『假人真事』我的宅男脫毒日記: 13.九月十五日

九月十五日    晴
 
今日返學，稀客石他竟然黎上堂。佢仲話今晚一齊做Project，非常奇怪。
 
去到夜晚，食食下飯，石他話去接一接人。
 
「大家好，我係阿Yan呀。」
 
石他帶左個女仔黎，我以為食完飯個女仔就會走，點知唔係，做Project 期間個女仔一直坐係佢身邊，石他就一直同佢玩。
 




九點半，石他話夜，要送個女仔走先。結果到十一點鐘走，石他打左唔夠五百字，真係火都黎埋。
 
「阿飛，啲Soc 好唔好玩呀？」
「OK啦。」
 
文西突然咁問，我有啲驚訝，因為文西同我一樣都係毒男，佢做Project 果陣仲成日開AKB48 啲片黎睇，理應不問世事。我以為文西想八卦湯米係學會嘅表現，點知佢又問我識到幾多個女仔。
 
「兩三個囉。」
「咁你有冇約出黎先？」
 




我對文西突然對識女仔嘅嘢咁進取感到奇怪。不過佢一問，識女仔又的確唔係大家認得對方就得，仲需要私下交流先可以推進關係。文西提醒左我，我嘅進度幾乎係零。
 
「咁點算，我而家剩係同幾個女仔做Hi Bye 朋友。」
「你又唔好咁猴禽，你有對方電話都要同人地Whatsapp 一排，先約到出黎嘅。」
 
石他插咀，佢岩岩送完女返左黎，我毫無經驗，只好請教經驗豐富嘅石他。
 
「都係果句，第一印象好重要，你一定要執個Look，睇起黎正常啲。」
「我好唔正常咩？係啲Tee 舊少少姐。」
 




石他話，我啲衫唔係太舊，就太鮮艷，著起上黎似個小學生。
 
「我聽日都去買衫，一齊去啦。」
 
文西咁講，我為左擺脫永遠之零，唯有聽日乖乖地跟文西去。