【渠底奇兵】《我，就係踩單車跌落渠果個肥仔》（已爛尾）: 23
食完飯之後，就同呀汶一齊睇故喇。
「呀冬今日咁夜番既？」
成個feel真係好似個女友問男友點解今日咁夜番屋企。
不過當然只係我幻想太多。
「哦…今日去左音樂室玩～」
「係喎呀冬你唔係識彈鋼琴架咩？我見到有鋼琴係度，點解唔見你彈既？」
「好耐之前既事喇～我而家都唔記得點彈喇～」
「我細個既時候都好想學架，可惜屋企果陣時負擔唔到啦，我覺得彈鋼琴既感覺好好！」
唔好玩啦，肥冬我最憎就係彈考試歌乜乜乜，唔係呀媽逼我我都唔會學呀。
「係咩？搵日我教妳彈丫～」
「好啊呀冬！」女神輕柔既聲線令到我暈頭轉向。
「係呢呀汶……原來妳同呀俊咁熟架？又會一齊去果間野食飯既？」
我終於問出我最想問既野。
「係…係啊…」
「哈哈，我以前成日聽人地傳話你地係一對，好奇問下咋。」
「下…唔係啊，我同佢係好朋友黎。」呀汶好似有少少心不在焉咁。
「哦…原來係咁啊。」
「嘻呀冬你又唔認鍾意呀雪，今日比我睇到喇！～你唔食茄子咩，尋晚明明食左兩大碗飯架！」
呢個時候呀汶笑意盎然咁望住我。
「呃……係有少少既…不過佢有鍾意既人喇。」
不認不認還需認。
「咁佢鍾意邊個架？」
「呀俊。」
「呀俊？！」唔知點解呀汶好似好驚訝咁。
不過都係既，仲記得先前提到呀俊，佢就心跳加速又緊張，可能好似粗口妹所講，佢都係鍾意呀俊…
「係啊，妳知唔知呀，佢為左呀俊，特登變到好似而家咁靚女，仲走左去參加音樂學會。」
「係…係啊？」
呢個時候，粗口妹突然出現。
「肥向左走向右走，有無興趣用讀心？」
「下…但係咁會唔會唔係幾好呀？」
「有得用唔向左走向右走用先係唔好呀肥向左走向右走！」
佢又好似講得好有道理咁喎。
「讀心二十秒，對象為鍾智汶。」
【原來啊俊鍾意我既同時…呀雪都鍾意緊呀俊…但係呀冬又鍾意呀雪……】
Hi好向左走向右走複雜呀我聽唔向左走向右走明呀！！！！！！！
「咁咪即係而家呢個鍾意果個，果個又鍾意第個，但係無人鍾意你囉肥向左走向右走。」粗口妹算唔算解釋左比我聽？
估唔到一個短短三十秒既讀心術……我會得出一個結果，就係呀俊鍾意呀汶，即是一路都有展開追求攻勢。
按捺住知道真相既衝動，我再次開口同呀汶講野。
「呵呵，唔知呀俊鍾唔鍾意呀雪呢，我答應左要幫呀雪～」
「呀冬你自己鍾意呀雪，但係仲要幫呀雪佢……去追呀俊？」
「Ｄ人唔係成日講咩野鍾意唔等於佔有，唔係咩？況且我都無力佔有。」
「但係…呀冬連嘗試都唔想嗎？」
「我唔係未嘗試過。」我望住呀汶。我第一次嘗試，就係中二向妳既表白。
「呀俊唔會鍾意呀雪架…呀冬你唔好氣餒啦…」
「妳又唔係呀冬，妳點會知…」
「總之我知啦～～黎啦我地睇故啦呀冬～」於是呀汶又再次靠向我。
望住呀汶，其實，我諗我都唔係咁得閒去追呀雪。
我真係一個Hi Hi仔。
訓左上床，呀唔係，應該話訓左落地。
忽然間就有人打比我。
「喂？肥仔？訓左未呀？」
「我叫林逸冬呀……馬家晞？」
「我知呀肥仔！你唔覺得叫肥仔親切Ｄ咩？」
做咩姐妳老味，小姐呀我今日先識妳架咋，可唔可以唔好咁自來熟呀？
「係……係掛，咁妳打比我做咩啊馬家晞？」
「唔好叫我全名啦！叫我呀晞咪得囉。」
「下…？」
「你唔覺得叫全名好老套咩肥仔？」
「係………都係既，呀晞。」
「洗咩怕醜喎～～我地下個月歌唱比賽唱咩野歌呀？」
「下，妳講真架？但係我地都唔熟…？」
「咁我地呢個月做朋友，下個月咪熟囉係咪先？」馬家…呀…呀晞真係古古怪怪。
「係……係掛？」我都記得自己講左幾多次係掛。
「你聽開咩野歌架肥仔？我鍾意聽廣東話歌架，你唔好同我講你鍾意kpop呀！」
居然…居然有女仔唔鍾意聽kpop，鍾意廣東話歌？！！！！
「我……我聽開Ｅ神基仔囉…」
「我都係呀！！！咁你鍾唔鍾意ＪＯＥＹ？」
「鍾意架，佢第一隻碟我就有買喇！」
「係咪不容錯失同未知果隻碟呀？！我都有呀！！肥仔你咁有品味既？」
比著我係高登同人地講我鍾意基仔同ＪＯＥＹ，一定係原罪囉。
「……ＥＲ……ＯＫ啦，咁妳呢？」如果佢再問我問題我都唔知點答。
「我鍾意陳柏宇同洪卓立，唔鍾意周柏豪，佢隻櫻花樹下鬼死咁難聽，肥仔你唱歌仲好過佢呀。」
「唉！」
「哇肥仔你扮周柏豪唉得好似呀！！！」
………
於是我同佢傾左半個鍾直到收左線，都未有講下個唱比賽唱咩野歌。
但係估唔到，呢個傳說中既女神，居然同我呢個肥仔會有共同話題……
諗番起佢今日推門入音樂室……真係好正！
於是真係好似呀晨所講，我生活中出現左４個全form最靚既女仔。
而當中無一個係屬於我既。