明明早該放手 但有眼看不到: 第四十七集
一食完野...睇睇個時間...
嗯...八點半...
距離十點仲有個半鍾...
而家依個時間應該無人番屋企掛?即係應該有車啦!!
望望其他人...呀聰向我打眼色示意佢會解決呀朗
果然係夠義氣
而其他人都諗係走~~
我同呀欣行去搭車啦
我 : 做咩無啦啦咁有興致黎同班唔熟既人倒數啊?
欣 : 又無地方去又唔想番屋企住
我 : 你果個咩野補習識既henry呢?無搵妳咩
唉..我有問一些聽到會令自己不高興的問題
欣 : 佢?唔知去左邊啦
好似怨婦咁喎佢個樣
我 : 下?唔係話人地表白好浪漫咩...有話心動既咩
欣 : 佢消失左
我 : 係咩?去左邊?我記得果陣妳話佢表白既時候忽然有架車經過嘈到妳聽唔到..然後佢又講多次好浪漫
我都唔知有幾浪漫..傻的嗎?
欣 : 係呀你咁都記得既
我 : 睇我想唔想去記既姐
欣 : 頂你又串我
無錯我成日話佢..同我做過既野佢都唔記得
其實如果果一個人對你重要..佢講過既野做過既野...去個既地方..自自然就會記得
我 : 人地消失都好正常啦..你都拖左佢成年
欣 : 我點知佢一年都唔等得既姐
妳都on9...一年去鍾意一個咩反應都無既女仔?
妳估個個都係我?
番到去屋企~~~老豆同老媽好似出左街食飯
話借住間屋比我話...番到黎都會入房
仲係9點到...大家都未到~
係喎...唔知呀yan點呢...唔係話今日打比我咩?
打比佢先...
我 : 喂...呀yan?
yan : 係啊...呀晨?~
我 : 嗯...點啊妳今日係唔係黎啊?
yan : 係啊...呀文話去你屋企?
我 : 係啊..妳咁咁咁咁咁就黎到架喇
yan : 嗯..好一陣見啦 bye
呀yan我愛妳...妳係今日第一個同我講電話而又同我講bye bye既人!
我好感動!!! sosad
欣 : 邊個黎架
我 : 哦..上次果個呀yan囉
欣 : 洗唔洗語氣咁溫柔呀
我 : 咁人地溫柔時我緊係要溫柔啦..(妳估妳咩)
欣 : 鍾意人咋掛你
我 : 無喎唔好意思
講真呀yan都幾好...又令女對人又好平時又溫柔..
不過要追佢既話要打敗無數既追求者...當中仲有老葉..都咪話唔勁
不過如果真係鍾意又點會唔追~
我望住呀yan只係覺得佢係一個好人既令女...其他就未有d咩感覺喇
至於呀淇...講真對手都唔少啦..真係要加加油先喇
同呀欣去超市買左d野一陣玩緊時候食
跟住番上去~~呀文同呀琪都到左喇...
依...仲有呀聲?
講起呀聲其實佢係班上面我比較熟既男仔...
同呀文呀琪一樣...不過我以為佢地唔熟所以無叫呀聲
估唔到佢地咁fd
我 : 聲
拳頭撞拳頭打了個招呼
聲 : 呀嫂?
他以可疑的眼光看著我...
我 : 嫂你條命
聲 : 做咩忽然間咁激動..玩下姐
唔記得左....呀聲都係一個擅長抽水既人...今次仆街鳥
平時都成日抽我..呀淇..呀yan..老葉幾個水
家陣仲唔比曬位佢入~
不過好在佢唔會過火...而我都可以抽番佢水
大家咁樣相處先至容易熟
呀聲佢係一個比較慢熱既人..
我認為佢有呀源咁既社交能力
不過佢運用得好好..唔會有咩侵略朋友既感覺
而且大家熟左既時候佢都會以真誠既一面對住我地
佢仲同我講過
佢本身係唔識同女仔講野...係不停逼自己諗野講..諗話題...逼自己唔可以dead air
平時見佢同女仔講野好自然...估唔到係經過一番既努力
當成班人起度吹水打機既時候
電話...
yan : 喂..呀晨?
我 : 係啊~
yan : 我諗我到左你果度附近..不過唔知點行
我 : 咁我落黎接妳啦...妳而家企左係邊?
yan : 我係個公園度
我 : ok~
我同其他人講 : 喂我落去接呀yan
再同呀欣講 : 睇住我間屋
聲 : 你唔係想同老葉打對台掛??
我 : 咪膠啦
他只是笑笑..似乎知好多野咁
落到去..公園
見到呀yan...
果然都仲係好令...不過無眼鏡既@@
我 : hi~~~
yan : halo
我 : 做咩唔戴眼鏡呀?
