【真人真事】當年中七AL，我打左成年天堂二，但我無悔！: 13-發展

靜心到底係觀戰定係警告？唔知。但係毫無疑問，理想世界已經開始注視我地。

由四大陵墓，到神級武器，每樣秘密都同佢地有關。佢地表面上係一個普通既大盟，實際上就好似係背後操縱緊呢個私服既影子政府一樣，而呢個影子政府終於都開始留意我地紅樹葉呢個羔羊。 

狄恩一戰後，寶寶龍就丟低左個盟，人間蒸發，從此冇見過佢。而寶寶龍既盟員亦因為咁而各散東西，主要俾理想世界同紅樹葉吸納。三聯幫因為只招香港人，所以冇收寶寶龍既人員。何況，當初寶寶龍就係同三聯幫嘈先，就算三聯幫肯收，寶寶龍既人都未必肯入。不過當日古魯丁屠城，雖然我地話係守城戰略，又話係以牙還牙，但事實上就斬到鬼哭神嚎天地同泣咁，老實講真係有點兒過份。莫講話要前寶寶龍既盟員同三聯幫和睦相處，就算要同紅樹葉本身既人和睦，我都有d擔心。

但係事實又証明，我既擔心好似係多餘。大家連續幾次打王、pvp大會(player vs player)，都好似冇乜事咁，仲可以拎當日既事講笑。其中一位行者，叫as，正正係狄恩戰偷窺陣地時比我秒殺果位行者。as似乎同各位特別友好。係紅樹葉三聯幫pvp大會，as成功插死阿葉，然後立即發表得勝宣言：

「果日被葉幾刀秒殺之後，我苦心修練技術，今日終於都吐氣揚眉！我要多謝爸爸、媽媽、……」





大家都講笑話as連盟主都殺，要替天行道收佢皮。

見到呢班人相處融洽我都鬆番口氣。

係呢段時間，四大陵墓逐漸成為紅樹葉間既公開秘密。除左莎莎隻霸主之外，靠樹新開既霸主，盟入面成功練出兩隊唔洗神武都可以係四大陵墓掃怪既團隊。血盟既成員漸漸有錢，等級亦飛躍上升，A頂級武器及S級武器防具開始遂漸成為盟內既主流，76級以上既三轉人數居然開始多過二轉。紅樹葉既平均實力開始漸漸提升，而其中一個最顯著最標致既差別，就係我換左件衫。

咪嚕、地獄、暗殺、soso、艾爾、莎莎等人夾錢買左一套s級入面最頂級既王朝重甲送俾我，總值接近180億！

咪嚕話：「你做盟主既，日日都不務正業，又唔搵錢，又著到爛身爛世，成何體統呀，快d著起佢啦。」





其次，就係周星星、樹兩個都各自換左一套王朝甲。我盟竟然有三件同戰神、亞格斯等人一樣既銀白色盔甲！薰既評價係：「型左好多喎！」

除左紅樹葉開始換裝備外，另一件真正既大事係血盟「日殺」加入左理想世界同盟。點解會叫「加入左」而唔係就咁「同盟」？因為個同盟名就叫做「大理想世界」，咁仲唔係叫加入左？日殺既盟主叫做"韓信"，係魔界分裂出既小盟之中較為active既血盟之一。active係我同樹既專有用詞，用黎形容會收新玩家，會興波作浪搞搞震既血盟。魔界分裂出既小盟當中，其實有好多都係唔active，最佳例子就係戰神既「皇族」，根本唔打算收新人，剩係俾佢圍內人自己玩。

我深知戰神係花生黨，完全non-active，特登問佢：「其實你有冇諗過發展下自己個盟？」

戰神九唔搭八地答我：「係咪想攻奇岩？我幫手。」

咁樣算係發展下自己個盟？