『假人真事』我的宅男脫毒日記: 4.脫毒第一問

我一直都冇諗過，女朋友可以係課室外面識。自細我都被灌輸「努力讀書做嘢，第日一定有女仔鍾意。」不論老師，父母，都係咁教我。

我第一時間諗起，我哋組嘅免費騎士，張石他。

張石他係我副學士時候嘅同學。雖然我唔知佢點解可以做免費騎士做到上U，但就知佢一直拍拖，一直換畫。從來冇溝唔到女嘅時候。

佢今日冇嚟上堂，應該話佢不嬲都唔上堂。只係考試測驗先出現下，想見佢，唯有約做Project。

「文西，星期五得唔得閒傾Project？我今次想早啲準備，唔想又通頂做。」
「星期五冇問題，不過Zeta(石他)佢肯定要陪女放飛機。」




「星期四啦，冇咁忙啦掛。」
「Okay。」

約做Project 果日，張石他佢遲到左三個鐘。我同文西一邊等佢，一邊傾Project 嘅目錄。佢實在遲得太多，個Project 嘅細節我哋都傾埋，佢都仲未嚟。由於要傾分工，所以我地邊玩邊等埋佢。
 
三個鐘後，佢終於到。我哋再草草咁傾左十五分鐘就解散。成個下午，傾Project 嘅時間係一個鐘，不過等佢就用左三個鐘。如果係平時，我已經發火走人。但今次唔同，戲肉係之後嘅飯局。
 
「Zeta 點解你咁勁，係寸花不生嘅工程系都可以拍到拖？」
「嘻，我女朋友唔係學校識嫁嘛。」
「咁你係邊識？」




「佢係港大讀Nursing 嫁。」
「嘩！港大妹你都溝到。」
 
我由衷佩服石他。佢話佢女朋友係透過朋友搭朋友識返黎。我估起勇氣，問佢以我而家嘅情況，點樣識女仔好。
 
「飛仔，朋友搭路最容易嫁啦。啲女仔都對你冇咁大戒心。」
「不過呢，你個Look 要執執喎。」
 
我望住對面嘅毒男組員阿魚，佢著嘅衫同我一樣，不過唔同色。如果佢都溝唔到女，咁我又憑咩溝得到？
 




「咁我去邊買衫好？」
 
石他佢好似有備以來，係書包取出一張時裝鋪嘅傳單。上面件件都過千，最貴成四九九九。一件衫姐，著左又唔係識飛。
 
「嘩！好貴姐。」
「你執Look 要有代價嘛。」
 
我對比石他身上著嘅衫，同傳單入面嘅衫差好遠喎，邊似要咁貴。重點係我冇咁有錢，買傳單上面嘅貴衫。所以我只好擱置佢嘅建議。