DSE點令我由一個毒撚變做player: 23.

自從個次一個月慶祝，我同淇去過沙灘之後，我地已經12日冇見。冇錯，呢個日子我真係日日計住，因為我鍾意佢鍾意到發哂癲，就連我自己都唔知道原來初戀係咁既感覺。
 
會掛佢掛到訓覺前諗起佢，訓唔著會睇我地既對話紀錄，而我最常做既係諗起同淇係mk既一點一滴，個度真係盛載左好多回憶。
 
「bb你加油！唔好訓著！」
「我愛你，所以我地要一齊努力！」
「b..我訓覺先。。你溫得太累都早d抖，i love you」
「b我知你而家好辛苦，但諗下我地遲d一齊去grad trip呀」
「b對唔住呀，今日想翻去問一問老師野」
「……」




 
我一邊聽住淇既錄音，一邊又碌翻上對話既最頂。
 
見到「您」，「繫」，「拉」等等呢d字眼只覺好懷念。淇自從同我拍左拖之後變得有動力讀書左好多，我地應承左對方一日唔可以覆對方超過30句，所以我唯有偷偷地睇翻d record。
 
「想念是會呼吸的痛 它活在我身上每個角。。」我被新鈴聲拉扯翻現實，想念的確係一種會呼吸的痛，連寂寞也痛。。冇錯，我係一個有怪僻既人，我鍾意跟住自己既心情去轉鈴聲，之前聖誕節冇人約我出去，連屋企人都去哂旅行，我個時灰到一邊諗個角點搵一邊轉左個鈴聲做lonely christmas。
 
題外話啦，我一睇，5xxx8x9x？
以我冇save咖喎，但呢個電話係5字頭應該唔係廣告個d，究竟係邊個黎既呢？於是我好奇咁接聽左電話。
 




「o畏，你係咪峰？」電話另一邊傳黎既係一把非常，非常陌生但又熟悉既女聲。
 
「。。。。」我冇出聲應佢，因為我覺得佢似係度白撞梗電話。
 
「o畏，聽唔聽到。。？」
 
我依舊冇俾任何回應。
 
「唉sorry我諗真係打錯左，唔好意思。」
 




我本來打算收線，心諗，屌你都on99，呢個世界咁多人個名有峰字，你都癲既。
 
點知俾我聽到對面細細聲咁自言自語話：下唔係呢個my lovely baby fung
咩。。咁係邊個。。哦！我知啦，係呢個steven嘛！
 
說罷佢又再拎起電話，個邊傳黎既聲音再次變大：係咪傻咖，hold咁耐都唔cut線。。。
 
我終於意識到發生咩事，於是即刻拼命向住部電話嗌：我係呀！！！我係呀峰呀！o畏？？？淇？！
 
無論我點嗌都好，電話那邊依舊傳黎無情既聲音：
 
「嘟嘟嘟。。。」
 
我急到好似熱鍋上既螞蟻一樣，但我無能為力，因為打翻過去，個邊既電話已經正在使用中，我打俾seven都係一樣既回應。
 




我好後悔，淇應該係出左d咩事先要叫佢朋友打俾我。而我load多一陣之後終於知佢頭先番說話係點解，淇佢搵唔到我一定好失望。。。
米住先！咁咪即係佢朋友誤會左seven先係佢男朋友？
 
但佢地仲有傾既咩？點解會有對方電話？？seven應該識避忌咖？？？
 
。。。。。。
 
我心感不妙，於是連翻撥打seven同埋個女仔既電話，如是者重覆十幾次後我暫時放棄左。點知我擺低部機冇耐，佢竟然自動黑屏左，垃圾機你而家先黎玩呢d野？？？
 
屌你！tvb d爛鬼劇呀而家？？？
 
因為手機壞左，冇得飛線，我唯有即刻剝機榖諗住換張sim卡落我呀媽部機度用住先，但我個部機係用細卡，所以我都冇得換落其他機度。我又唔記得seven電話，而家簡直係同外界隔絕。
 
我即刻換衫，落到去柴灣商場，心急如焚咁諗住用多d錢去急整部機，點知個呀伯氣定神閒咁同我講：呢個情況要成舊底板換，我地未有貨住，一係你擺低200蚊先？我一有貨通知你囉。
 




我唔耐煩咁話：我好急，有咩機用到細卡呀咁？
 
佢話：後生仔，慢慢黎啦，我介紹下呢部平平地。。。。
 
我真係好燥，於是直接打斷佢：我咩都買！
 
佢：拿，咁又唔得喎。。唔均真。。
 
之後又打算講道理，我見勢色唔對起身就走，因為我覺得佢冇野幫到我，同佢嗲只係浪費時間。
 
我成個人都好躁好躁，走到出去，只覺一片灰暗既天空俾街燈搞到好刺眼。呢刻既我心情真係好差，擔心，嬲，梗張再加上後悔自己曚盛盛做唔好男朋友應盡既責仼，所有所有野都好灰。
 
