『假人真事』我的宅男脫毒日記: 12.九月十四日

九月十四日    晴
 
網球學會個迎新夜真係痴線，攰到我訓左一整個星期六。電話一朝早就響，唔係因為有人打黎，係收到電郵。
 
「秋天緣份計劃名單，請巴絲盡快填好！」
 
我收到早排係高登申請緣分計劃嘅名單，我急不及待，頂住手臂嘅肌肉酸痛，落床開電腦，睇下名單上面有咩人。
 
名單上面巴打(男網友)有差唔多二百人，絲打(女網友)只有四十幾人。嘩，咁咪四個男人爭一個女人？我望望絲打名單：
 




思思，21歲 性格：開朗健談唔港女，要求：唔煙唔酒，身高180cm，大學學歷
連雅，19歲 性格：唔毒，平時會去書局睇書。要求：最少180cm，要錫我。
家汶，26歲 性格：毒女，鍾意睇達哥。要求：唔要肥仔排骨，講野正常。
 
我發現佢地要求都好高下，剩係身高180都已經篩走唔少人。而且我諗極都唔明係性格點會包埋睇書睇達哥？但要求，佢地就理解得十分透徹，用字精闢，令人一讀就知自己冇行。
 
我費煞思量，冇辨法從依班旺角妹妹到搵到相配嘅女仔，配對嘅機會只有一次。
 
膠妹，20歲 性格：沉默，寡言。要求：熟知高登文化，開朗，愛好動漫畫。
 




「係佢啦！」
 
我認為我同膠妹可算係天作之合，性格，要求都相當匹配，最重要，佢唔似其他旺角妹妹咁，要求生物導向。佢係一個有內涵嘅人，亦認為佢會睇中我。
 
我係表格上面選左膠妹，再發比主辦人。慢慢靜待上天串合我同膠妹。