《妳做咩將成碗譚仔倒落我個頭上面！？》: 第十七章(上)
由於伯母琴晚同我同芷翹一樣都係無訓過既關係，所以佢好快都話要去訓覺，即係要得番我一個人係客廳。
「拿，呢條係我地屋企鎖匙，你袋穩佢啊！」伯母臨訓前居然整d咁爆既野俾我嘆。
「嘩！唔洗啦姨姨！」我耍手拎頭。「咁貴重既野我唔要得架！」
「傻啦，我當左你半邊仔架喇！」伯母笑一笑。
唔係掛，雖然我成日上芷翹屋企姐，但其實我都只係見過伯母兩三次咋喎，咁快當我做仔？
「姨姨你咁信得過我？」我真心咁問。
「你係芷翹最中意既人喎，梗係信得過！」伯母好仁慈咁講。「而且，咪當係報答囉！」
「報答？」我心裡面十萬個不解咁諗。
「好喇我要訓喇，珞仔你自便啦，當自己屋企就得架喇！」講完之後伯母「砰！」一聲咁閂埋門就去左訓覺。
......算啦，都係遲下先去問芷翹啦。
二十分鐘後。
「睇怕伯母依家都同周公玩到第三局棋喇掛！」我笑左一笑，然後步向芷翹既房間。
雖然我係芷翹男朋友姐，但係就咁擅闖閨房始終唔太好架麻！
所以我......咪要等到伯母訓到隻豬咁先夠膽闖！
「咔察。」我小心翼翼咁打開芷翹既房門。
唔知點解明明自己都已經入過咁多次黎芷翹間房，但係每當一諗到芷翹係裡面訓緊覺既時候，個心就總會不自然咁卜卜跳。
我慢慢走到入去，就見到個個熟睡既小公主。
公主雖然喊到對眼有d浮腫，但係都無損佢天生麗質既容貌，仍然係楚楚動人。
我輕輕力咁坐左係芷翹既床邊，望住呢個可愛既美人兒。
我望住芷翹個陣，唔知點解心中所有煩惱都好似被清空晒，就連琴晚發生既事我都好似唔記得晒咁。
「傻妹，好對唔住啊。」我輕撫著芷翹既前額，輕聲咁講。
突然間芷翹好似feel到有人整佢咁，好驚慌咁瞪大左對眼！
不過當芷翹一見到係我既時候，就即刻放鬆左成個人，然後雙眼再次充滿淚水。
唔通芷翹係驚整佢個個唔係我，而係阿修？
「......珞仔？」芷翹好似仲未相信我已經出現係佢面前。
「芷翹，好對唔住啊。」我今次輕撫住佢既臉頰。「原諒我琴晚既幼稚，好嗎？」
「珞仔......嗚哇！」芷翹開始哭泣，然後整個人撲埋黎！好彩我勉強夠力扶住佢。「好對唔住呀......其實琴晚並唔係你好似諗咁架......」
一感受到芷翹既體溫同氣味，我既淚水竟然就不自覺咁湧晒出黎。
「我知道呀傻妹，」我緊緊咁攬實芷翹。「所以我先上黎搵你，希望聽你講出成件事既真相。」
「但係你要應承我，你以後都唔準再隨便dum低我唔理！」芷翹全身投入我既懷抱之中。
「無問題，我應承你，我司徒珞唔會再dum低呢個可愛既歐陽芷翹大少姐！」我笑一笑，然後咀左落芷翹到。
呢一吻可以話係包含住我既覺悟、我對芷翹既愛、同埋一種經歷考驗後既成功感。
我地擁吻左好耐、好耐，直至彼此有共識個陣先分番開。
「珞仔......」芷翹搣一搣我塊面，然後露出久違既笑容。
自琴晚以黎，我終於第一次見番芷翹既笑容。
呢個笑容真係好靚、好靚。
不過如果要搞到芷翹喊足咁耐先可以見到呢個笑容既話，我寧願唔要。
「芷翹！」我笑一笑，然後拉芷翹訓落張床上面。
我地蓋上被子之後，整個畫面睇起上黎就好似夫妻之間甜蜜相擁共睡既姿勢。
「咁......你準備好聽一個故事未？」芷翹依偎在我既懷中。
「嗯，準備好。」我堅定咁講。
