【真人真事】當年中七AL，我打左成年天堂二，但我無悔！: 41-談、判

同理想世界談判，即係同靜心談判。同靜心談判，即係同個癲婆談判。同女人談判已經係難事，仲要同個癲既，談何容易？

仲記得當日奇岩收稅事件，我牌面有亞格斯贊助武打人既圖，以為可以拋疾佢。但係靜心驚都冇驚過，講兩句就放最後通碟，完全唔理亞格斯既事。呢個人，一係橫蠻至極，由頭到尾都打算犧牲亞格斯同我攬炒；一係聰明至極，一早睇透我係偷緊雞或者唔係爆大獲gm都唔會郁人。無論係邊樣，兩樣都係冇計傾類別，同佢談判真係談條毛。

所以我從來都冇諗過要談判。我係要談、判，一邊談，一邊判。

就係收番soso既同時，我已經有晒全盤計劃。

回想一下，到底我有幾多隻分身係冇人知？Teleport123三個account，合共24隻召喚師，只有我、樹、咪嚕三個人知道，可以用。





葉呢個account入面仲有一隻弓手，娃娃account入面有隻巫師，兩隻都係冇人知，可以用。

但係一弓一巫唔夠，人手亦都唔夠，我要大量。

忽然諗起，岩岩拒絕左既大小綠呢兩個人，睇佢地一身裝備就知係有錢，更重要係有心對抗理想世界，絕對可以用。

我即刻密大綠：「here？」

大綠 :「你肯幫我地？」





葉：「你地知唔知贊助既事？」

大綠：「知，我地盟主都有贊助。」

佢地盟主，即係紫幽，即係咪嚕。係呢半年入面咪嚕都開始玩贊助！？我真係估唔到。

葉：「咁我可以點幫你？」

大綠：「我地好簡單，只係想大家有王打。而家連王都冇得食，俾理想世界霸晒，你可唔可以幫我地勸下盟主，叫佢改變立場？」





葉：「我都好簡單，我幫你你幫我，你練大量冇人知既弓手巫師，join我同佢地打遊擊戰，ok？」

大綠：「即係要我地匿名幫你紅樹葉做打手殺理想世界？」

葉：「係，我地唔夠人。」

大綠：「求之不得！」

葉：「成交。」

很好。明顯地，佢唔係主和派，佢有呢個心好耐，只係因為有咪嚕禁止而唔做得。而家我叫佢做，仲要係開分身，咁責任就唔係自己同壬生一族上，更何況只係一個互惠互利既交易？人既心理就係咁簡單。

同時間，我又諗起咪嚕當初帶一群人去避戰，去尋找自己既桃花源，可惜現實就係現實，桃花源記就係桃花源記，只存在係陶淵明既幻想裡面。更何況有人就有鬥爭，而家呢個主和派入面本身自己都有主戰派，避得去邊到？

然後我就開始係亞丁奇岩無所事事聊事鬥非。





幾個鐘後，人開始多，終於俾我係亞丁見到亞格斯。

基本上，理想世界咁多人入面，我只係同亞格斯算有少少私交，大概係識英雄重英雄、君子之交果種，因為大家都好enjoy遊戲。咁多個贊助武器入面，除左戰神有幾把之外就得亞格斯係用贊助雙刀，主職劍鬥士，其他大部份唔係弓手就係巫師。弓手巫師當然係貪佢好打，雙刀劍鬥士？明顯係因為鐘情於劍鬥士呢個職業，所以我有時會同亞格斯研究一打一pvp，player vs player既技巧。而且佢係一個好人，起碼佢冇殺人，憑佢仲係理想世界入面而冇退盟我就知道。如果唔係礙於勢力關係，亞格斯絕對係一個老實可靠既朋友，我亦好慶幸第一個遇到既人係佢。

我放低武器，諗住走埋去打佢幾拳say個hi，點知系統話《對方身處安全區域內，不能進行攻擊》…亞丁廣場都冇得打？

亞格斯見到我行埋黎，揮一揮手講左句：「葉？好耐冇見。咁得閒上黎？」

我問佢：「點解打唔到你既？」

亞格斯冇直接答我，亦都冇用例子答我：「啊，城鎮轉左做安全區好耐喇。番黎坐下定長玩？」

佢其實冇答我問題。我打唔到亞格斯，當然係因為轉左做安全區，我想問既係點解轉左做安全區。不過佢迴避問題，我都廢事再問。





我：「我太悶喇，上網見到話改板開左好多新野，番黎試玩。」

我同時間密soso：「黎亞丁廣場搵我，唔好講野。」

soso唔洗兩分鐘就黎左亞丁，亞格斯見到soso名前既盟徽，立即問左句：「你入番盟？」

我一早已經打定左答案，只係等亞格斯問，問完過五六秒我就按enter：「頭先見到soso，見佢退左盟，咪收番囉。我地去原始島探險搵暴龍，一齊？」

亞格斯：「啊，唔喇我有野做。」

我：「咁我地去盟屋準備下道具先，88。」88即係byebye咁解。

亞格斯仲好好心提我：「原始島怪好密，你兩個人唔夠打，最好帶多幾個去，88。」

我：「Thank you！」





第一步順利完成。理想世界已經知道我既回歸，亦知道我收番人。