每次我都只會叫一個豬柳蛋漢堡: 4-1-那年, 他們因豬柳蛋而相識

「喂，又係你男神喎！」

男神？可能啦。我留意左佢好耐，留意到可能我鐘意左佢我自己都唔知。

佢次次都係著住套西裝，次次都只係買兩個包。

「先生係咪例牌呀？」

第一次咁問，其實都肴肴地，因為例牌呢兩個字係唔應該出現係麥記。
但係佢好nice，微笑咁點點頭。





佢真係一個好特別既人。佢既例牌都係特別d，從來都唔會有人咁樣叫兩個包，佢係第一個。

「唔該16蚊丫。」

佢俾左一張五十蚊我，揮揮手示意唔洗找。

真係好特別。從來冇人去麥記都俾tips，佢都係第一個。

然後我地既交流就咁完結，過程連一分鐘都冇，拎完餐就走。





於是我開始施計仔。

每次離遠見到佢，我就會收埋晒放係架上面預備既包。等佢點完之後廚房就要整個新既，於是我地既交流可以延長七八分鐘。

等包果陣，有時我地會對望。

對望既次數愈黎愈多，時間亦都愈黎愈長，但係佢一句說話都冇講過。

有幾次我都想開口問佢：「點解你每日都黎買兩個包既？」





不過我唔夠膽。

我唔知道，原來呢少少勇氣會帶黎咁大分別。