***********************************************************************
芷翹視角篇
Hello大家好，我係歐陽芷翹！
我有一個大我一歲而且好靚女既家姐，我地兩個從小到大既感情都好好。
仲好記得家姐係小學個陣就已經有好多追求者架喇！
個陣我同家姐係讀同一間小學既。每逢小息、放飯、放學既時間，我都好中意走去搵家姐傾計。
但係幾乎每一次去搵家姐個陣，佢身邊都總係會存在住一堆莫名其妙既男仔，搞到每次我都要好辛苦咁逼入去。
無辦法啦，家姐睇起上黎個樣咁似女神蔣雅文，想無fans都難啦！
不過漸漸我就開始發現到，原來世間上任何事都有例外！
我有一日上去家姐班房搵家姐既時候，幾乎所有男仔又係圍住左係家姐身邊。
但係有一個坐係牆邊既男生，卻依然專心咁睇緊書，從來無理會過家姐，甚至無望過一眼。
「家姐啊，」有一日放學個陣我問家姐。「你班上面坐係牆邊個個男仔係邊個黎架？」
「嗯？！」家姐一聽到我既說話，居然臉紅起上黎。「做…做…做咩咁問既？」
「因為佢係惟一一個唔貪圖家姐你美色既男仔囉！」我笑住咁講。
「佢……佢叫做余永修……阿修……」家姐既臉越黎越像塗上了胭脂似的。
「哦！」我既大聲咁講。「家姐你係咪中意佢！」
「唔準咁大聲呀！」家姐連忙掩住我個口，然後四處張望有無熟人經過。
之後聽家姐講，呢個阿修好特別，因為佢唔似其他男仔咁成日痴住家姐，反而係靜靜咁坐係座位睇書，所以吸引左家姐既目光。
而漸漸咁家姐亦中意左佢，但係由於唔知點開口既關係，家姐一直都無搵過佢傾計。
「好啦，等我做媒人幫下家姐啦！」我心裡暗自下定決心。
某一日既小息，當我又好似平時咁上去搵家姐個陣，我留意到阿修佢坐左係個位到睇緊書。
於是乎我就走左埋去，一野拍落佢張枱到。
「砰！」我一拍落去，阿修就嚇到成個人震左一震，然後碌大對眼咁望住我。
呢個阿修既外貌端好、輪廓鮮明，望起上黎仲非常順眼，搞到我都淨係掛住望佢而唔記得左講野。
「咩事呢請問？」阿修好不耐煩咁講。「我好似唔識你架喎？」
我立即回過神來，然後同佢對望住。
「你唔洗識我架！」我怒睥住佢。「我家姐想識你咪得囉！」
我地三個之間既友誼，就係從呢個咁白痴既對話開始。
自從個次之後，我成日拉埋家姐去阿修既位置傾計。
一開始阿修唔會理我地，而家姐又鬼死咁怕羞，搞到淨係得番我一個人好似傻左咁係到自言自語。
好彩後來大家都開始熟絡起上黎。
呢段三人友誼浸淫左兩年之後，大家既關係已經唔只淨係在於hi bye frd咁簡單，而係可以熟到互相去大家屋企玩、甚至係一齊訓既程度。
感覺上我就好似多左個哥哥可以俾我依賴咁，都咪話唔爽！
不過有時我真係唔係好明，家姐明明都已經畫公仔畫出腸架啦，點解阿修咁耐以黎都仲未肯向家姐表白架呢？
唔得，過多半年左右佢地兩個就要升中架喇，唔可以再拖落去！
「修！」我地已經熟到連個「阿」字都懶得講。「我有野問你！」
「點呀芷翹？」阿修今日又上左黎我地屋企玩，不過家姐就出左去興趣班未番。
「我真係好想問你，點解你仲唔同家姐表白！」我好嬲咁講。「你明知佢只係等緊你開口架！」
「唔好玩我啦，你家姐咁靚，又點會中意我呢？」阿修笑起上黎都真係幾charm。「況且……我都唔係中意你家姐。」
