【真人真事】當年中七AL，我打左成年天堂二，但我無悔！: 27-GM黑房

奇岩lag爆機戰術，呢個咁異想天開既計策，靈感最初沿於狄恩攻城戰，一開戰就lag機。之後咪嚕一提，原來當時連唔係戰場既戰神都有lag！點解連唔係戰場既都會lag機？加個logo係攻守方既人名前，會唔會造成lag機？冇可能。

我判斷，唯一有可能造成全server lag機既，就係攻城戰開始一刻既npc重生，於是就有左呢個計劃。

結果明顯，我冇估錯。

但係仲有兩件事我未放心。

我同樹講：「唔好咁開心住，仲未叫嬴晒。」





小草on左msn，我即刻問佢：「你班保鏢有冇咩異樣？」

小草：「冇呀。佢地有問我洗唔洗落去幫手，我話放心相信阿葉啦，咁佢地就冇再問喇。之後我地一路都係到傾計，傾到岩岩斷線先冇傾咋。」

咁就好。小草等人坐既地方係奇岩城堡既停機坪，果個位置係井型，佢地只可以望到個天，睇唔到戰場情況，內鬼要打報告就必定要出計仔。既然小草話冇異樣，又冇人上黎殺小草，我選擇相信呢班人入面冇內鬼。

然後小草又問：

「阿葉，server好番之後會唔會仲係攻緊城架？」





呢樣就係我第二件唔放心既事。

如果係正服，即係官方既天堂二server，咁係攻城戰時斷線，on番line就會去左村莊。但係呢到係私服，而且唔係自己斷線，係成個server hang左機，我真係唔知on番line後會發生咩事。

我話：「唔知…希望唔會，我都好擔心。」

小草安慰我：「放心啦一定冇事既。」

結果私服一停就停左成兩個幾三個鐘，連攻城戰時間都過埋。樹一早就等到悶去左食宵夜，我唯有自己online先。





一上線，仲未出畫面，憑音樂既頭幾個音我就知道係奇岩城堡。係天堂二既世界，音速係快過光速，因為遊戲畫面太細緻，一般黎講都要聽下音樂幾秒先會load到個畫面出黎。但係今次有d唔尋常，無啦啦，唔知咩事，音樂竟然停左！等多兩秒後，我就見到自己身處一個圓型既密室入面，得自己一個人。

呢個地方，我認得。以前玩正服試過俾GM召去呢到傾計，我叫佢做GM黑房。

GM開始同我對話，只見其聲不見其人：

「真係估唔到你地守城會守到咁樣。」

葉：「哈哈，唔好意思。」

「由今日開始，攻城戰會暫時取消，等所有問題fix好先會再開番。呢段期間城堡既佔領血盟唔會改變。」

葉：「哇，多謝GM！」

「唔洗多謝，GM唔會參與任何玩家既衝突。今次只係因為攻城戰搞到server停機我先會暫時取消攻城戰。仲有冇其他問題？」





葉：「有，你班贊助玩家。果個平頭和尚，頭先打果陣用贊助武器打普通玩家，我地cap晒圖，係咪算犯規要回收武器？」

「我會向佢地作出警告。」

葉：「佢地唔係初犯架！上次亞格斯都試過斬我，只係我唔記得cap圖！」

「考慮一下我既立場。你地盟用bug洗錢我都只係每人罰100億了事，大家都有犯規，係咪想執正處理？」

我當堂打個突，咩用bug洗錢？100億？我連陰屍紙100億都冇喎！？
「咩bug？你講緊四大陵墓？果到明明理想世界洗左好耐喇喎。」

GM都好似打左個突，隔左一陣先覆我：
「你唔知情？」





葉：「知咩情？咩事？」

「你地既關係我唔想介入。你向你血盟既樹同周星星自己了解番成件事。攻城既相關事宜就係咁多，處分已經好公平，再見。」