【真人真事】當年中七AL，我打左成年天堂二，但我無悔！: 67-白痴
「吼！！！！！！！！！！！」
飛龍一聲長嘯，從天上急衝到地面伏下。龍上站著Σα，向廣場大叫：「我係葉！」
攻城完畢。理想世界所有人被自動踢走，我方所有人員就聚集係城門前既廣場慶祝、party，而我就忙住show off呢隻只有城主先可以坐既飛龍。
正當我地玩得興起，韓修修突然係世界頻道大叫一句：「戰神！係你放內鬼！」
韓修修到底點知係戰神？我都唔知佢點知，我剩係知岩岩攻城果陣我確實露左章，俾佢知道我地有無間道係佢盟入面。不過戰神既回答立即令我釋慮：
「醒起喇咩，輸贏係魔界時代已經入左你盟，係你成個盟冇人記得咋，白痴！」
睇到呢句，我笑左笑，然後就俾同盟頻一大片祝賀同吹水對話洗左板，後面講乜都睇唔到。整個同盟都浸淫係剛剛攻下亞丁、高昂狂喜既氣氛下，根本就冇人見到，亦都冇人理會佢地嘈乜。
攻佔完亞丁，可以預想理想世界，尤其是係韓修修同光頭和尚兩公婆一定唔會憤氣，搵戰神鬧下交解下氣都好正常。但係我冇諗到，佢地會因為呢件事發難。
星期一，破城後既第一日，我心情愉快，出左成日街。就係我仲好安心地同朋友食緊飯，樹仲默默咁打緊錢既時候，事情就發生……
「我比人殺！」soso向同盟求救：「係原始島，連撞我兩次火車！」
雖然gm禁左pk，但係拖一大堆怪撞人仍然有效，呢個係冇可能禁止到既補刀殺人手段。
樹一收到sos，諗都唔洗諗，直接係世界頻道大叫：「韓修修你搞我既人做乜事？」
估唔到，韓修修又真係應樹：「你問戰神，我學佢既。我唔想同你係世界頻道嘈。」
樹：「戰神既事關我地盟咩事，你要搞搞佢皇族，唔好唔記得我地有和約！」
韓修修：「懶得同你嘈，而家係戰神搞我地理想世界在先。總之戰神搞我地，我地就搞你盟。退盟殺完人就入番紅樹葉，我唔信呢套。」
樹：「冇人同你嘈，我係同你講道理，你邊隻眼見到佢殺完人就入番紅樹葉？戰神從來都唔係我地盟，佢係皇族呢點你最清楚，佢殺人關我地咩事？」
韓修修：「戰神以前已經試過一次，soso都試過。次次都係咁，我唔會再信。」
樹：「你地以前咪又係咁做！而且我地紅樹葉一個人都冇殺你盟友，你搞清楚。」
呢個時候，事主戰神終於都係世界頻道開腔：「一睇就知佢地殺唔到我，咪搵紅樹葉出氣。」
「你都殺唔到我，所以殺我盟友出氣。」韓修修係世界頻道回應戰神，又另外同樹講：「戰神同我嘈果陣，就係紅樹葉。」
雖然三人係唔同頻道發聲，但事實上，呢一刻三個人都企係奇岩城鎮既廣場上面。
樹轉用普通頻道，俗稱白頻，答韓修修：「戰神係紅樹葉已經係八輩子前既事！」－－當然樹係講緊我離開果半年入面既事，戰神入過紅樹葉？可能啦，我都唔清楚亦冇興趣知。
韓修修亦都係白頻回答：「佢係紅樹葉，係琴日既事。」
戰神都用番白頻：「我幫手攻城先入紅樹葉幾日，你就一直係理想世界。而家係我殺理想世界，你殺紅樹葉做乜？」
韓修修：「唔好意思，我一直都係日殺。因為奇岩有個人係咁宣戰，所以我只好係咁入理想世界幫手守城。既然我入過理想世界，你就要殺理想世界；咁你入過紅樹葉，我咪殺紅樹葉，全部野都係跟你學。」
嘈左咁耐，樹終於都搞清楚係咩一回事。就係琴晚，攻完城之後，戰神同韓修修嘈完，我地掛住party冇理佢地。原來一直嘈到今日，仲先而口角繼而動武，戰神開始殺理想世界既人，然後韓修修就借故燒埋我地。
樹立刻回應：「佢入紅樹葉唔夠兩日你就同佢嘈，嘈完佢琴晚就退左盟啦。如果咁你都要補我地刀，不如話係你睇準佢係紅樹葉就特登過黎搵交嗌！」
戰神亦回應：「咪扮野啦靜心，日殺神早同你地合併左啦，而家咪即係你理想世界既分盟！何況我唔殺下你地你地技術會變好咩？」
「我一樣可以話，戰神因為驚紅樹葉俾人殺，所以退盟呀！」韓修修以一敵二，先回樹，又答戰神：「你唔洗黎，我地技術都好好。」