「下？！」呢個真係天大既新聞！竟然會有男人會唔中意蔣雅文！
我好詫異咁問 : 「唔係掛？咁你中意邊個？」
「我中意……」阿修深吸左一啖氣。
點解……我有d不祥預感架呢？
「我中意你啊，芷翹。」
老實講，我真係唔知應該點做先好……原來阿修一直都中意我……
直接拒絕佢？唔得。咁做只會破壞大家之間既感情、關係。
你問我中唔中意阿修？其實我又真係無諗過，因為我一直都只係當佢係家姐男朋友咁看待。
結果，我格硬老屈阿修佢係係到講緊笑，然後我又係咁轉移話題黎分散大家注意力。
自從個次之後，我雖然表面上扮到咩事都無發生過咁，但暗中就一直同阿修保持距離。
因為我好想阿修對我死心，然後好好地去珍惜家姐。
***
又係一個平凡既星期六。
「你揀左d咩中學呀，阿修？」家姐佢地準備緊升中既野。
家姐咁問，好明顯就係想同阿修揀埋同一間中學啦。
「我揀左三間和尚寺。」阿修咁講，亦都好明顯係唔想家姐跟佢既選擇……
於是乎我趁家姐去左洗手間個陣，一野拉左阿修埋黎。
「喂，你真正係揀左邊間呀，好同我講喇喎！」我沒好氣咁講。
「我咪講左囉，我揀左和尚寺！」阿修都沒好氣咁講。
「你覺得你呃得到我咩？」我望住阿修。「我唔理呀，總之你一定要同我家姐讀同一間中學！」
「芷翹，你明知我淨係中意你架！」阿修望住我，眼神非常堅定。「咁點解你仲要不斷去撮合我同你家姐？」
「如果你係愛我既話，就拜託你，唔好再愛我啦，去愛我家姐啦，好無？」我誠懇咁講。
自從呢一次之後，阿修就少左上黎我地屋企玩，但反而就多左同家姐單獨出街。
去到最後，家姐仲同阿修升讀埋同一間中學。
其實我有時係到諗，阿修究竟係咪因為聽左我既說話，所以先走去選擇「愛」家姐架呢？
不過無論佢既動機係點都好啦，只要佢地能夠係埋一齊既話，我都會打從心底裡覺得開心。
起碼我唔洗再煩點樣去面對佢同家姐先啦！
***
仲好記得父母之間既感情問題，係家姐升中之後終於達到臨界點，最於亦逃不過離婚既結局。
自從父母離婚之後，我就跟媽咪搬左出去觀塘居住，而家姐就同老豆搬左去西貢個邊。
由於媽咪同老豆係處於「火星撞地球」既關係，我地根本唔可以好地地咁一家人出黎食餐飯。
所以家姐為左遷就我，就會選擇週末過黎觀塘呢邊陪我，而佢身邊偶爾亦會有阿修陪伴住。
阿修對住我仍然好似哥哥咁，令我重新感受到因失去父愛而失去既溫暖。
***
唔記得左係邊一日，家姐忽然剪左個男仔頭番黎！
我係咁問阿修同家姐究竟發生左d咩事，不過佢地兩個都好似好有共識咁唔肯同我講。
後來聽番阿修講，原來整件事既起因就係佢。
因為阿修違抗唔到自己既內心，所以就決定向家姐坦白，講出唔中意家姐既呢個事實。
家姐聽完之後笑左一聲，跟住就勁衝動咁剪左個TB頭番黎。
Er……就咁睇落，呢個結果……都算唔錯？
係個日之後，家姐同阿修就再無同單獨出街，反而係轉番做上番黎同我玩。
阿修無再向我提過D咩中意我既說話，而且仲開始同其他人拍拖。
唔通阿修已經明白道「別強求」呢個道理，所以決定放棄追我？
點都好啦，依家感覺上我地三個既關係終於番番去最初咁，家姐係家姐，阿修係哥哥，我係妹妹。
咁樣既關係真係唔錯，希望以後都可以維持住啦！
好快好快咁，我都升埋上中學Lu！不過我就無揀到家姐同阿修個間學校。
至於點解喇喎……就遲下先講啦！
