【真人真事】當年中七AL，我打左成年天堂二，但我無悔！: 93-Triple fake
紫幽唔想上線，唔洗問我都知道點解。
一個無得解決既原因；一個無可避免既命運。
由紅樹葉同理想世界開戰一刻起，紫幽就注定要被擺上台。
我唔煩佢。
到紫幽諗通左，自然就會上線，又或者……可能從此唔再上線。但係到時候，佢上唔上線睇怕都冇乜分別。
因為世界永遠都轉緊。
巨輪已經啟動，引擎已經著左。
星期一開始，連續幾日黎，紅樹葉都冇主動搶過王－－因為唔洗我地郁手，大綠等人有左teleport同+1000霸主兩樣道具後，更加恣無忌憚，幾乎廿四小時同理想世界鬥搶，冇人打既空王反而唔打，總之理想世界打邊隻就去搶邊隻。
壬生一族人多唔係白多，佢地係真係好多人，大綠吹雞鬥搶王，往往係一呼百應，呢一分鐘仲係得果四、五個壬生盟員，下一分鐘已經變成四、五十個壬生一族，再加上十數個抽下水食下花生既紅樹葉盟員，往往一吹雞就一下子就擠爆戰場。
但兩盟搶還搶，壬生一族從來唔會主動開拖打人，理想世界自上次守城戰後亦都表現刻制，而我地紅樹葉更加抱住食花生心態，連打王都heahea地，完全打唔成交。
只不過溫度明顯一直升緊。
由一開始兩盟只係搶大王札肯蟻后呢類大BOSS，到連一team人就夠打，冇神級寶物既街邊小BOSS都一樣照搶。
什至一次兩盟係傲慢塔頂鬥搶完巴溫之後，就立即穿牆由塔頂一直搶到塔底，十一層樓每層都掃雲，總之見王就搶，乜野"智天使"、"血之女王"等等全部都被掃清光。係一旁練功唔知情既玩家仲以為係大盟搞聯合掃塔，但我地雙方都心知肚明，呢場根本就係另類戰爭。
更什，掃塔居然變成每日例行公事。
樹心水好清，一早看破兩盟間虛假既和平關係：
「壬生一族只係因為紫幽冇批准先冇發爛，而家只差一個引爆點。其實只要我地係混亂間抽理想世界一下水，壬生同理想肯定會開戰。」
緊接樹既觀察，我立即回應：「唔好，我地唔好插手。」
樹：「冇話插手，只係發表下感想。」
「我既意思係，紅樹葉唔好插手，薰你星空物語同日殺仲係盟戰關係，係咪？」
星空物語同日殺既盟戰，自紅樹葉禁區發生後就不了了知，但事實兩盟一直處於盟戰關係，從來未停過戰。
薰反應卻好大：「係，但係你想點？想壬生理想開戰？你要點同紫幽解釋？我會話俾佢聽。」
我就係想佢地兩盟開戰，薰完全正確。
理想世界表面好似收歛左，唔再主動開戰，但事實上佢地依然掌管緊整個市場。縱使壬生人數再多，兩盟搶起王黎壬生一族始終都係輸蝕一方，因為對面火力夠，我地根本無乎。即使gm話所謂"插手"，都只不過係警告一下了事，完全冇任何實際罰則，什至由得光頭繼續拎住把+1500弓同+1500大刀，仲繼續比佢地佔領晒奇岩同亞丁兩個城堡。
gm插手既結果，就只有紅樹葉同理想世界既表面停戰，但雙方實力根本完全冇變。
實際上，而家三國鼎立既局面只不過係短暫假象。
憑住果一批月租既軍火，理想世界幾乎壟斷晒所有boss飾物及各種高階裝備，又同時霸佔晒兩個唯一有市場既城堡，壟斷晒整個私服既經濟。慢慢地，只要佢地不停累積財富同寶物，自然變成人人都有齊成套boss飾物，人人都有幾件+100武器幾套+25防具既，到時候就算理想世界斷租軍火，唔再贊助，都一樣可以保持獨大，然後就連gm都吹佢地唔漲－－唔通見佢地獨大就踢佢地出server？
「得個知字姐。」我回答薰。
當然唔係得個知字，我就係要個服有咁亂得咁亂，只要壬生同理想正式開戰，就係百人對百人大戰，私服將會無時無刻都充滿戰火，唔會有新人想加入，gm必需要認真正視問題。
只有gm真真正正插手，紅樹葉將來先會有立足機會，先仲可以擠身"三國"之列。
