『假人真事』我的宅男脫毒日記: 18.九月三十日

九月三十日    晴
 
「你尋日都打得幾好喎。」
 
湯米搭我膀頭講。原來佢驚我係網球學會唔適應，因為好多新人打得唔好就離開左。我覺得係多餘，又唔見你迎新夜果陣咁講！
 
今晚係扶老會嘅例行周會，題目好似係關注香港貧窮咁上下，我對個題目冇乜興趣，我自己都係窮人，關心返自己有幾窮感覺唔知點。
 
周會內容都係播下簡報，睇下片，了解下香港有幾窮。對我依個公屋仔一啲都唔新鮮，不過相反隔離有個女仔睇到好失落咁。睇黎入得大學嘅，大都係溫室小花多。
 


「好喇，睇完片我地就分組，有任務要完成嫁。」
 
主持人咁講。分組都係隨意，蘊妏見我果組少女仔就坐埋黎。
 
「好啦，大家頭先睇左段片，我哋嘅任務就係為片中窮苦人家制作一件道具，去解決佢片中嘅困難，只需要畫個意念出嚟就得。大家有咩意見？」
 
蘊妏表情好認真。雖然我係讀毒男工程科，不過上年都修過啲設計科目，畫嘢整嘢對我冇難度。
 
「依類型嘅公屋多數廁所門有個無謂突起嘅框，係設計嘅問題。我地諗一件野，等個輪椅佬可以過到廁所嗰玄關，又可以坐住都收得起，就可以解決到佢嗰問題囉。」
「阿飛，你都幾細心，幾熟啲公屋喎。」


 
蘊妏咁講，我即刻窒左窒，自己多口左，一陣比佢知我住公屋就弊。公屋仔只會比伯母送客，點配得起咁可愛嘅女仔呢。
 
之後我都保持沉默，古人話沉默是金，依一刻我明白哂。
 
「阿飛，你覺得舊嘢咁畫Work 唔Work」
「Work掛，其實我都唔係咁熟公屋啲廁所。」
「但係你岩岩講得頭頭是道喎。」
 
佢咁問，我標哂冷汗。睇怕，都係向佢坦白好啲。


 
「其實呢......」
「其實你婆婆都住緊公屋?」
 
佢竟然自己幫我打完場，好彩咋。
 
「你.....點知嫁?」
「估咋，段片都係同婆婆住嘛。」
「哦。」
 
散場前，我一直冇講不必要嘅說話。蘊妏臨散前捉住我，叫我完左後留係到一陣。我心諗，唔通佢想人少少先插我？我真係咁差咩？
 
留係到嘅人唔止我一個，大約有十個人左右。睇黎好多人都係亂嗡當祕笈，要留係到比領導訓話。
 
「我哋黎緊有個新計劃，係去關心啲在港留學生，叫大家留係到，就係想問大家有冇興趣做新計劃嘅核心成員。」


「個計劃要做啲乜？」
「未知，因為要等大家再傾。」
 
原來唔係訓話。我認為依個係同大家熟絡嘅好機會，我見在場嘅囡囡都唔少，有啲仲幾有質素。我決定去馬，但又唔想比人感覺咁隨便，我想表演得心思熟慮一啲，襯返頭先一言不發嘅形象。
 
「最遲幾時要覆？」
 
我問蘊妏，佢話最好依個禮拜。我答應佢依個禮拜一定會有答覆，之後頭也不回地走了。
 
我發現，大學真係機會處處，之前果一年我完全浪費哂。我想追返失去嘅光陰，但係急速發展環境下好易錯失機會，我意識到自己溝女技巧上嘅不足，我唯有聽日請教石他。