光陰似箭，話咁快我就升中四。
有一個上學日既夜晚，阿修忽然打俾我。
「芷翹......芷翹！」係電話裡面既阿修半醒半醉咁講。
「阿修？發生咩事呀？」我不解咁講。
「我好想見你呀！」阿修情緒好激動咁講。
「你冷靜d先！」我安撫住阿修。「你係邊呀，我黎搵你啦！」
「我……我係你樓下間譚仔……」
於是乎我連衫都無換，就咁係屋企衝左出譚仔。
落到去，我就見到阿修坐左係一個角落。
「修？」我行左過去，然後拍一拍佢膊頭。「做咩呀，又同女朋友散左呀？」
我之所以講個「又」字，係因為阿修自從開始拍拖之後，幾乎每個月都有唔同新菜色，中日美法俄咁款。
「嗯……」阿修個樣似係岩岩飲完酒。「芷翹，不如陪下我？」
「哦……好呀。」
算啦，妹妹陪哥哥分擔下傷感，都係好應份既。
我地叫左野食之後，阿修旁邊忽然黎左個著住我校校服既男仔。
呢個男仔好似死老豆咁款，個樣勁頹勁廢，望落去sad到乜咁。
我諗佢應該都同阿修一樣，係失戀架啦。
「女死女還在呀，俾人飛咋麻，有幾閑！」我笑住咁安慰阿修。
依我記憶，阿修都係好似係頭一次因為感情失意而喊成咁。
睇黎飛佢個個女仔一定係好正定啦。
「芷翹，我唔係俾人飛架。」阿修望住我，個樣好堅定咁講。「其實由第一次拍拖到依家，每一次都係我飛人。」
「下？」我又唔係好明喇。「咁點解你仲要借酒消愁？」
「因為我傷心既原來，唔係因為分手呢件事，而係因為分手既理由。」
「下下下？」我十萬個不解。
「我每一次同d女朋友分手，其實原因都只有一個。」阿修望住我，雙眼似乎有一種說不出既曖昧。
「原因就係，我發覺我愛既仍然只有芷翹你一個。」
我望住阿修，半晌也說不出話來。
原來阿修一直都未放低我？但點解佢又好似扮到咩事都無咁繼續同我做朋友既？
「我知道你唔中意我，我知架。」阿修似乎又面臨情緒崩潰既狀態。「所以為左可以繼續留係你身邊，我只好壓抑住自己既內心。」
「我去搵其他人拍拖，其實都只係為左分散自己對你既愛意。」
「但係我已經忍唔住喇！」阿修稍為激動咁講。「我覺得我必須正視自己既想法。」
「但係……咁樣都大家都無好處架……阿修……」我實在唔知道點樣俾反應佢好。
「我明白……」阿修望住我。「但係我真係好辛苦呀……不如，芷翹你做我一日女朋友呀？一日就夠架喇！做完我就會死心，以後都唔再提呢件事，大家變番以前咁！」
「唔得。」睇黎我唔可以再優柔寡斷咁對阿修架喇。「阿修，拍拖唔可以係咁架。拍拖係需要互相愛大家先得，唔可以當係一個借代，唔可以當係一個工具，更加唔可以當係一個交易。」
「我今次就認認真真同你講，我由此至終都只係當你做呀哥，除此之外就再無其他情感。」
「不過我真係唔想無左你呢個呀哥，所以今日既事就當粉筆字咁抹左佢，大家做番以前咁，好無？」我真心咁講。
「你真係唔想無左我呢個哥？」阿修講。
「嗯。」
「咁如果你唔肯做我女朋友既話，我就會令你無左我呢個呀哥！」阿修似乎已經俾酒精搞到無晒理性。
唔係呀麻……d野調番轉黎講既？！
「修，唔好咁蠻不講理啦好無！？」我都有少少炆咁講。
唉，究竟我可以點做？
唔通真係要乖乖就範，做阿修一日女朋友？
但係我真係接受唔到……
而且一咁樣做既話，我地既關係就會變質……
「係你逼我架咋芷翹，」阿修醉醺醺咁突然奸笑左一下。「其實我知道你家姐根本仲係中意我。」
