【真人真事】當年中七AL，我打左成年天堂二，但我無悔！: 36-終戰，offline

大伙插完旗就直衝入內廳。

呢次係一場賭博。前幾波攻勢，我地攻得入係因為理想世界既人力分散，但係今次理想世界已經有足夠時間集齊人馬，成敗係未知之數。

一踏入內廳，戰神、連戰既目標依然係平頭同蒼日，但係見唔到佢地兩個！？反而係一大群普通連+100武器都冇既騎士及弓手人牆，打算圍捕？

呢個算盤絕對打錯，+1000弓同+250防唔係人咁品，唔用+100武器圍係冇可能咁容影擊敗。二人連發"箭雨"，人牆慢慢倒下。但同時間戰神竟然都一齊訓低左！原來平頭、蒼日、亞格斯就夾係人牆後面，因為視線被擋戰神既見唔到又射唔到佢地，佢地就趁戰神用箭雨掃人牆時侯凸出黎偷打，完全同第一次奇岩守城戰入面戰神做既事一樣！

幸好我地將娃娃放左係陣地做補給，就算戰神死左都可以直接係戰場既陣地復活補buff，唔洗一分鐘可以番黎！





我都唔理咁多，趁混戰其間，換上係休息其間戰神借我既+16伊克魯斯重兵刃，立即開三狂斬人！旁邊既亞格斯首當其沖，開狂既葉攻擊力大增，係咁飲橙汁同亞格斯互斬，加上後面既主教小愛等人不停幫大軍補血，居然成功隻抽擊斃亞格斯！

後方+100巫師團係決戰中發揮左主導作用，因為理想世界呢班人就算攻有+100，防有+25，偏偏就犯左普通玩家最常犯既錯誤，冇加過飾物！換言之佢地高攻高物理防禦力，但魔法防禦力極低，巫師既群攻魔法一炮幾件，理想世界似乎抵擋唔到，主買+100武器而唔買防具果然係正確選擇。

呢個時候，咪嚕通報：「水晶塔已經爆晒！」即係佢地係城內復活要等8分鐘，根本冇時間，死番奇岩城鎮番黎仲快。

終於，時間仲剩6分鐘既時候，我趁人少，開左"勇氣加護"加強防禦力，不停飲橙汁衝入封印房封印，連戰戰神就係後面幫我開路。我衝上樓梯開始封印，同時間部份死番奇岩鎮既理想世界人員已經殺到，佢地唔等集齊人馬，邊個番生先就邊個衝過黎，但係人數多，竟然都成為一波攻勢！

我隱約覺得有少少唔妥。





外面既陣地已經被拆，封印房內就只有我一個人，聯軍死守封印室既門，死一個就係一個，已經係最後時間，但係我軍兩把+1000武依然屹立內廳。

突然間，靜心就凌空出現係我身後！


穿牆！！！！


封印室內得我地兩個人。女精靈連發兩下魔法，我就咁倒地不起。





果一刻，我完全唔識反應。

我好想即刻叫救命，但係我控制唔到我隻手指。

我心入面只有無盡既絕望，絕望到一個地步，大腦已經知道做咩都冇用，做咩都改變唔到。所以手指，以至全身，半點反應都做唔出，整個人只能夠呆坐係電腦前，望住螢幕，連大氣都抖唔到。呢種絕望既感受，刻骨銘心永世難忘，我到今時今日依然記得一清二楚。

普通頻道上，出現一句：

「我係地下室等左你好耐。」

地下室。竟然係地下室。就係當初亞丁城戰，我用creamyonion揀選用作預備穿牆偷襲既地方……

時間剩低四分鐘，連封印既時間都唔夠，戰局已經冇辦法改變。

橙色既奇岩頻道上，靜心宣佈勝利：「我地已經贏左，停手罷。」






………

我竟然輸左俾自己…

………


三聯幫同皇族等人幫完守城就走左，剩低紅樹葉入面一片愁雲慘霧。我都唔知點樣同佢地講，自己要走。

咪嚕係最先出聲：「大家開朗d，我地呢場戰根本係勢均力敵，只係輸左時機姐！下次就可以攻番！我地去打王出下氣啦！」

大家都六神無主，忽然間咪嚕話去打王，成班人就自自然然咁跟住咪嚕，游水去屠殺奇岩城鎮右下海上面果幾隻王。





暗殺一去到就衝前插隻王話：「仆街，插死你！」然後立即被麻痺定左格。大家都恥笑佢，唔換副職業，八十幾level走去插隻七十level王，當然會俾系統麻痺。

打下王，氣氛真係好番唔少。成四、五十人走黎打幾隻小王，其實大家都係旨在玩樂同發泄。

sm完，發完泄，我正式交待自己既離去，將盟轉手俾咪嚕。

然後就係奇岩附近既沙灘上面，唔理眾人有幾咁依依不捨，我正式offline。

血盟、攻城……所有野都唔再關我事。


-(待續)-