美國留學點滴: 奇葩Housemate - 垃圾層層疊
出國留學咁耐，俾到我最大既生活體驗，就係同幾個陌生人夾份租apartment一齊住，係難過登天。你唔出去同人住過，真係永遠唔會知咩叫做相見好同住難，永遠唔會知唔同人既生活習慣係真係可以咁大差別，更加唔會想像到呢個世界可以有咁多奇葩。
今日要講既係另三位奇葩Housemate，Sam, Thomas同Daniel。先旨聲明本文記載全部都係真人真事，如有雷同就係講緊你。其實佢地就唔係我Housemate黎既，佢地有自己間屋，不過Thomas就同我好friend，果陣差唔多日日都黎我地屋企打等，所以我先知佢地d野。
首先講下background，佢地間屋三房兩廳，三個男仔住，分別就係Sam, Thomas同Daniel，講完。
其實過得黎美國讀書既，大家係屋企或多或少都係大小姐少爺仔，所以呢三條友你都唔期望佢地會做咩家務呀乜乜物架啦。而Thomas仲要係修art畫畫既，藝術家你真係唔會expect佢屋企會有幾是正。
但佢地三個，哇真係世界級黎。果陣唔記得咩事，我要上Thomas屋企拎d野，一入到去見到個廳部牆心諗點解會咁有藝術感？佢地用n個空汽水罐，一個壘一個壘一個壘一個，居然壘左部牆出黎！
我問佢：「哇咁多罐想點呀？藝術品黎架？」
Thomas：「唔係呀，飲完唔想拎去扔咪壘係到囉，你行路唔好咁大力呀廢是整林佢。」
唔想拎去扔所以擺係到玩lego！！唔係親眼見到我真係唔信！
跟住行去個廚房－美國好興open kitchen，個廳就係廚房廚房就係個廳，所以個廚房就係d汽水牆隔黎－一行過去就見到個升盤，sorry我更正，係見唔到個升盤，因為個升盤已經俾堆碗碗碟碟刀刀叉叉堆到見唔到！
你有冇試過放水放到個升盤滿瀉丫？佢地係放碟放到個升盤滿潟呀！d碟堆到潟左出黎，好似推銀機咁款！有冇試過玩過推銀機，明明d銀仔已經離晒罩但係推極都唔跌出黎，基本上d碟就係咁樣一個狀態，你會覺得抆一塊碟出殷就成埋lum晒咁。
見到呢個境況，我都唔好意思多嘴問佢到底呢到發生咩事。我只係知道我需要去廁所冷靜下，到底我係咪發緊夢，呢到真係人住架！？！？！？
我問Thomas廁所係邊，佢話走廊轉右，係果堆鞋右邊。
係，冇錯，呢到係冇鞋架冇鞋櫃，所有鞋都堆晒係條走廊到。我一入門口果陣俾堆汽水罐吸引左所以唔記得講，其實呢到個地勢好險要，大門口一入黎對住既就係鞋之海，你要穿過條走廊，你一係學摩西分鞋海，一係你就行山咁，係溪澗中間果d石仔上面跳過去，即係係鞋海中間搵d lone lone 拿拿腳咁行，仲要小心d唔好sin親唔好踩到d鞋！
好喇唔理個鞋海住，番番去廁所，咁我就跳下跳下彈下彈下咁，幾驚辛苦終於都入到廁所，一入到去又俾佢嚇親。
我必需講多次，你唔出去同人住過，唔會知唔同人既生活習慣係真係可以咁大差別，更加唔會想像到呢個世界可以有咁多奇葩。
我居然又見到另一部牆………係廁紙筒牆！！！！！！幾十個定唔知百幾個用完廁紙剩低既廁紙筒就堆左係屎塔後面同上面，一路壘壘壘壘壘壘左六七層廁紙筒咁高！！！！！！！！
我心入面大叫左一聲：「What the fuck！」
然後我故作震定，開水喉用凍水冷靜左自己先，順便痾左個尿，射濕左幾個廁紙筒。
之後，我用光速拎左我想拎既野，閃，媽我好想番屋企！！
然後Thomas就跟埋去我屋企。
我問Thomas：「喂你果到，想點呀，垃圾崗黎架wo大佬……」
Thomas苦笑回答：「你知點解我成日去你到啦。」
到底好地地一間屋點解會變成咁，事後考證，個原因原來就真係好似Thomas咁講，因為唔想拎去扔。因為大家都唔想拎去扔，結果佢地就開始左呢個無限既垃圾牆戰爭！
好似玩層層壘咁，你夠薑咪擺多件上去囉！你擺丫你擺丫！啊！！！你整lum左部牆，你輸左你要扔晒佢！！！
……
好低b呀可。其實一d都唔低b，事關呢個現象唔單止發生係Sam, Thomas, Daniel呢三個人身上，係我多年留學經驗入面，發現垃圾層層壘呢個現象原來係好平常，十個留學生可能有七個都玩緊唔同程度既垃圾層層壘，原來我呢d識自動自覺清潔既先係奇葩。
以下係好嚴謹既學術分析同推論，加上Thomas既口供，所發展出黎對呢個現象既解釋，我稱之為「垃圾層層壘唔輸得理論」(The Theory of I don't want to Lose the Love Sharp Jenga)。
即係咁，你平時係屋企，有冇試過飲完罐汽水，懶，唔想郁，就咁放係到？你係香港，你就咁放d垃圾係到，放到第二日d垃圾會自己消失，因為你阿媽/工人幫你扔左丫麻。但係黎到美國同幾個friends住，你照辦煮碗，飲完罐汽水，懶，唔想郁，就咁放係到，你唔扔既話放十年罐野都會係到加麻！
咁舉個例Sam第一日放左一罐空汽水罐係到，Thomas Daniel見到就心諗，明明件垃圾係佢制造出黎，點解唔係佢自己扔要我幫佢扔先？於是Thomas 同 Daniel見到件垃圾係到都唔會扔。同理，Made in Thomas既垃圾，其他人見到都唔會扔，Daniel都一樣，如是者，佢地三個都唔會幫人扔垃圾，但係三個都會不停制造垃圾。
然後如果是但一個，例如Daniel頂唔順，自己走去扔垃圾，咁Thomas同Sam就會話，喂橫掂都係順便扔埋啦，咁基於係廳既垃圾大家都唔知邊件係邊個制造，再加上你自己都唔好意思理論，你最起碼係會扔埋廳果d垃圾，咁你咪即係無形中幫佢地扔左佢地d垃圾囉！但係你又會開始諗番明明件垃圾係佢制造出黎，點解唔係佢自己扔要我幫佢扔先？所以最終就算你頂唔順覺得呢個世界好垃圾你住唔到落去喇………你都係唔會扔垃圾！
於是隻game就變左做邊個整到成地都係垃圾，就邊個要扔垃圾。
係咪好痴線？我重申一次，呢d事係成日都發生。只要你同你個housemate唔算係好friend，呢隻game就有9成機會出現，差在規模有幾大姐。