「如果你唔肯做我女朋友既話，我就玩鳩你家姐！」
「咩……咩話？！」我簡直唔能夠相信，同我認識左咁多年既阿修，居然會咁下流無恥，玩到威脅親人呢一招。
「你唔好亂黎！」我開始扯火咁講。「信唔信我同家姐講呢件事呀拿！」
「哈，你咪講囉！」阿修仿佛好似已經抑壓左自己好耐咁。「你家姐做tb呀其實都係因為唔想同男仔拍拖住咋麻！」
「佢好想將佢同男仔既第一次拍拖俾我，所以先走去做tb！」
「如果我話中意佢，肯追佢？佢仆過黎都仆唔切啦！」
「你！……」我被阿修既說話搞到不知所措。
阿修……你真係呀阿修？
點解一個人既思想可以變得咁極端？
「唔只添呀……」阿修再笑一笑。「如果你唔同我一齊既話，我就要扑埋你家姐，令到佢生不欲死！」
你唔係我識既阿修！
我識既阿修唔係咁架，佢係好友善、好體諒我，而唔係威脅我、強逼我……
我唔準你搞家姐呀，賤人！
「食屎啦你！」我對阿修呢一次既出言侮辱實在係忍無可忍，於是乎隨手攞起左一碗譚仔，一野掟出去。
呢一下，除左係斷送左碗麵之外，仲係斷送左我同阿修多年黎既感情。
當阿修講出剛才個d說話，然之後我扔湯麵個陣，就意味住彼此既關係已經無得番轉頭。
湯麵並無扔中阿修，而係不偏不移咁落左係阿修身旁既頹jer男仔既頭上面。
阿修望住我，雙眼瞪得勁大。
呢一個眼神，既係惶恐，又係失望。
我諗，大概阿修都估唔到我有咁大反應。
我既淚水隨住湯麵擊中左個男仔既一刻開始就源源不絕咁落下。
你問我做咩要喊？想喊咪喊，邊有得解。
「我唔會做你女朋友架，一日都唔會。」我冷冷咁講。「你死心吧啦。」
「痴線！」阿修已經變成一個陌生人。
佢勁大力咁拍左下枱，然後企起身怒視我講 : 「淨係識得係到玩暴力，蠻不講理！」
講完之後，阿修頭也不回咁就走左。
阿修其實都講得好有道理……
如果當初我選擇左做佢女朋友，咪咩事都無囉！
大家仲會好地地咁相處，而唔洗搞到如斯田地……
依家我可以點呀……
無左老豆我已經好辛苦架喇，唔好再要我無埋我認識既阿修哥哥啦，好無？
我坐左係凳到不斷喊、不斷喊。
唔知過左幾耐，忽然有一把聲音叫喚我。
「小姐，走喇，你唔係想咁多人睇住你喊下話？」
我地既邂逅，就由呢一刻再次開始。
眼前呢個男生，讓我總有一種說不出既安全感。
於是乎我地就走左去隔離既韆鞦傾計。
「我叫芷翹，今年中四，就住係對面大廈。」我自我介紹道。
「喂小姐，你係喊short左個腦呀，竟然同一個陌生男仔講自己住邊？」個男仔沒好氣咁講。
係喎，我就咩要講出黎！
之但係無理由同佢講我天然呆所以講自己地址出黎下話？
等我求其作個理由先！
「下？！係喎……哈哈，唔好意思，因為近排俾警察查身份證查得多……」我扮晒野咁講。
哈哈！呢個理由真係夠晒平凡唔造作！
我真係一個天才！
「算啦，係咩都唔重要。」男仔仍然係冷冷咁講。「你無既話，我走先。」
唔好呀，我唔想再有人離開我！
「唔準走！」我大叫。
「你係咪痴撚左線呀？我同你三唔識七仲要俾你淋湯麵都算喇，依家竟然命令我！？學頭先條仔話齋，你都真係好蠻不講理。」男仔眼角稍為斜望著我，冷淡咁回應道。
我痴線？
嗯，或者，我真係痴線。
有時真係係到諗，與其因為身邊既人離開我而傷心，不如就調番轉，我離開佢地先，咁咪唔會傷心。
