美國留學點滴: 美式英文

今日同大家講下美國留學最大既問題，英文。

你讀中學果陣有冇諗過自己學既英文原來唔係世界通行？朕就冇囉。我果陣仲好天真以為天下英文都係英文，咪又係咁樣讀咁樣串咁樣寫，但原來英文係分晒門派架！你中學讀果派係跟英國人既所以叫做英式，但係你睇ironman果派係第二個門派黎架，叫美式！好多中學雞，包括我自己，岩岩去到美國果陣都冇呢個概念，就係所謂「美式英文」同「英式英文」原來真係好大分別。
我好記得，果陣我係加州一個尋常小鎮一間尋常麥當勞，買完個餐想問佢拎張紙巾，咁紙巾英文係乜丫咪tissue囉，咁我咪話Can I have some tissue囉，唔好意思，佢聽唔明！一黎可能係我講到好香港啦tea su tea su咁，佢以為我想要tea。二黎佢可能真係load唔到，因為係麥當勞果d唔係叫做tissue，人地係叫做napkin！

雖然中文大家都係叫紙巾，但係英文你食野用果D係叫做napkin，你呻鼻涕果D先叫tissue，仲要你就咁講佢可能都唔明，你要講tissue paper。但係神就神在napkin係美式呢個門派又同時可以解做餐巾喎！你係唔會明點解架，一個紙巾一個餐巾，唔同野黎加麻，但係美式流派係唔理架，總之你食野果陣用果d話之你係A4紙都叫做napkin！好喇咁餐巾英文serviette係美式派係咩意思呢？對唔住，美國係冇呢個字！

但係係美國住耐D，就會發現又唔係真係咁難明既，即係例如我地中文都有廁紙呢個字，廁紙係俾你抆屎用，總之你係用黎抆屎話之你用A4紙都係叫做廁紙，但係食野用果d就唔會叫做廁紙一樣咁。

講開廁紙，好明顯你都sense到我想講乜啦，冇錯就係toielt。我地香港由細到大學既英式門派廁所都係叫做toilet，但係原來係美國，toilet係specifically講緊個馬筒，即係屎坑！人地美派個廁所係叫做bathroom或者restroom，你唔好理入面有冇得bath，總之廁所通通都係叫bathroom沖涼房！如果你想搵廁所你求其問個美國人「Where's the toilet?」 佢地唔會唔明既，但係可能會覺得好怪囉，因為個感覺好粗魯。即係你係商場搵廁所你唔會問個陌生人「請問屎坑係邊？」。你會懶係優雅咁問「請問洗手間係邊？」一樣，唔講得上話禮唔禮貌，呢D係語意上既問題。





上面兩個字都顯示唔到作為香港人初到步對英美兩派有幾咁混淆。又講番麥當勞丫，你去美國英國麥當勞食下薯條，你就真心feel到兩個門派根本好似係夾埋玩鳩你緊，玩到香港都唔知自己教緊乜。

喇即係咁，美國d薯片呀乜片物片果d全部通稱叫做chips，咁好make sense丫係咪chips係簿簿地一片片加麻cpu都係chip啦，對唔住錯晒！係英國chips係薯條，一d都唔簿唔係一片片，係一條條架！但係你又記唔記得自己小學中學學既英文薯條叫咩？叫French fries丫麻，但係fries係美式流派黎架喎？咁香港到底係跟英派定美派架？唔知。

上面都剩係講緊唔同字咋，佢地兩派最抵死既係同字會唔同音。手提電話我地小學中學學番黎係點叫？mobile phone。個mobile讀類似Mo-Bal，但美派係讀做Mo-Bo架！咁你以為手提電話叫MO-BO風啦，原來又唔岩，佢地係叫做cell phone……喇仲有仲有，讀chem一定會讀到既Aluminium，鋁，係你香港咪正正常常讀A-lu-min-nium，去到美國，你就發現原來美國人居然串錯字串少左個i！變左Aluminum，所以讀音就變左做A-lu-min-num，第一次上堂聽到你真係唔知professor up乜膠！仲有果d咩da-ta/dat-ta呀，Lei-sure/Lee-sure真係聽到你頭都大。

作為一個地道既中學雞，你可能心諗讀左十幾年英文，次次oral唔係第一就第二，你會以為自己d中學雞英文已經好勁好叻叻豬啦，但去到美國之後你先知道根本就唔係果一回事，原來自己中學學果d「英文」，根本就用唔到落生活到，有好多生活細節上既英文，真係要去到果到先明白個分別。

仲有好多例子架，例如你想問人借擦膠，你係美國，你唔好同人講May I borrow your rubber呀……遲D再講。