基本上，韓修修已經默認左佢係靜心。離靜心話唔玩，已經接近一個月，就算佢而家默認，仲有幾多人會關心？冇，所以佢都廢事反駁。
呢三個人，就係咁樣，一直係奇岩鎮嘈，嘈到我食完飯、番屋企、沖埋個涼、online。
都未見到畫面，我已聽到拉弓聲、爆擊聲、角式被擊中既叫聲……等等等，夾雜於奇岩城鎮既背景音樂中，不停此起彼落。
登入完後，最先映入眼廉既，就係小冷既屍體。
小冷係皇族入面碩果僅存既幾個active會員其中之一，亦係元老級會員，手上果把橙光+200單手劍，應該係我入黎呢個服玩之前就拎到而家。
「葉安安。」"安安"係台灣人獨有既網上打招呼用語，小冷訓係地下同我打招呼。
「安安，你地…搞咩呀？開拖？…乜城鎮都開得拖既咩，bug左？」
小冷冷冷地、半開玩笑咁答我：「同理想世界打緊盟戰，幫你地掃緊屎。」
「終於番黎喇咩？」樹係廣場上見到我，答一答爹：「記唔記得以前得拍賣區係安全區？我諗gm冇set到盟戰既野，bug左，得拍賣區唔打得盟戰。」
「啊……咁而家，到底係乜料，冇啦啦打咩盟戰？」
樹將上文既事講俾我聽：「……最後戰神廢事拖累我地盟，咪直接向日殺宣戰。」
天堂二入面既血盟戰，一旦宣戰，而另一邊又接戰，就係全面戰爭。除非係安全區，否則只要雙方盟員一見面就可以開拖，被殺後唔會變紅人，但係一樣會跌經驗值。雙方可以一直殺，直到其中一方主動宣佈投降為止。投降唔會有任何罰則－－但係被人萬世恥笑就已經係最大罰則－－因為呢場戰必須雙方願意先可以開打。
突如其來既盟戰，一時之間，我都唔識點反應，又好似關我地盟事，又好似唔係好關事：「啊…咁…咁我係咪可以食花生？」
樹：「等佢地打完先算。呢個moment兩邊殺到紅晒眼，你都做唔到咩野。」
戰神既皇族入面，仍然active既人唔多，戰力自然更少，上得台面既最多就係戰神同小冷兩個人。粗俗講句，理想世界一人一啖口水都吐死佢地。但係，係廣場上面根本就唔見戰神同其他皇族盟員既蹤跡，就只有小冷伏屍係地上同我地傾計，同埋成堆理想世界既人圍住小冷條屍。
唔洗一陣，就見到光頭和尚係世界頻道大叫：「你夠薑就黎奇岩同我地打，出去補刀算係咩英雄好漢呀！」
戰神立即回應：「兩公婆都白痴既，有種就同我一打一，唔好叫人黎丫！」
光頭和尚似乎自信滿滿，道：「黎丫我就同你隻抽！」
語畢，戰神果然單人匹馬，走番黎呢個佈左廿幾三十個日殺盟員既奇岩。
手上拎住既，係一把對閃耀住白光既大弓－－伊克魯斯弓，同佢黑暗妖精灰黑色既肌膚形成強烈對比。
「輸左你地日殺同我立即投降。」
「你殺到我先算！！」
光頭既自信黎自邊到？無非都係果把+1500弓，恰戰神得+1000，但係戰神既然應戰就必然有計，佢係戰神，唔會打冇把握既仗。
戰神單手持弓，換上一身全黑既末日重甲，又立即換上一套全白既聖威重甲，一步一步向光頭走過去。
「葉幫我發號。」
戰神叫到，我立即上前幫手：
「3…」
「2…」
「1！開始！」
光頭毫不客氣，放手就係一記"七箭"。
戰神卻根本唔理光頭，狂叫四下，換起銀白色既王朝重甲，除即彎起手上大弓，向光頭猛射！
?！?！?！
清脆俐落既三下爆擊聲，倒地既係－－光頭和尚！
光頭什至連要飲橙汁既意識都冇，一下、兩下、三下，連係咩事都未搞清楚就已經死左！
我心裡暗暗喝采：「哈哈哈轉左做破壞者，估你唔到！」
熟用破壞者既我，立時明白係咩一回事－－戰神由本來既弓手轉左做副職業破壞者。剛剛戰神不停換甲，就係我常用既破壞者既秘技，透過唔同甲影響既HP最大值，令血量瞬間降至30%以下。連叫四下係開四狂，攻擊力暴增，再加上果把+1000弓，相信攻擊力已經破十萬。
「白痴。」戰神微一微言，踩住光頭既屍體，宣告自己就係勝利者！