「算喇，我死左佢算喇！」我叫左一聲，然後向馬路奔去。
一輪胡鬧過後，我赫然發現自己攬住左呢個男仔係到喊。
呢個男仔陣味……好香。
「對唔住……我……我唔係咁隨便既女仔黎！」我一野彈番開，怕羞咁講。
「對咩唔住呀，」男仔笑說。「反正蝕底既又唔係我！」
佢望住我，好溫柔咁講 : 「我叫司徒珞，中五，住係對面個山頭綠色個幢。」
我望番住佢，一粒字都講唔出口。
因為，實在太多太多野想講。
是你手，把哀愁驅走，溫柔多細膩。
由呢一日開始，阿修就由我生命中消失左。
應該係話，佢由我同家姐生命中消失左。
佢再無搵過我同家姐玩，亦都無再覆過我地任何wtsapp，接過我地任何通話。
我唔知道阿修係因為內疚先咁做呀，定抑或係因為憤怒先咁做。
不過無論點都好，我都只係想要番以前既阿修。
如果佢仲係好似譚仔個日咁既話，我寧願無左呢個好朋友、好哥哥。
另一方面，我都珞仔既感情都不斷培養起上黎。
我地經歷過甜蜜、苦澀、酸溜、辛辣等等既風浪之後，最後終於能夠係埋一齊。
雖然拍拖之後既路仍有波折，但係呢d波折反而成為左我同珞仔既回憶，為我地既感情打下一支又一支既強心針。
直到……情人節後一日，亦都即係我生日前一個月。
「家姐！」我打俾家姐。「今年生日我同珞仔過就得喇，你唔洗陪我！」
「芷翹呀……」家姐似乎有難言之隱。「你今年既生日，可唔可以讓俾我？」
「點解既？」
「因為……阿修話想見你，親口同你講聲對唔住。」
「佢已經知錯架喇！」家姐替佢講說話。「佢已經講晒所有野俾我知。」
「你肯定佢知錯？」
「嗯！」家姐好肯定咁講。「佢仲已經俾晒錢預訂左四個自助餐位，諗住係你生日個陣同我、你、佢、媽咪一齊食飯聚一聚！」
「咁即係我已經無唔應承既空間啦？」我苦笑一下。「嗯……好啦，反正半年無見，我都想知佢改過自新左幾多。」
於是乎我決定係見阿修之前首先向珞仔坦白一切。
好可惜，「時不逢我」。
首先，第一樣野就係珞仔要應付一個大型公開藝術比賽，所以我都唔想呢個時候俾佢知道我要見阿修，免得佢為左陪我而放棄呢個咁好既機會。
然後，第二樣野就係珞仔近排唔知做咩成日唔見人，就算見到面都傾唔夠兩句傾，想傾耐少少又會遇上唔同阻滯，搞到我完全無心機講落去。
算啦，既然係咁既話，不如就以後都瞞住珞仔，唔俾佢知道「阿修」呢個人啦。
「……阿修，hello。」
「芷翹，生日快樂。」
係我生日呢一晚，我再次見番阿修。
佢既樣終於變番我認識既阿修，而且一路傾計個陣佢都好似以前咁好溫柔、好善良，成個大哥哥咁。
不過臉色睇起上黎就係好似多左一分蒼白咁。
食到就黎完個陣，大家都開始講起一陣做d咩好。
「我約左班師奶打牌！」媽咪講。
「我約左朋友唱k！」家姐講。
「咁……我番屋企先！」我講。
「咁，我送你番屋企好無？」阿修講。
睇黎，佢係想親口同我講對唔住。
好啦，俾個機會你反省下！
「嗯……好啊！」我笑一笑咁講。
於是乎家姐同媽咪就走左先，而我就先去左個洗手間，再準備番歸。
「咦？！」一出到黎我就發現唔見左部手機。
「修，有無見過我部手機？」我問。
「有啊，咪係我手上。」阿修攞出我部手機。
「你幫我睇住啊？唔該晒！」我伸手想攞番部手機，點知阿修縮一縮手，搞到我撲左個空。
「你想點？」我唔係好明阿修想做乜。
