【渠底奇兵】《我，就係踩單車跌落渠果個肥仔》（已爛尾）: 03

眾所周知第一日番學係廢架啦，而中五六既同學都唔會變，因為選科完之後幾年都同班。 

因為我都算唔高唔矮，咁就坐左係中後既位置。 

番到去我地班主任屎棍已經到左課室。 

不過屎棍份人好好，所以大家好鍾意佢。 

「各位同學，暑假過成點？做曬功課未先？未做就要把握呢幾日喇！」 





屌，有功課架咩？！！！ 

我即刻望過去呀洪果度。 

「我既學生生涯係無功課呢回事，我不嬲當自己番緊國際學校」 

估唔到佢一個眼神就可以講到咁撚多野。 

「仆街喇，今晚做到聽朝都搞唔掂。」果然呀晨都係無做。 





呢個時候，忽然間有個靚女入左黎我地課室。 

我一睇，大概一米六幾，對腳修長，成個feel比較清麗脫俗，有少少似長澤正美咁喎。 

點解讀左咁多年都未見過佢？！ 

屌唔係玩新同學咁老套下話？ 

點解屎棍唔介紹佢既？喂咁又太無禮貌播。 





望住個女仔慢慢下入黎。咪住先？點解佢行過黎我度架？！ 

睇住佢一步一步接近，我心入面已經諗緊十千種打招呼既方法 

「三萬蚊，過夜。」係咪好霸氣。 

佢終於行到埋黎，正當我想開口講個三字既時候，佢居然出聲。 

「肥冬你暑假前又話減肥，做咩仲成隻豬仔咁架？」 

我真係目瞪口呆，唔通係我過度FF，產生左一個新世界出黎？ 

但係無理由，我ＦＦ既世界點會有功課做呀？ 

「妳…妳…妳妳妳，妳係邊個呀？！呢個位有人架。」 





都唔知做咩今日坐我左邊既呀雪咁遲都未番。 

佢忽然間笑左出聲。 

「唔係下話，過左一個暑假姐，就唔記得左本小姐拿？」佢伸手係我眼前揮一揮。 

「妳係呀雪？！！！！！！」 

「唔係我，仲邊有人肯同你個肥仔坐呀？」 

我真係好驚訝，因為暑假前既呀雪，根本完全唔同。 

本身既呀雪係男人ＴＢ短髮，肥肥地，成面火山，戴住副框大過臉既死人眼鏡，個頭仲油過油頭毒撚既女仔。 





如果要形容佢，可以話係男人頭，豪爽，有義氣…囉。 

我好鍾意同佢傾計，因為佢唔似一般女仔咁小氣同是非。 

我有諗過如果我老左都溝唔到女，我就娶左佢架喇。 

佢簡直係我同呀洪呀晨以外既第四人。 

但點解三個月就變成咁架？我真係唔敢相信自己對眼。 

唔怪得今年暑假次次約佢出去佢都唔得閒啦。

「妳去左韓國旅行黎呀？！」 

「你無聽過咩叫減肥架？」 





有，我仲日日都想做呀。 

「但都唔會咁誇張掛？」 

「係咩？我係咪好靚女呀肥冬？」屌佢忽然間成個頭哄埋黎。 

點解皮膚咁白滑架？點解以前既油頭味變左草莓洗頭水味架？ 

我本身係好怕同女仔相處果種人，以前同佢ＦＤ，係因為當佢男人。 

而家同佢咁近距離，真係個心狂跳呀。 

「下…下，係呀…」我真係比佢嚇到呆撚左。 





「咁咪得囉！做咩呀見到姐姐怕羞呀？」講完之後佢又伸隻手黎搭住我。 

癡線沐浴露咁香既？妳晨早起身沖涼呀？ 

如果以前早知佢有朝一日會變成而家咁既樣，我諗我會一早溝左佢。 

「下，唔係呀。妳受左咩打擊呀？跌撚左落渠呀？」唉唔撚驚。 

「仲識講粗口即係無野啦，咩趺左落渠呀？咁…咁我想換個形象嘛。」 

「換妳個頭咩，癡線妳有無咁鍾意果個呀俊呀？」 

呀俊，係格離班男神。

成績好，靚仔，有錢。 

同呀汶一班，成日都傳出佢兩個有野。 

唉又真係幾郎才女貌既……但係呀肥雪，唔係，而家係女神樣既呀雪聽閒暗戀左呢個呀俊足足三年。 

原因好撚弱智，因為有次呀雪跌左個袋，呀俊幫佢執番。 

唔知以為睇緊廣告。 

而家仲要為左個俊變成一個女神。 

俊，邊撚度俊呀？睇過？ 

「檢測宿主身體機能異常。心跳快速，定義為緊張。喂撚頭你鍾意呢個女仔呀？」 

係呢個時候粗口ＶＥＮＵＳ把聲又係我耳邊響起。嚇撚到我差Ｄ大叫。 

「喂唔好忽然間出現得唔得呀？」 

「手機可以幫你溝女呀。」 

「呢個係我兄弟呀，溝咩女呀。」 

「你對住兄弟會怕羞同心頭加速？能成為密友大概總帶著愛？」 

屌，點解部電話自己識唱歌架。

我就唔理粗口VENUS，同番呀雪講野。 

「咁妳而家靚女左啦，咪去馬囉，一定得架！」 

唔知點解我自己講既野自己都覺得自己有Ｄ酸。 

「嗯！咁…咁我要點引起佢注意…？」 

屌妳咩，妳而家行步路都成大班厹望住啦，仲洗咩引人注意呀？ 

「哦好容易姐，妳到時見到佢，扮跌多次書咪得囉。」呢一該我覺得自己係一個智者。 

「得唔得架？」 

點解以前咁豪氣既女仔，而家講野會怕怕羞羞咁架？！ 

「實得既，妳睇下妳而家幾靚？一定得！」 

長澤正美喎，仲要係全盛時期果隻。 

「咁…下個星期試下，你陪我好唔好呀？」點解佢以前講野無咁溫柔既呢？ 

任務觸發：「幫助李曉雪成功與陳俊逸交往，積分加十。」 

屌妳要我幫個自己有Ｄ好感諗住娶佢既女仔追第二個男仔？ 

「呀VENUS姐，點解會有個咁既任務呢？」 

「無呀，見到你鍾意佢又唔認，咁咪玩鳩你囉，正唔正呀？」 

「如果電話有個泂，我一定大大力屌妳呀！」 

「耳機果個囉，我諗都差唔多大細，你試下啦，最多到時我比Ｄ聲你聽下啦。」 

「……」 

我咁大個人未試過憎一部電話。 

「肥雪，妳真係鍾意呢個呀俊？」 

「咩肥雪呀死肥冬，人地而家已經唔肥架喇，應該叫靚女。」 

「係唔係真係鍾意果個呀俊。」 

「嗯……」 

既然呀雪鍾意…咁我…一定要幫到佢同呢個呀俊一齊。 

因為佢係我最好最好既朋友。