【真人真事】當年中七AL，我打左成年天堂二，但我無悔！: 外傳-無所事事的盟主

盟內成日都話我呢個盟主，日日係奇岩城鎮食飽飯無屎痾，on99生勾勾咁，又唔賺錢又唔打怪，其實我不知幾多野做。

其中一件事，就係研究穿牆。

自從奇岩第一次守城戰，小草可以直接穿入城堡停機砰後，我就開始對穿牆進行研究。

回顧一下穿牆既幾個步驟：

1.召喚座龍，坐上去
2.對住道牆係咁跑




3.收番條龍

咁就穿左牆。

原理到底係點？角式不停向前行，係game入面其實只係坐標既計算，只要根據你既移動速度同正面方向，系統就會計算你咩時間應該係咩位置。

人物同龍係兩個object。騎龍即係將你人物既坐標設定為永遠係龍既上面，而龍就變成受玩家控制既坐標。

而當你對住道牆跑，其實系統依然會因為"跑"呢個動作而計算你"跑左去邊"既坐標。但係由於有障礙物，所以系統計完後唔會將個計算結果apply落你個人物上面，結果你變成原地跑。





而當你收番條龍，系統就要重新設定你人物既坐標，龍消失，龍既坐標代入落人到。而個bug位就係呢到，系統直接將"跑左去邊"既計算結果套入人物身上，忽略左障礙物效應，形成"穿牆"！

呢個就係我既理論。

理論呢家野冇乜人明，淺白d講，如果理論係岩既話，你坐住隻龍，對住道牆跑一個鐘，咁你收番條龍就會去左無視障礙物直跑一個鐘後既位置。

小草對住飛龍管理員跑，呢個"移動動作"係去到飛龍管理員身邊就會停，即係話"計算結果"就係飛龍管理員既身邊，結果小草一收龍就去左飛龍管理員既身邊。

發展左呢個理論之後，我就開始進行各種實驗。





四大陵墓係有幾道門，按理論，我對住第一道門跑，跑耐d先收番條龍既話係可以直接穿入第二道門。一試，果然work！

然後我又download左無限遠程式。即係視野可以去到無限遠，果d天堂二既衛星地圖就係咁樣影出黎。

我係自己既亞丁盟屋，用無限遠將視野拉左去亞丁城外面既國立墓地，點左一下。然後由得佢跑……跑左三個字，收番條龍，果然直接穿左去國立墓地！！

之後又作不同嘗試，發現"計算結果"係無視高度。即係無論幾高，只要你有方法"跑去果到"，你就可以穿過去。所以穿牆唔單止可以穿牆，仲可以爬山。所以果排我成日穿上去各個屋頂，成個大盜咁。結果就俾班盟友話我無所事事！


研究完穿牆，我又練左兩打召喚師。係真係兩打，24隻，分3個account，分別叫teleport123。

目的，就係穿牆入各大練功地方、難入既地方、城鎮，分佈係世界各地。有冇睇過火影忍者？呢招叫飛雷神之術！

召喚師就係飛雷神之術既符咒，每隻召喚師練到學左"召喚戰友"或者"門扉頌歌"之後，就拎去佈陣。





奇岩城鎮放左一隻係武器店屋頂，一隻係飾品店屋頂，又係奇岩城堡戰場外既山邊放左一隻。

亞丁城鎮又係屋頂放左兩隻，城堡兩支一直申到出戰場外既塔上都分別放左一隻。

各大練功區每區我地都用大軍殺入去最深處，搵一個安全地點放一隻。

連理想世界既盟屋都穿左一隻召喚師入去。

果陣盟員想去邊到練功，基本上只要同我單聲就可以傳佢過去，仲快過撘的士，如果收番佢的士費我真係發過李+x。

而teleport123亦成為紅樹葉既福利。好似邪教神殿、沉默修道院六樓、諸神熔爐深處、地龍心等等識穿牆都好難入既地方，全部都有一隻召喚師係到。呢d高難度練功場所幾乎俾紅樹葉獨享。

直到我走左之後，teleport123就由咪嚕負責，依然係紅樹葉既萬用的士。

所以，我真係唔係日日都食飽飯冇屎痾，我地做盟主既其實係背左痾左幾多屎冇人睇到姐！