『假人真事』我的宅男脫毒日記: 6.九月八日

九月八日        陰
 
因為要上八半堂，我倒塔咁早返到學校，我地班上面唯一嘅女性仲未返到，但旁邊嘅同學一早已經幫佢拎好筆記，放好買定嘅三文治。
 
「車！前面啲兵仔咁早就幫娘娘擺好拜神位。」
 
我講完，文西笑左出聲。個教授即刻仲怒睥左佢兩眼。前面個八掛同學湯米，問文西有乜咁好笑。文西又細細聲咁講比，佢又笑出聲，果兩隻兵仔都望下我地笑乜。
 
湯米係一個肥仔，帶住一副鴛鴦色眼鏡加上湯碗頭，造型十分古怪。但出奇地融入各個學會社群。我係Facebook 見佢嘅相同囡囡影得相當親密，我認定佢嘅社交能力一定比我高超得多。如果向佢請教到一兩招，肯定對脫毒相當有幫助。
 




「Tommy，你今個Sem. 有咩玩？」
「玩咩？我唔明你意思。」
「你今個年入左咩學會」
「網球，合唱團囉，同上年一樣。」
「合唱團？會唔會好難入？係咪要唱歌要好叻嫁？」
「唔會嫁，佢地一年收幾百人，係人都收嫁。」
「咁佢地幾時收人呀？」
「咪O-week 開始，今日第一日。」
「咩係O-week？」
「咪姐係啲學會Yo 人嘅日子囉。」




「哦，咁係邊度報名？」
「我一陣落堂帶你去啦。」
「好呀。」
 
如是者，我落堂跟左湯米去合唱團個攤位。路上面經過好多攤位，大家都好積極邀請人加入。當中最吸引我嘅係動漫學會，有一個女仔著緊Cosplay 衫，雖然個樣唔算靚，但係好性感。仲有佢地入會送H漫，我慨嘆自己點解上年掛住讀書，唔多多出走去睇下個世界。
 
「其實你唔一定要去合唱團，去其他都一樣，總之你自己啱玩就得。」
 
湯米可能見我喪昅個Cosplay女，所以咁講。佢可能覺得我去動漫學會比較適合。但係我目標係脫毒，唔係拎果本H漫吸毒。
「合唱團健康啲。」




 
湯米微笑表示認同我嘅講法，我同湯米去到合唱團嘅攤位。我被攤位嘅用心佈置嚇親。佢地用錫紙包圍全個攤位，CHOIR 五個英文字母用金色紙包住，旁邊仲有部IPAD 播緊佢地嘅表演片段，再加上企左衣著正式嘅一男一女。唔講我以為去左五星級大酒店。
 
「入會要做個簡單嘅測試喎。」
「咩測試？」
「音準測試。」
 
櫃台，唔係，係攤位個靚女拎左張表，叫我跟住五線譜上面啲音符唱。我鬼識咩！我自從小學以嚟都冇在唱過歌，中學果陣，我為左唔唱歌，入左學校嘅牧童笛隊。每次音樂考試我都吹牧童笛算。湯米見到我企左係到，就幫我：
 
「你跟住我唱啦。Do~Re~Mi~Fa~So~La~Ti~Do」
「Da~Le~Me~Fi~Sa~Le~Ta~De」
 
我唱完，櫃台果對男女笑到收唔到聲。湯米一開始都係到笑，但佢笑左一陣，見到我想喊咁嘅樣，就收起左佢嘅笑聲。我自知冇可能過關，就算入左去都係比人恥笑到完場。
 
「對唔住，打攪哂。」




 
講完依句，我就頭耷耷咁離開左合唱團嘅攤位。