【真人真事】當年中七AL，我打左成年天堂二，但我無悔！: 92-冷戰、冷戰
「屌！」
英雄頻道上面一個屌字，成為紅既絕響。
夕陽西下。
攻完城後，紅拋低一個屌字，從此再冇上過線，+2000王朝弓從此成為人們心中既傳說。
紅就咁走左。
紅樹葉失去一大戰力，理想世界對此卻冇乜反應。
成功守住亞丁後，理想世界冇再執後佢地既"紅樹葉禁區"，又將奇岩亞丁兩城稅率調為5％。光頭雖然依舊每日係奇岩搵人隻抽，但唔同既係，我地紅樹葉既人行過，佢就由得我地行過，雙方無對話無交流，如同陌生人一樣。
天下太平？
非也，只不過係冷戰。礙於gm出面，無可奈可既冷戰。
－－呢一切一切，顯然係gm插手既結果。
紅樹葉同理想世界，至亞丁戰後，就進入冷戰皆段，但暗地裡，另一場熱戰正在萌生。
星期一，單日，理應係理想世界食王日，但唔洗我地紅樹葉出手，大綠佢地一班人已經先下手為強，四出搶王。
係我地紅樹葉推波助瀾下，經過一場攻城戰，經過攻城戰既亂罵亂叫，感受過攻城戰理想世界所施展既無恥戰略後，壬生一族同理想世界亦開始交惡，接下來我只需要食住花生等睇戲。
大綠丁點兒情面都唔留，一決定要搶王，就連理想世界已經開打緊既札肯都一樣照搶。本來札肯開打後，外人就唔可以再入佢間房，但係有穿牆bug，要穿過大門有何難度？一發現札肯得番半條命，大綠就立即開炮搶王。
此刻，除左去搶王既人，壬生一族其他人分布於"諸神熔爐"及"邪教神殿"，兩個都需要用到穿牆先入到既地方，同理想世界搶練功點。
呢兩個地方既怪物可以回收到制作高級武防既必需材料，平時都係兵家必爭之地。
如果換成係紅樹葉同理想世界，一係見到對方係到就調頭走，一係就直接吹雞引發大戰。不過今日係理想世界同壬生一族……比著平時，雙方都會收歛，各讓一半各自忍讓，但今日一反常態，壬生一族既盟員直接開搶，反而理想世界既人卻四處忍讓。
大綠：「佢地讓就繼續搶！理得佢！」
而紅樹葉盟員，大部份聚係我地盟獨佔既地獄島奇美拉區練功。
只得我同樹兩個人，係奇岩發呆，靜觀其變。
局勢已經開始明朗。
壬生一族同理想世界，自攻城戰後開始遂漸升溫，理想世界無論有冇受到gm干涉都好，同時面對紅樹葉及壬生一族，除左攻城戰佢地可以靠贊助武防龜縮之外，其他大部份時間都只會對佢地不利。韓修修要打破呢個彊局，最理想既方法當然係放下身段，厚住面皮，等紫幽上線後，無視上次被紫幽鬧到一面屁，繼續同佢交涉。
所以理想世界對壬生搶王搶點，倒表現得幾客氣，札肯由得大綠等人搶，練功點又由得佢地搶。
但係紫幽一直冇online。
一直到札肯被大綠食埋，開始搶第二隻、第三隻王，紫幽都冇online。
一直等……反而係戰神隻"輸贏"出現先，咁岩我地就係佢旁邊。
我留意到輸贏手持一把小刀。
戰神一見我地，就打招呼：「嗨…唔好意思，琴晚有事唔記得左攻城。」
我冇回佢，只係按制表示想同輸贏進行交易，點知輸贏卻拒絕交易：
「唔洗還住，借住俾你地先。」然後戰神又對樹講：「換小刀打一場，我想玩玩小刀。」
樹欣然接受，換左把小刀二人就開始互斬。
既然輸贏唔收番三套贊助武防，咁我亦唔客氣，繼續keep住。
呢個時候，大綠已經搶完王，番左黎奇岩，向我地show off佢既戰利品，仲話：
「我地而家除左雙龍同巴溫食唔到，其他全部王幾乎都係搶住食。」
