個樣都應該係男校出身，咁毒啲又正常嘅。」
 
我只能夠傻笑，當女仔好多話題接唔上咀嘅時候，傻笑已經成為我嘅習慣。
 




之後阿田嚟左，我照例搵佢打波。
 
「唔啦，下次先，我想搵個水平高啲嘅對手練習下。」
 
阿田講得有啲喪氣。
 
「唔通我又好似得罪左阿田，好似得罪Amy 咁？」
 
練習完畢，阿田都冇同我講拜拜就走左。我果頭以為自己同女仔相處進步左，原來係跌到負數，不停得罪人。