而最慘既係我無能為力。
 
我望住人來人往既街度，唔知應該何去何從。




 
搵人傾？春有人？係中學讀書個時已經因為性格孤僻冇人埋身，grad左啦，而家大家都dse grad trip，我就仲係自閉咁。好撚諷刺，通常有事我想搵人傾既人選係seven，但今次，已經冇人幫到我。
 
屌你老母！明明我先應該係知得最多個位，點解而家我變左局外人？what the fuck is going On？
「哐。」
太嬲太嬲，太多野壓抑係心入面，我踢左去附近燈柱度，好響既一聲。
 
踢完之後，我呆立係原地，旁人用d奇異既目光望住我。
得既反正呢個世界係有好撚多既痴線佬，你地鍾意點咪點。
 
香港人係種好撚八卦既生物，羊群心理呢樣野促使更多人行左過黎，俾咁多人一望多少都有小小唔自然。我帶住怒氣，決定唔做動物俾人欣賞，腳步直往7-11邁去。
 
「er我地呢度唔賣酒俾未滿18咖喎。」諗起頭先店員不屑既嘴臉，只覺滿肚子氣。
 
我外出身份證細細觀看。




原來我18歲唔係好耐之前既事，難怪人地會懷疑。樣唔成熟，性格又唔成熟，係既，我真係親唔起淇。我連一個mk妹都親唔起呀屌！
 
！！！
 
「咕嚕。」我飲下啤酒，只覺成個人真係平靜左好多。
 
都唔知飲左第幾罐，只見前面既景像開始變得曚糊，我吃力咁撐起自己個身，但只覺全身乏力，個人好浮。。。好浮。
 
「嗞。。嗞。。嗞」褲袋裹的手機急劇咁震動起上黎，我個人好似醒左小小。
 
「眼淚還是留給天撫慰 你是前度何必聽我吠。」忽覺有一首好熟悉既歌傳黎，只見一個痴線佬走遠，一定係周街9行仲要大大聲播住個喇叭個d死人呀叔黎啦。
 
不過我咪又係咁，我更加衰，我係周街9行，有屋企都唔翻，唔知自己做梗乜，毫無目標既死廢青。
 
褲袋既手機震得我心都煩啦。
 
我不耐煩咁接聽，只聽到一把熟悉既聲音：峰，你知唔知你條女屋企係邊？？？
 
我定眼一睇，原來係seven條死仔終於打黎。
 
我即刻著急咁回應佢：下，我唔知呀冇上過去。。你而家係邊？頭先。。。
 
我都未問完，seven即刻回應：屌，一陣先頭先啦！我打翻俾個女仔問先！轉頭call你！
 
之後seven cut左線，而我就繼續我漫無目的既等待。雖然我知呢個時候我諗呢d野唔o岩，但，即係我覺得seven好似好梗張咁，比起我，佢更加似淇男朋友，做乜9。。點解我乜都做唔到。
 
冇幾耐，seven打翻黎：o畏，原來佢住筲箕灣咖，我地快d過去啦，你係邊？
 
我呆一呆，心裹面納悶點解個女仔唔聽我電話反而會聽seven電話，而且係呢件事上面，我完全冇展現過男友既主導權，於是我話：柴灣，不如直接筲箕灣月臺等啦。
 
/
 
我同seven急速咁跑向淇屋企，淇屋企有分好多座，佢住係第7座，我地搵左好耐先知原來佢係較入既位置，一路奔跑先察覺到seven面上既表情係前所未有既梗張，莫非佢已經隱暪唔到佢鍾意淇既事實？
 
我另一另頭，否決我咁偏頗既觀點，而家都係應該集中翻係件事上面。
 
其實我一早想叫seven走，始終佢係度我比較尷尬，但又得佢知淇具體位置，我冇辦法只能俾佢跟住。
 
我地上到淇既屋企，禁左幾下門鐘都冇人應，正想打多次電話驗正下個地址既時候，一個戴住綠色大眼仔既女仔（下面俗稱大眼女）開左門：以，有2個既？
然後佢自言自語（用佢認為細既音量）話：冇理由咖。。我叫左一個steven炸喎。。。
 