我自然明白點解得龍同巴溫食唔到。
其他王，例如札肯，只有60level，螞蟻皇后40level，要食呢d王就一定要用番低level人物，亦意味住唔可以用果堆s級既贊助武防，因為人物level太低用唔到神武。所以即使理想世界要食呢d王，都只能用+100既低級武器食，於是就有空間俾大綠佢地搶。但係巴溫既難處，在於岩岩好係375level，用滿級85level人物去打都唔會有石化罰則。所以理想世界可以贊助武器直接開火，打巴溫幾乎秒殺咁濟，仲邊有時間俾大綠佢地搶？
更何況，巴溫係傲慢塔十一樓，要打就要跑成十一層上塔，就算一收到風理想世界開打就立即飛去傲慢塔，你跑得上頂層黎巴溫已經俾人食左。
而雙龍，即係地龍及火龍，更加唔洗講。目前只有理想世界先有單盟屠龍既能耐，壬生要單盟食到龍，就必定要有"生命封印"，偏偏佢地只有+100霸主，+100既霸主要封印到雙龍唔係易事，放一百次都未必中一次。
但係以上兩個問題，我地紅樹葉都有辦法解決。
「我幫幫你吧。」
二話不說，我用密頻俾左兩個account俾大綠。
一個係teleport3，一個係樹既霸主"絕望的哀悼"。
「第一個account，入面有八隻召喚師，其中一個就長駐係傲慢塔頂，你可以睇實，一出王就即時飛去食。第二個account係霸主，用生命封印就可以龍。」我向大綠解釋。
大綠立即就答：「霸主我都有，但係放封印都唔中。」
我點大綠交易。
就係輸贏面前，我俾左佢把+1000伊克魯斯三叉戟俾大綠。雖然唔係法杖，但係+1000一樣會加增強武器既魔攻，呢把+1000伊克魯斯三叉戟既魔攻，實際上仲高過+500法杖既魔攻。
「用呢把夠做，俾霸主用，咩封印都會中。」
大綠冇問我呢把野係邊到黎，只係連忙稱謝。
「唔洗多謝，你每日打完王求其送d boss飾物我就夠。」
大綠打王打得多，身上一早有齊全套boss飾物，平時同盟員打完王基本上都係一蚊都唔要，佢只係純粹享受過程，呢個要求對大綠黎講一d都唔過份，佢回答：
「好。」
事就這樣成了。
壬生一族由呢一刻計起，終於有齊晒搶王所需既所有配套。
呢邊箱，樹同輸贏打左幾萬個回合，輸贏用既係+100小刀，身穿卻係一套迷之贊助防；樹亦一樣，用既係+100小刀，卻身穿+250贊助防具……
雙方平分秋色互有輸贏。
打完後，輸贏先係白頻問：
「亞丁結果點？」
樹答：「冇，佢地龜係封印室，邊有可能打得入。」
「冇任何計仔？」
樹倒問輸贏：「冇計，完全攻唔入，你有冇咩高見？」
「冇高見。不過我細佬話你地玩到好大，好奇問一問。」
我毫無禮數回佢一句：「講到尾都係你細佬姐，唔係你細佬，佢龜陣唔會咁有效。」
輸贏唔知咋傻定扮懵，打個哈哈答我：「嗯嗯最衰都係佢。」就打完場離開奇岩。
又得番我同樹兩個，係到發呆。
「有咩做？」我問樹。
「同我打鋪啦，我用刀仔。」
……
……
連續幾日，紫幽都冇on過line。
韓修修自然搵唔到人傾。
而冇左紫幽係到既壬生一族，就幾乎由盟內最有錢人緣最廣既大綠及小明二人完全掌控，幾乎人人都當左佢地兩個係副盟主一樣。呢兩個人從頭到尾都係主戰派，係佢地領導下，而紫幽又一直唔理既話，戰爭早晚會再爆發。
呢個結果，我同樹都樂意見到；紫幽唔上線，卻唔係我樂意見到既事。
我係msn問佢：「做乜成日唔見你？」
紫幽冷冷地回我：「唔係好想上線。」