我係電話問樹既意思，點知樹話：
「我冇意見。細盟有細盟玩法，大盟有大盟玩法。反而你冇答薰問題，你要點同紫幽解釋？」
我諗一諗，答樹：「唔洗解釋。」
樹回我：「你諗你啦。」
我自然有我既諗法。
搶王，每日都發生，所以動手時機，同樣每日都有，但點樣可以佈置得完美，係一個問題。
因為一打人個名就會變紫，係一群白名中間，紫色名會顯得相當起眼，混亂間抽一下水冇問題，但抽水後點先可以全身而退，點先可以冇人知邊個係第一個抽水？
我又走去問樹，樹卻勁串咁答：
「諗緊多托咩，做得出唔怕認，直接用葉爆狂，見人就斬。」
「咁高調？」
樹：「你又去美國，又話唔洗解釋，諗咁多把鬼。」
「係姐…」
樹：「一係我開葉。」
「你開就直接用樹啦，戰神把弓仲係你到。」
樹顯然唔想，提出一個最公平既方法：「唔好煩，一齊，你爆狂，我射箭。」
「好，就咁話！」
我地兩個當場就決定，聽日搶王果陣，一齊發爛，直接向光頭開打！
樹最尾仲補多句：「都唔知你怕乜。」
我冇理佢。
翌日，搶王如常發生。
經過連日搶王戰，兩盟似乎好有默契，巴溫未出就搵人係傲慢塔頂等住。
一直等……直到巴溫石像憑空出現，兩盟就立即吹雞，各自召喚盟員。
瞬間傲慢塔就擠滿晒人，但係唔等人齊，煌已經跑到巴溫面前，觸發巴溫醒覺。
我一直監視住：「開波開波！」
兩盟依舊安份守紀，零交流各自打王，人數多武器又強，巴溫挨左幾分鐘就剩番唔夠一半血。
「幾時落手？」我問樹。
樹答：「睇住條血，得番少少我就數321，數完一齊打光頭。」
呢一刻光頭正在努力狂斬巴溫隻腳，我一早已經埋身係光頭旁邊，一齊斬巴溫。
我眼睛睇住螢幕…
左手不停按F3攻擊巴溫…
右手郁一郁離開mouse，移向電腦主機…
左耳同膊頭夾住部無線電話…
電話入面傳黎：
「睇住…
三…
二…
一…
殺！」
神經傳動，殺字一出我右手一抽，cable線瞬即脫離電腦！
聽筒卻大大聲傳入左耳直達腦部：「屌你fake我！」
「我斷左線！」
樹一眼睇穿我：「抆左線就抆左線扮乜野！」
我亦懶得反駁：「你有冇射光頭？」
聽筒傳黎既係單字一個：「屌！」
我非常心急：「打唔打得成？」
樹又以粗口回應：「自己上黎睇啦仆街。」
「我斷左線上唔到網呀。」
樹一副廢事採我既語氣同我講：
「咁你食屎啦。」
然後就嘟一聲cut左我線。
我都立即插番條cable線，以最快速度輸入id password，揀角式，入game。
……
真係心急如焚。
漫長既黑畫面，一直到我成功入到game，已經係五六分鐘後既事。
巴溫已經唔存在。
整個塔頂，空無一人。
我係同盟頻問：「大家人呢？我岩岩斷左線。」
小綠答我：「係下層打智天使呀。」
換言之，無開戰－－樹都一樣冇放箭。
我係血盟頻打：「屌，樹你咪又係fake我！」
樹冇答我，卻有另一個玩家"雨軒"密我：
「薰已經講左俾我聽，你想壬生同理想開戰？」
我一頭霧水：「你係邊個？」
"雨軒"冇答我，卻繼續自顧自說話：「算喇。如你所願吧。」
「你係紫幽？」
"雨軒"冇答我。
我回想一下岩岩發生既事，呆呆咁行落去下層，一直行，一直行，係十樓見到智天使既屍體－－我落兩層既時間居然仲慢過佢地屠一隻王既時間。
騎上座龍，繼續向下跑，跑到三樓左右終於見到大軍。
因為屠殺緊既小王"血之女王"只有68級，一眾高級人士必須換副職業先斬得，又用唔到神武，拖慢晒屠王進度。
我見到光頭就企係"血之女王"遠處，拎住黃光刀發呆－－佢85級破壞者，高隻王成17級，一埋身就會被咀咒石化，所以只能遠觀。
我望住光頭，又再諗一諗，心入面實在唔舒服。
二話不說，留下座龍，我向光頭衝過去，順手就係一刀！