【真人真事】當年中七AL，我打左成年天堂二，但我無悔！: 外傳-拍賣會
GM舉辦既第一次全服屠龍會，係接近兩小時既施殺下，眾人終於成功擊敗地龍。唔知係咪GM加持，呢條地龍一口氣跌左五十幾件寶物，當中包括最珍貴，全私服第一件出產既"地龍耳環"！！
GM開始收集所有寶物，準備進行拍賣會，向在場所有參加屠龍會既人士拍賣寶物，收入所得再平分比所有人。
樹立即問：「跌左地龍耳環，我地上限價出幾多？」
我諗一諗，答佢：「um…全服第一隻，肯定bid到上天價，我地留番d錢bid其他王朝武器防具比盟友用仲好。」
地龍耳環，即係俗稱"boss飾品"，除左加魔防之外，仲有一大堆額外能力加成，地龍耳環最強既地方就係常駐吸血效果，同埋抗暈抗異常狀態，有左之後真係暈極都暈唔到！但係值唔值得用天價黎買，我就覺得唔值。
擾攘一輪，GM已經回收晒所有寶物，並正式宣佈：「第一屆地龍拍賣會即將開始，今日我地既商品依次有地龍耳環、王朝弓、…………、s級武卷、等等合共五十七件寶物。」
我一見到就係電話叫左聲：「哇！居然將最貴重既地龍耳環放做第一件拍賣！」
坊間既拍賣會一般會將最貴重既物品做壓軸，因為咁樣先可以留住大部份人，逼佢地由頭坐到尾，增加其他商品賣出既機會。
但係我地呢d online game打完王既拍賣會唔同。呢種拍賣會，我叫佢做"內bid"，即係只有有份打王既人先有份出價，最後賣唔出既野再"外bid"，即係向全世界公開拍賣。而內bid同普通拍賣會唔同既地方係，所有人都焗住要留到拍賣會完結，因為到最後會即場將所有拍賣收入平分比參加打王既人，走先就冇錢分。
而分錢其實都有兩種方法，一種係每賣出一件即比錢即分－－呢種方法可以比本身冇乜錢既人都可以參加競投，因為隨著拍賣會進行，眾人手上既資金會愈來愈多，咁樣如果將貴重寶物放到最尾先賣，一開始冇乜錢既人都會有機會買到。
而另一種就係賣晒所有野先一次過分，可以想像到，咁樣一開始冇乜錢既人基本上就乜都bid唔到，只有有錢佬可以玩。咁樣既情況下，我地可以預期最有錢既人就會係最大得益者，基本上成個拍賣會就係有錢佬玩晒，窮人只可以等分錢。
但係就算GM咁樣分錢，拍賣次序依然顯得重要，而家佢將最貴既野放頭位拍賣，就意味住……
樹：「我地只要推高地龍個價，作理想世界一筆，後面d武防就可以低價入手！」
呢種內bid拍賣會，雖然性質屬於個人競投，但係當大型到好似地龍呢種，就冇人會真係"個人競投"。因為寶物量大，又珍貴，根本冇"個人"可以有咁大量既資金，個個都係bid一兩件就收晒檔。
實際上每個人都係向盟內集資，用成個血盟既總資金去bid，bid完再係血盟內部分。而咁多個血盟入面，唔洗問最有錢既就係理想世界，同紫幽既壬生一族。
GM：「第一件拍賣品：地龍耳環，無底價，請出價。」
緊接著GM既說話，戰神用9秒9速度落bid：「100億。」
「仆你個街一開波出100億！！！bid條毛咩！！」－－我諗所有人都係同我同一個想法。
除左樹：
「如果你當戰神係GM代言人，但係又冇人知佢係GM代言人，咁佢出100億，即係GM暗盤出100億，咁係咩意思？」
紅：「即係底價100億囉。」
葉：「佢睇到晒所有人講既野。100億應該接近某d人既預想價錢，佢想台價。」
冇錯，戰神不問世事，致在玩，又識GM，根本唔需要呢隻地龍耳環，台唔到價，咪當派錢。
但係現場鴉雀無聲。
GM：「100e 1次。」係game入面我地將億打做e。
……
「100e 2次。」
……
亞格斯：「105」
戰神：「110」
「115」
「120」
「125」
…
果然理想世界係想bid地龍耳環！但係唔洗我地出手，呢場叫價戰已經開始，係戰神vs亞格斯！
亞格斯同戰神不停五億五億咁互相鬥價，一瞬間已經上到就黎140億，點知就係呢個時候，突然殺出一個程咬金－－紅：「180！」
「屌你1咩80呀你有錢咩！」我立即係電話屌佢！
紅：「唔係話台佢價咩？？？」
「戰神台緊丫麻你台咩姐！你身高都冇180啦出咩180！！」
……
「180e 1次」
……
冇人落bid。
全場寧靜，連閒計都冇半句。鴉雀無聲？唔係，係鴉雀呼吸聲－－靜到連心跳聲都聽到呀！
……
「180e 2次」
……
樹係電話，把聲落晒形咁講：「今次仆街鳥……」
我同意。
……
「180e 3次，成交，恭喜紅獲得地龍耳環。」
屌。
一時之間，我地電話入面既三line dead air左幾分鐘。
良久之後，紅先講一句：「你會幫我出架可阿樹？」
……
既然出左價，我地又有錢，就自然要俾錢，更何況而家係gm做主持，佢又睇晒所有對話，又知晒我地家產，仲邊有得走數？唔想出都要出啦！
但係而家最重要既係成個拍賣會既策略立時要改，因為出完呢180，我地盟就冇多餘錢可以bid王朝武防。
我問樹：「我地盟仲剩幾錢？」
「我地盟有幾錢定係我有幾錢？」
「你有幾錢咪即係我地盟有幾錢囉，出完百八億仲剩幾多？」
「五十億左右。」
……五十億比到盡買兩三件王朝就冇……
我同樹商量後，樹係盟頻到打：「紅岩岩洗晒d錢，我地而家冇晒錢lu。我地bid到尾等其他人玩到冇錢先再bid，低價bid d 冇人要既A同低級S武防爆晶。」
爆晶即係將道具結晶化，而結晶就係用黎俾工匠做新道具既必須材料。A同低S級既野冇人要，只要用低價bid番黎，再用teleport去火龍心或者邪教神殿收集道具，就可以賺番一筆。
於是我地成場都係到留手。
望住果堆本來好大機會可以低過市價入手王朝武防一件一件俾人掃走，我心入面只有無奈。
最終，因為A S級野冇人bid，我地用五億一次過bid晒十幾件武防。而王朝、伊克魯斯武防就大部份落入理想世界同壬生手上。
拍賣會完結後，GM將拍賣所得既資金加至齊頭，再平均分俾在場所有人，每人分到接近十億cash。而我地盟參加屠龍既人數得15人，夾埋都只係賺左150億，就算計埋果埋AS武防爆晶所賺既錢，最尾計到盡都仲蝕左20億俾隻爛鬼耳環！
樹葉：「屌！有破壞冇建設！」