【渠底奇兵】《我，就係踩單車跌落渠果個肥仔》（已爛尾）: 04

話咁快就過左一日，我見無咩心情，所以一放學就番左屋企。 

連呀洪叫我去睇低ＦＯＲＭ妹妹仔都唔去。 

「粗口ＶＥＮＵＳ，妳係唔係度呀？」 

「點下冬仔，唔開心呀？」點解佢性格可以多變成咁？ 

「有少少咁啦…」 





「得少少咁唔夠架喎。」 

屌！ 

「如果我幫呀雪同呀俊一齊，佢係咪會好開心？」 

「我諗會既，除非唔會啦。」 

「嗯…」 





妳一部電話，又點會明白我… 

「不如試下電話既功能啦撚頭～～保證你用過話正呀！」 

係喎，試下係咪真都好喎，屌不過之前果個咩身型標準化都廢既，今次都係伏味濃。 

「下，咁我試下個能力強化啦。」 

我按左落去。 





「屌無用既？！」 

「低能仔，你心入面都無諗住要加強咩野能力！」 

要咁架咩？ 

咁唱歌啦，我平時最鍾意唱歌，班ＦＤ都話我唱得幾好架～ 

於是我又再咁多次。 

「生效喇，不過只有一小時，你而家可以試下。」 

半信半疑既我走左去開隻死了都要愛唱啦。 

果然係伏。 





「屌妳都無用既。」 

「加強呀，唔係一下子從垃圾變大師呀！」 

串我垃圾咁話喇？ 

於是我開隻浮誇試下啦。又真係好左好多！唱既時候異常地順！平時有可能走音既位完全無曬。 

原來能力強化係可以定技能更穩定。 

都唔錯。 

「咁跟住落黎試埋偶遇先！」 





「唔該你記得諗住想見既人。」 

屌我唔會柒兩次囉。 

呀汶呀汶呀汶！！！！！！ 

「已經生效喇。２４小時以內會遇見鍾智汶。」 

屌生效左喇？咁我聽日唔出街既話，係咪即係代表………呀汶會上黎我屋企？！ 

我真係一個天才。

於是我第二日就一覺訓到大天光。 

都唔知做咩開學要星期五，放多一日假係唔係會死呀？？？？？ 





其實都唔算係大天光，十點度啦，我就比呀媽叫醒左。 

講番我地屋企啦，我地算係小康之家啦，無咩特別，老豆老母都係打工仔。 

住既地方都算幾闊，唔係機艙廁所咁啦。 

「呀仔，快Ｄ執好間房佢，有人黎呀！」 

我心諗，唔係呀話，咁靈？ 

「邊個要黎呀？」 

「係你鍾叔叔個女呀！」 





喂，邊撚個係鍾叔叔呀？！！！！！！ 

「即係邊個呀？！！！」 

「咪就係你老豆細個Ｄ波友囉，呀仔你無野下話？佢個女咪係你個同學呀汶汶囉。」 

咪住先？點解我無相關既記憶架！？ 

「粗口ＶＥＮＵＳ！！」 

「點呀撚頭，你估我係你唔洗訓呀？」手機都要訓覺架咩？！ 

唔係充電就得架喇咩？話時話粗口妹出現左之後，我都未充過電。 

「點解無啦啦多左個鍾叔叔架？！」 

「你問我我問邊個呀？而家手機只有能力幫你安排偶遇，唔會改變你人生囉好嗎？有咩留邊拜山先講啦屌你我好眼訓呀。」 

「喂…喂喂。」 

負責任啦好無呀粗口妹？

於是我唯有問番呀媽。 

「點解我唔記得有鍾叔叔呢個人既？」 

「正常呀，你細細個果陣鍾叔叔就上左去大陸做野～而家你大個左唔記得姐。」 

「咁佢地黎做咩？」 

「汶汶要係我地屋企暫住呀，我早幾日唔係同你講左架咩？」 

什麼？！！！！什麼？？？！！！！ 

女神要黎我屋企住？手機既超能力有無咁勁呀？！！！ 

「下點解呀？」其實連粗口手機都出現左，已經無咩野我係會驚訝。 

「而家係度講就好，你唔好起人地面前提呀，你知你鍾叔叔同佢老婆離左婚好多年，咁汶汶一直都係跟媽媽既，但係上個月鍾媽媽急病走左…你鍾叔叔係大陸又有大項目做緊，所以汶汶就黎我地度住住先囉。」 

「下，點解唔係租間屋呀？又或者去其他親戚度住？」 

「鍾叔叔同鍾媽媽都係孤兒，你想去邊搵親戚？你老豆同佢係最老死，所以我地點都幫。到時汶汶就訓你間房，你就訓出廳，知唔知。要好好安慰人地！」 

原來呀汶媽媽過左身…唔怪得知尋日見到佢成個人無曬笑容…落曬形咁啦…… 

如果我可以做到Ｄ咩野就好喇…… 

「咁老死點解我咁少見到鍾叔叔既？」 

「次次我地都有問你去唔去架啦，你自己話怕生保唔肯去。」 

諗落又真係有件咁既事？ 

唉但咁有咩用，我幾年前表白之後，我見到呀汶已經怕怕。 

我又唔係果幾個高登故主角，又有未婚妻又同兩個女仔同居咁霸氣。 

仲要日對夜對，點算好？！！！ 

「叮噹！！！」 

今次仆街了！到喇………