【真人真事】當年中七AL，我打左成年天堂二，但我無悔！: 42-落紅枯樹沙卷葉

夜晚，人最多既時間。

紅樹葉既人遂漸online，我發現原來薰都係我地盟入面。薰自己本身就有個盟，無啦啦入左黎？呢半年睇黎真係發左好多事。但係就算計埋薰既人，全部加埋都係得十幾個人online，同以前閒閒地廿幾三十常駐真係冇得比。

盟入面見到我係到同佢地say hi，大部份都又驚又喜，小部份唔知我係乜水，其中一個我未聽過，叫"風聲鶴唳"既人問我：

「我係地獄收既，玩左冇耐，你係盟主但係我從來未見過你？」

風聲鶴唳呢個名真係幾好，同我黎緊既計劃互相輝影。





地獄向盟員解釋：「佢就係我地紅樹葉既真正盟主。之前走左，我只係幫佢代理盟主，而家將盟主位俾番葉。」

地獄玩既係騎士，佢性格都同騎士呢個職業匹配，忠心不二，二話不說就俾番個位我。只要聽日server例行維修完之後我就正式重掌紅樹葉。

而最特別既係，今次，係真真正正既紅樹葉：紅、樹、葉三個創會元老係齊到，真係唔知幾耐冇見過呢個光景。

其實當初創會，紅改完"紅樹葉"呢個名之後，我就幫我地三個人起左個朵，分別係"落紅"、"枯樹"、"沙卷葉"。當日改呢幾個朵，純粹貪玩，完全冇諗過"落紅枯樹沙卷葉"全句帶出既荒涼之意，會同今日既紅樹葉咁貼切，睇黎我改名都幾有天份。


不過呢首詩其實仲有下一句，我從來冇講過俾人聽……






soso同我收番大部份因為離盟協議而退盟既人，阿樹一見到成班人係盟入面，就即刻問我：「你打算點做？」

我答佢：「同佢和談。靜心知我不嬲玩開攻城戰，我諗住同佢講我乜都唔知，剩係想打攻城戰，以後戰場局限係城戰，聽日我就宣亞丁奇岩。呢段時間我地開新分身，到時用Teleport視察各大練功區，一有佢既人就傳過去補刀貼怪，殺完即傳走，日日如事。」

樹：「佢肯定會將矛頭指向我地，有冇証據都好，我試過，何況你咁做都冇point。」

我問：「你果陣開分身都係用死一隻分身係咪？而家玩用完即棄，係咁練新人，有d入其他盟，有d自己開盟，求其downloadd盟徽扮新盟，有d冇盟，有d有裝有d冇裝，有d+100弓有d冇弓，總之乜都有，風聲鶴唳，草木皆兵。唔係要殺佢既人，而係要佢亂，要佢殺人！」





唔洗我畫出腸，樹應該知我想點。

樹：「明白。你想咁玩都得，但係邊到有咁多分身？」

我：「練囉，有冇咩新地方練分身快？」

樹：「冇地方快得過四大陵墓，但係四大陵墓改板之後執左，變番正常解任務地方，而家要練分身都係去古墓練。」

古墓既怪物密集，而且咩level都有相對應古墓，只要有好裝備，的確係一個練功好地方。

我：「咁呀…你有錢架可？整批+100冒險弓+100夏乜乜獵弓黎啦。丫唔好，乜都整d黎，AB級雙刀、鈍器、法杖每樣整把黎。」

冒險弓係B級武器，52級就可以拎；夏乜乜獵弓全名係夏伊德獵弓，A級武器，61級就拎得。+完100既AB級武器，雖然唔夠+100s級武器強，但係勝在低level都拎得，用黎補刀殺人綽綽有餘。

樹：「邊有咁多閒錢呀玩野咩。」





我：「唔緊要，岩岩識左咪嚕盟兩個大財主，佢地應該會幫手……」

然後，大概到左十點，靜心終於都密我，佢單刀直入：「好耐冇見，你知唔知我地兩盟有協議唔可以收soso入盟？」

葉：「我岩岩番黎玩，咩都唔知。岩岩亞格斯見到都好似好驚奇，我問佢地問soso又冇人肯講我聽，想問你好耐，到底係有咩協議？」

靜心又真係好好氣咁一五一十將成件事講晒我聽。當然，佢有佢自己既版本；又當然，佢既版本同soso既版本係有所出入。但凡呢類相方爭執互殺事件，你永遠唔好妄想係當局者身上明白到事情全貌。

葉：「咁你地有咩人踢左出盟？既然休得戰，踢唔踢盟都冇所謂啦除非又想打既姐係咪先？其實咁樣打打殺殺真係好無聊，你知我不嬲都係最和平，最守遊戲規則，剩係鐘意打攻城戰，如果我係鐘意補刀果d人，我當初走果陣就傳位俾樹唔係俾咪嚕啦係咪先？就係知阿樹佢鐘意殺人丫麻！我同亞格斯係好朋友，冇啦啦番到黎話要打，問心我真係唔想同佢同你地開戰，補刀有乜好玩姐？咁樣打落去個服都唔會有人玩啦。不如咁，我地兩盟以後將戰場定係攻城戰，大家每星期打一場交，又免傷和氣又可以發泄不滿又合晒規舉。紅樹葉而家係我講左就算數，soso樹薰就算戰神都冇野講，就睇你意思點。」

靜心呢一刻似乎幾相信我，佢答：「我都係講左算數，攻城戰打。」