『假人真事』我的宅男脫毒日記: 1.自介

我叫阿飛，係CU讀緊Year 3。雖然高登仔叫佢Shitty U，但起碼都係大學，係充滿語言藝術嘅年代，鯨魚勉強都算係魚。我出生至今一直都係單身，眼見每日返學，校園裡面一對對情侶忘我地親熱。身為毒撚，一早已經看透世事。
 
「車，而家咁親密，轉個頭咪又係散。」
 
我由副學士開始，就以入大學為目標，即使身邊再多人拍拖，啲同學點樣短裙熱褲都好，我亦不為所動。我得到嘅結果，證明我係啱。副學士畢業果年，我成為小數能夠升讀大學嘅幸運兒。當日，我拍住我嗰老死同學膀頭，同佢講：
 
「唔緊要嫁，第日努力啲搵錢，你荒搵到錢冇女？」
 
佢聽完，當場喊左好耐。
 




果年暑假，果位老死同學冇去搵正職，返兼職嘅時候識到現任女友。細細粒，講嘢有啲低能，不過都幾可愛嘅。佢成日同我講升唔到U，但識到而家既女朋友，係一種福氣。
 
「U 可以遲啲讀，可以part-time 讀，可以唔讀。但女朋友比人追左就冇。」
 
我笑而不語，一方面覺得佢好幸福；另一方面，我覺得自己上到大學大把機會。
 
上到大學，功課一交完就話Mid-Term，Mid-Term 交完又話要交返功課，功課都未做好又到考試，得幾日就考埋試。到我清醒，已經放緊Sem-break。
 
好彩工程係教授都好懶，暑假唔駛上堂。但唔知邊個諗埋啲屎橋，話學生出去實習會更受顧主歡迎，強制要學生做夠實習時數先可以畢業。結果我連暑假都冇埋，個實習更加唔好提。Last Day 果日我回想返，除左點入牙籤快啲之外，乜都學唔到。同學問我實習學左乜，我只能夠口啞啞。神奇嘅係，我問返佢地學到乜，佢地又係口啞啞，答完等如冇答。
 




望住個月歷，又到開學既日子。我諗起果位老死同學嘅幸福表情，今次大鑊了。原來我所餘既日子得返兩個Semester。上年我已經忙到甩肺，今年畢業我仲點會有時間溝女。唉，難怪工程系啲同學個個都肥柒宅毒。諗到依度，我個心情直插落太平洋深處。