似乎我好鍾意關心人戴唔戴眼鏡既問題
yan : 無啊...試下戴con姐~唔好睇?
我 : 好...好睇
原來要我同令女單獨相處..我都係會唔慣架...
果然係只有呀淇我唔怕
講番呀yan...一貫既女神feel..不過我又真係對佢無咩大感覺
上到去~~
呀文呀琪就自動波夾左呀yan去玩wii
呀聲就用緊電腦
呀欣就係度食零食
我望下個鍾...就快十一點...點解呀淇仲未黎?
唔係講好左一齊倒數...咩?
岩岩whatsapp搵左佢佢又無應...打左次電話都無人聽...
咁又有幾個人...就唔知邊個就話玩問問題
第一個問第二個..第二個問第三個咁...問完一round就換位
我就真係唔明有咩好玩??!!
我做問先果個啦..
我就問呀聲 : 你想飲可口可樂包裝既百事...定係百事包裝既可口可樂?
我都唔記得佢答咩野啦
呀聲又問呀琪 : 比你簡你會簡班上邊個做你女友
一條好老土而又大家都感興趣既問題
呀琪 : 我覺得果個陳梓盈唔錯喎
估唔到佢答得咁順攤
btw陳梓盈都算係班上一個幾令既女仔不過我就唔熟啦
呀琪又問呀yan : 你覺得葉文晨好d定係錢汱多好d?
yan : 葉文晨
又係答得咁快
btw錢汱多...見到佢個名都知啦...佢都係好有錢既...不過份人就...我都唔知點講
呀聲同佢好似幾熟...
yan就問呀欣喇...呀yan向我投以奇怪既眼神...我第一次覺得原來女神都係可以咁恐怖架
yan : 妳覺得佢唱歌叻d定彈琴叻d
她指指我..
還好...仲以為佢會問d咩野抽水題目
呀欣 : 我覺得係彈琴
果然係無認真聽過我唱歌sosad
我自己就認為自己唱歌叻過彈琴(兩樣都廢)
呀欣就問呀文喇 : 張樂晨係學校多唔多女圍架?
你老板...唔係問''關於我''既問題啊而家
文遲疑左一陣...望一望我...笑左一笑
文 : 佢??好多架...拿...呀淇啦..呀yan啦...格黎班個呀may...高一form既yuki...低一form仲有個tracy
講完佢仲比左一個''唔洗同我客氣''既眼神比我
你老板...我連班上d女仔既名都未知曬....格黎班有個呀may我都唔知...仲邊有可能識到高低form
呀欣笑笑望住我...唔知點解我會諗起呀淇...因為呀淇微笑都唔方好野
呀欣 : 岩岩食飯仲話自己無~~~
我都只可以好無奈咁望住佢地
呀文就問番呀聲 : 話時話錢汱多係咪想追啊睎?
講起啊睎...佢係班上面幾個個樣算令既女仔..不過好似有d距離感所以我同佢唔熟
聲 : 你點知架??!!!
文 : 佢咁出面個個都知啦...咁陳梓盈點算?
無錯班上係有傳錢汱多唔知鍾意呀睎定陳梓盈既...
聲 : 點知點算...睇戲食花生囉我地
雖然我們現在玩得很高興...但呀淇..妳在哪?
時間一點一點的過..我地都玩左幾round問問題
呀淇依然係無出現到...
好快就到左十二點...
我地幾個望住個電視...睇住幾個明星~~
跟住個電視倒數
『10!!』...呵呵今年同呀欣倒數啊
『9!!』...今年唔洗一個人聽住lonely christmas過
『8!!』...今年既聖誕真係開心過上年好多
『7!!』...今年識到佢地真係好
『6!!』...如果而家我追呀欣唔知會唔會成功呢?
『5!!』...其實我係唔係仲鍾意緊呀欣...?
『4!!』...呀淇妳去左邊?唔會有事掛?
『3!!』...唔係話會一齊倒數咩
『2!!』...唔係實牙實齒話唔會比我幫情侶影相咁慘咩...雖然今年無影...但係妳去左邊..?
『1!!』...呀淇
...好掛住妳..
MERRY CHRISTMAS ~~~我地都好開心咁向住大家講聖誕快樂
真係好感謝yeahso...佢出生我地又放十幾日...佢死左番生我地又放十幾日
原來不知不覺間...吳樂淇依個人對我而言變得好重要
今晚成晚都係諗緊佢去左邊?佢點解唔覆我?
佢點解無聽到我電話??
佢話忙緊...忙緊d咩呢?
雖然知道..佢一定係有事先至會黎唔到...
但係唔知點解...我真係好想見佢...好想
今年既平安夜...一個美中不足既平安夜