【真人真事】當年中七AL，我打左成年天堂二，但我無悔！: 外傳-放榜日

收到成績既一刻，我冇乜特別感覺。

AS 中化: B
AS 英文: D
AL 純數: D
AL 物理: F
AS 應數: D
AS 化學: F

令我感到意外既，唔係純數應數居然D左，係化學竟然Fail。





一直打緊既算盤就係物理由得佢，憑兩科AS食糊，靠純數拉分。點知純數D左，拉唔到分都算，化學仲要F埋，我連入大學資格都冇，真係一敗塗地，輸晒。

但係出奇地，我真係冇乜感覺。

拎完成績，仲同成班同學去左唱K，唱到夜晚先番屋企。

走果陣，阿紅問我：「你諗住點呀？」






「點知呀？」


我仲未諗到咁長遠既野。我既思緒最遠只係去到半個鐘後，點樣面對我阿爸。

阿爸不嬲唔係好管我，我懷疑佢連我今日放榜都唔知。但係我知道佢好緊張我成績，記得小學第一次默書唔合格，佢嬲到趕左我出門口，我係屋外面喊左兩個鐘佢先放番我入屋。

阿爸一下獅吼：「第時你升左去高雷我就掟你去美國由得你自生自滅！」

我又喊多次，猛叫：「唔好唔要我。」悽厲到成棟大廈都聽到。






自從果晚，直到而家我都冇乜點喊過。

番到屋企，阿爸問我：「考成點？」

我俾左張成績表佢睇，答佢：「衰左。」

我DUP低頭，等緊阿爸行刑。但係佢只係輕輕力，拍一拍我膊頭：


「唔緊要，你盡左力就得。」


呢一下拍膊頭，我真係好痛。眼淚不由自主咁滲出黎，我擰轉面唔想俾阿爸睇到，但係就連喉嚨都不受控咁嗚咽，我唯有入房捐入被豆，我真係唔想再俾佢聽到我喊。但係阿爸跟左入黎，一路拍拍被豆，好似呵BB咁安慰我：「香港既考試太難喇，幾十萬人得萬幾入到……」





我開始抖大氣，喊到抖大氣。原來要控制自己唔流眼淚唔喊出聲真係好難好辛苦，即使用盡全身既氣力都阻止唔到。我就係被豆入面，喊左唔知幾耐，一路喊，一路抗衡自己既眼淚，直到全身都冇晒力，朦朦糊糊咁就訓左。


第二朝醒後，我番開張被，阿爸就坐係我床邊。

「你醒喇？好D未？」

我拉一拉窗簾，陽光射入我眼簾，好刺眼。抹抹淚痕，吸一口氣，我回答：

「爸，我決定去美國。」

「你想去？」

「係，我想去。」