【渠底奇兵】《我，就係踩單車跌落渠果個肥仔》（已爛尾）: 32

「１３年前。」 

「……？」 

「新高登幼稚園，高Ａ班。」 

「妳………妳係喊包？！」 

「本身我無諗過會見得番你，又或者咁講，我唔知點解自己會記得你。」 





「…妳…妳點認到我架？！」 

「你條鎖匙……」 

－－－－－－－－－－－－－－－－－－－－－－－－－－－－ 

喊包可以話係我唯一一個無keep住contact而仲記得既幼稚園同學。 

果一年，唔知點解佢會係幼稚園既最後一年先轉入黎新高登… 





講起新高登，聽講間野過左咁多年之後改左名，而且仲收左個可愛到街談巷議既細路女叫做小貞。 

真係想搵日番去睇下。 

果陣時既佢，梳左個公主頭，日日拖住個細hello kitty袋番學。 

仲記得佢初初番學既時候，日日都會喊住搵媽媽搵左十幾分鐘先停。 

初頭老師都會好比心機哄佢，不過成效不大，所以後尾就比佢自己冷靜一陣，再用其他野引開佢注意。 





日日聽佢喊就變左我地一班小朋友既第一娛樂。 

而我地班細路仔其中既唔知邊個就開始左叫佢做喊包。 

唔係欺凌，只不過係改個花名咁姐。 

因為佢細個果陣，好鬼死可愛，眼仔大大真係成個公主咁。 

大家都唔捨得欺凌佢。 

佢就係咁喊左足足一個月。 

直至有一次…我覺得實在太向左走向右走嘈……我行左過去同佢講野…… 

「妳唔好喊啦～媽咪話叻既小朋友係唔會喊架。」奶聲奶氣既我嘗試同佢溝通。 





「哇啊～～媽咪～～～～」點知佢理都唔理下我。 

「老師話勇敢既小朋友唔會喊架。」 

「啊！～～～～媽咪啊！！～～～」 

「妳睇下，其他小朋友都唔喊啦，醜醜啊！」 

「啊～～～！！！～～～～」 

（可惜果陣時我唔識講粗口） 

「唔好喊，我送呢個比妳啦！」我拎左一個好似多啦Ａ夢果個咁既噹噹出黎，係佢面前搖。 





「…………」佢攤開雙手接住左。 

「唔喊咪好囉。」我想好似大哥哥咁摸下佢個頭。 

「啊！～～～～媽咪啊！！～～～」 

…………… 

自果一日起，我同喊包就做左好朋友，番學想同佢玩，放學就唔捨得佢。 

食茶點要兩份食，午睡要訓旁邊。 

而佢都開始慢慢唔喊，不過我都係叫佢做喊包，哈哈。 

「媽咪我大個左要娶喊包做老婆！」仲記得有一日放學，我咁同媽咪講。 





「冬仔咁細個就要搵老婆仔拿？真係好鍾意喊包？？」 

「嗯嗯嗯！」我好似仲記得當時自己好堅定既表情。 

「好……咁你大個左都要問下人地喊包肯唔肯？」呀媽一路笑一路講。

於是第二日我番到去一見到喊包，就同佢講。 

「喊包…我大個左要娶妳做老婆！好唔好呀！」 

「做冬仔老婆？好呀！」純真既笑容仲留左係我個腦海入面。 

於是乎我地就老公老婆咁叫黎叫去。 





「冬仔老公！！今日茶點食燒賣啊。」 

「我唔鍾意上面粒豆呀，喊包老婆幫我食左佢！！」 

呵呵……大概果陣時係我一生中最純真既一段「戀愛」喇。

不過好景不常，我同喊包既婚姻生活只係維持左半年。 

當然唔係因為厹搶我女朋友啦。 

而係喊包佢又要轉校。 

真係唔明白點解連幼稚園都要不停咁轉校。 

聽講話咩野去第間幼稚園名校可以直升小學。 

「冬仔，喊包今日走喇，有咩野要同佢講啊？」媽咪同我講。 

………果陣時年少唔識野既我跑左去喊包面前。 

而Ｄ大人都好好咁比左所謂既二人共處時間我地。 

「冬仔老公byebey……」喊包佢已經流曬眼淚，其實佢已經幾個月無係我面前喊過。 

「喊包老婆……bye bye喇！」估唔到今次連我都喊埋。 

「冬仔老公，你要記得我啊！」 

「喊包老婆都係啊，以後唔好喊，要成日好開心咁笑啊！」 

「冬仔老公……呢個送比你丫……」佢從hello kitty袋仔度拎左一個好似星星圖案既布公仔比我。 

呢個細細個既布公仔，喊包佢好鍾意，平時邊個人想掂下都唔得。 

估唔到去到最後呢一日佢居然送咁重要既野比我。 

「多謝妳啊喊包老婆。」 

天不怕地不怕既而又只得五歲既我就係咁一野鍚左落去喊包個咀度。 

我諗應該係我地既初吻。