【真人真事】當年中七AL，我打左成年天堂二，但我無悔！: 26-奇岩防守戰 (三)

………「全世界復活後即入封印室，用npc+人海block死封印室門口，死守。」
………咪嚕問：「然後呢？」阿葉答：「然後就係見証奇蹟既時刻！」

npc實在太多。破門一刻，npc一下子全部湧出，又放魔法又放箭，連我地企係後面既都lag左陣，何況係受攻擊既理想世界？打頭陣既幾位手持紅光雙刀既劍鬥士，雖然有+100武器，但防禦力唔高，一lag完就已經變成屍體，連點死都睇唔到。敵軍眾人立即後退，平頭和尚卻上前用綠光弓放出一發"火焰之鷹"掃向npc群，隨住一團火包圍既鷹飛過後，地上面就瞬間多左一團屍體。但係呢團屍體的確只出現左一瞬間，下一剎那堆成一壘既npc就散開，隨即又填滿屍體。

不過平頭和尚卻把握住呢一瞬間，一下走上前，懶理被一堆npc圍攻，一箭一件將佢地殺死。後方既巫師群亦起勢施群體魔法轟向npc大軍，火球、水爆周圍都係，npc既魔法同理想世界既魔法互相輝影，lag機者什眾。我望一望門口，已加入理想世界既as同靜心兩個人就企左係門口動彈不能，似乎係lag緊機。而聯軍眾人只以人牆堆係內廳後方，巫師、霸主、弓手等等遠程部隊不停使用各種咀咒同負面魔法。

理想世界既人不停受npc圍攻，好似開始火起，幾位高防既突然開始唔理npc，沖上前攻打人牆。明顯地，拖延戰術已經成功將佢地既buff時間磨清光，加上我軍專殺佢地既補師、娃娃而唔殺主力部隊，主力部隊根本冇時間番後方補buff。佢地再唔把握時間快攻既話，呢一波攻勢就玩完。衝上前既人員當中，當然包括換左一把+100弓既平頭和尚同換左+100雙刀既亞格斯，佢地幾位繼續任由npc纏身，向人牆不停攻擊。

但係能夠抵擋npc海既人員只有平頭、亞格斯、韓信等少數有贊助既玩家。雖然佢地不停攻擊人牆，但係盟軍不停補人，務求將整個理想世界lock死係大廳。盟軍既騎士輪流放出"鐵壁陣勢"，霸主不停用"阻絕封印"封鎖攻擊，後方又有小愛等人既主教不停施出"連鎖治癒"。一時之間，理想世界根本吹我地唔漲，完全攻唔破人牆！反而戰神夾左係人牆中間，用+1000既白光弓不停偷射亞格斯，結果亞格斯就算有吸血都補唔番，再次戰死沙場。





平頭見亞格斯戰死，開始著急，一下反手，換上一把綠光既弓，一箭就射向人牆！

「仆街佢一箭打我成萬七！」

「痴撚線架，+100都冇咁誇張掛！」

「我開左禦箭都俾佢秒殺……」

葉：「cap圖cap圖，記得咋咋臨cap低去。」





平頭和尚已經唔理贊助武器唔可以打普通玩家既問題，佢既心入面就只有攻破人牆！

雖然主教既回血光柱閃個不停，但係就算加上綠色既防護罩，似乎都抵擋唔到果把綠光藍電既伊克魯斯弓，連戰神都慘死！

眼見人牆遂漸失效，我心入面不斷諗，到底洗唔洗叫小草"救"？用狼來了護送，由小草直接入黎封印室封印，只要封印完，理想世界就會被踢去歐瑞城，然後小草再用"召喚戰友"召我軍入城，重新封印，呢個就係我既"back up plan"。

就係我猶豫緊既時候，一直觀察並計時既樹發出一句：

「夠鐘重生。」





盟軍聽罷立即沖入大廳，兩道光電傳送到樹操縱既霸主身上，霸主立即放出我地盟最後一個"不滅之火"，全體頓時處於無敵狀態！再過多幾秒鐘，大廳內，城門內既npc海同時重生，而同時間，幾乎所有理想世界同聯盟軍既人都聚集係大廳。一下子，全世界lag到定左格。

數分鐘後，出現《與伺服器連線中斷》。

「呼，終於嬴左...」

電話響起，係阿樹：「個server lag到死左，仲cap埋佢地犯規，大勝！」