steven見佢咁疑惑，用手撞一撞我。
 
我即時醒水就話：hi我係呀峰，我先係淇既男朋友呀（講呢3個字我特登咬清d音讀得好重，強化呢個事實。）
 
大眼女唔好意思咁搔一搔頭：sorry呀，我誤會左，咁呢位係？
 
seven笑一笑：我係steven呀，呀峰好朋友，我陪佢黎咖。。
 
大眼女聽完我地自我介紹之後就勁尷尬咁話：叫我lemon得咖啦，淇個朋友，你地入黎再講啦。
 
我同seven踏入去，只見屋內凌亂不堪。
 
我同seven踏入去，只見屋內凌亂不堪。
 
淇無力地攤左係地下，手執一把界刀，眼神空洞咁望住天花版，而周圍鋪滿地下既啤酒罐更加睇得出佢究竟受左幾大既刺激。
 
我焦急咁踏去淇既旁邊，問佢：你做咩呀。。咩都唔同我講。
 
淇空洞既眼神轉向我，默不作聲，然後突如其來的一巴掌打左落我塊面度。
 
我呆左。
佢唔係應該要緊緊咁抱住我咖咩。。？我唔係應該要俾安慰佢咖咩？？唔係呢2樣都算，無端端打我做乜春？？？
 
我呆愣左一下，意識到火辣辣既痛楚傳黎，之後我睥住Lemon話：究竟佢做乜撚野呀！你做過咩黎！
我越黎越激動，爭d就想行過去用我180既身高威嚇佢，seven及時阻止左我。
 
佢望住我話：屌你！冷靜d啦林逸峰！我知你梗張淇淇，但你拎Lemon黎做外出氣袋有用咩？你不如去廁所洗個面冷靜下，順便濕條毛巾出黎俾佢散一散酒氣先。
 
我入到廁所，叫自己冷靜落黎，心入面其實好唔開心，因為我唔明點解淇咩都唔肯話我知，男女朋友之間唔係應該坦白既咩？我既存在莫非就係俾佢打？我一把冷水潑落自己塊面度，終於清醒翻小小，濕完條毛巾拎翻出去諗住令淇清醒翻小小。
 
點知眼前係一片我從來冇諗過既景象。
 
眼前見到既係seven背對住我，而淇依偎係seven懷內，我唔知我有冇睇錯，因為我只係見到淇佢隻腳同seven個身影match哂。
 
我衝上前，拼命說服自己既諗法係過於偏激，但眼前所見真係佢地依偎住。我呆左，望住seven，seven亦望住我，一時間我接受唔到俾唔到反應。
 
「你地企係度做咩呀？幫淇佢搞一搞先啦。。。」Lemon既聲音由廚房傳黎。
 
「呯。」呢下係我抵受唔住衝擊於是走出淇屋企門既聲。
 
係，我冇好似d垃圾愛情劇咁同個男配角打交，什至嗌交，呀唔係，我連鬧佢都冇。
因為我可能由頭始終都唔係主角。
一開始就唔應該咁天真信佢係同淇拍拖，佢地一早有野咖啦，預左咖啦，毒撚第一次係冇結果咖哈哈哈，你第一日知咩林逸峰，仲死心塌地咁錫佢緊佢，真係傻仔黎。
dse拍乜鬼野拖呀屌，拍啦拍啦，成頂帽粒左落黎啦，仲唔走？Lemon都話搞一搞先，唔好阻住人地搞一搞先啦，都唔通氣咖。
 
/
 
［大概是那天的事太大打擊了，這天是我第五天沒有外出，還是很氣慣seven的所為。還有不久就考英文口試，即最後一試了，可我還沒有振作起來，每天睡醒都發覺枕頭全濕了，然後又因為流淚流得累了又睡著了，seven今天打了7個電話給我，可是我全也沒接。他們彷彿都在取笑我過武斷，我卻不這麼認為呀，真的，我很高興我看清了一個人。
 
-你今天當我什麼 一剎便來到的我-
 
寫於四月二十三日］
 
我將日記簿合翻埋，又開始loop我song list裹面既歌，其實我同淇而家算咩我真係唔知，又冇分到手，但比分左手既情侶更辛苦，我望住俾我擲爛左既手機同埋搣爛左既sim卡，突然之間淚又開始湧出黎。我冇俾過機會淇同seven解釋，即使seven上黎我屋企直接搵我，我父母會話我唔係屋企，因為我覺得就算隔左咁耐，條刺都係度，而且我根本冇野聽得入耳。
 
「現在已夜深 難將哭聲收細 堂堂大男人 還強裝都枉費」
 
突然間，我被呢句歌詞啟發左，冇錯，堂堂大男人，我應該振作，而家先8點幾，我決定落街行一轉，令自己醒一醒，日日咁係屋企都唔係辦法。
 
「我等左你好多日啦！你捨得落街啦？」
屌，勢估唔到落左去之後撞到既係你。