『假人真事』我的宅男脫毒日記: 19.十月四日

十月四日        陰
 
今日終於收到高登「秋天緣份計劃」回覆。足足攪左半個月有多。
「1520060」
 
個Email 得一個號碼。我已經唔記得個規則係點。唯有查返個帖，好彩有人推返上黎。
 
「唉，有冇結果，注定單身啦 :~(」
「點解，唔通搵個女朋友就係咁難 :-(」
 




入到去個帖，都係比依類留言洗版。原來個號碼係代表一個女仔，有號碼就有人揀。
 
我睇返個個女仔自己嘅描述，原來我揀左膠妹，佢形容自己係沉默寡言，喜愛高登文化。平時我同學校啲囡囡都冇乜話題，我以為我同膠妹應該會有好多野講。
 
「不過我得個號碼，由冇對方聯絡，點搵對方呢？」
 
好彩帖入面巴打已經發現左，回報左比攪手。過左冇幾耐，就收到膠妹嘅聯絡方法。
 
我以一段高登膠歌作為對膠妹嘅開場白。對方好快回應我。
對方頭像係一個見唔到正面既大頭，頭髮好有光澤，好整齊，斷估唔係油頭粉面嘅毒女，心諗今次都幾好運。




 
「點解你會上高登識男仔?唔怕比人起底咩?」
「唔驚啦，我又冇得罪人。」
「咁你平時睇開咩post?」
「冇喎，見有咩得意嘢咪睇囉。」
「高登有幾多個男仔揀左你？」
「冇喎，係得你姐。不過個攪手好狗厹。」
 
正當我想八卦落去，佢就同我講有野做，拜拜。
我簡直係Whatsapp 終結者。我將依件事同文西講，文西話，上網嘅嘢唔好咁認真，我都好認同。