「我想係送你回家既呢一程上面，你做我女朋友。」阿修溫柔咁笑一笑。「如果你願意既話，我就會係送到你樓下個陣俾番部電話你。」
咩話？！枉我仲以為阿修你已經改過，原來仲係咁賤格！
「無論以前又好宜家都好，我都唔會應承你架阿修，哪怕只係一程既時間都唔可以！」我好嬲咁講。「我對你好失望呀，阿修！」
「今次唔同d架，芷翹。」阿修仍然維持住個個真誠既微笑。「過埋今日，我可能以後都唔會再見到你架喇。」
無論我點樣問阿修，佢都唔肯講自己咩事。
「總言之，我好想為我生命留下一個美好既回憶。」阿修既雙眼竟然充滿住淚水。「成全我啦，好無？」
結果，我一時心軟應承左。
番屋企既路程中，阿修都緊握住我隻手唔放。
佢捉得好實、好實，仿似鬆少少都怕我會離開咁。
係呢段路上，我既擔心阿修，亦有D對珞仔內疚。
不知不覺，終於走到我屋企樓下。
「到喇，可以俾番我未？」我伸出手板，示意阿修俾番部手機我。
「可以喇，拿。」阿修攞出手機放落我隻手到。
突然間，阿修一野拉我埋去，然後咀左落我額頭上面。
過左一陣，阿修徐徐縮番開。
正當我想向阿修問責點解KISS我個下，我眼角處掠過一個熟悉既人影。
我重新回帶到剛才既人影上面，雙眼頓時瞪大。
「……珞仔……」
最後珞仔無聽我解釋就離開左現場。
我唔知道珞仔點解會係到，或者佢係想俾個驚喜我？
無論點都好，係我破壞左彼此既誠信。
我一路喊一路喊，都唔知喊左幾耐。
到我有番D意識個陣，先發現自己已經係間房到，而阿修就坐左係衣櫃下休息緊。
點解……阿修個樣睇起上黎好似好辛苦咁既？！
「修？」我哽咽咁講。「你無事呀麻？」
阿修仿似回復番D意識咁望住我，然後指一指佢衫袋。
我走過去一抽出黎，發現係一包藥。
雖然我唔知發生咩事，不過佢要食藥呢一下我都係知既，唔似得TVB個D廢劇咁竟然仲要問個病人係咪要食藥。
我即刻斟左杯水俾佢送藥。
再過多左十幾分鐘，佢個樣終於正常番。
「你其實有咩事呀！」始終我同阿修識左咁耐，我一早已經當佢係親人咁，我實在唔想佢出咩事。
「放心啦，我無事。」阿修似乎真係唔想講。「總之，今晚好多謝你。岩先我又意氣用事左D，搞到你同你男朋友咁，真係好對唔住。」
「嗯……算啦。」一講起珞仔，我又想喊了。
「放心啦，我知道佢會黎搵你。」阿修笑一笑。「佢唔會忍心一個咁可愛既女仔係到喪喊既，係咪？」
「嗯……」我點一點頭。
「所以你都係快D訓覺啦！」阿修為我蓋好被。「如果咪無精神向你男友解釋成件事架喇！」
「但係我首先要知道你發生咩事先！」我唔甘心咁講。「我好擔心你呀阿修，你岩先食個D咩藥黎架！」
「個D藥？放心啦，暗瘡藥黎架咋，哈哈！」阿修行番去衣櫃邊。「如果你真係想知道既話，得！只要你依家乖乖地去訓覺，咁訓醒左之後我就會同你講。」
「你講架！」我鼓起腮。「你唔準再反口，唔準再唔守諾言，唔準再呃我架！」
「得！我余永修應承你！」阿修舉起左隻大姆指。
由於我其實都真係好眼訓既關係，竟然眼前一黑就訓著左。
「芷翹，再見喇。」係睡得朦朧既期間，我隱約聽到阿修既聲音。
「芷翹，好對唔住啊。」突然間，又有另一個聲音從我耳邊傳黎。
呢把聲……係珞仔！
我一瞪大雙眼，就發現珞仔坐左係我床邊。
「珞……仔……？」我簡直不能置信。
「芷翹，好對唔住啊。」珞仔笑住咁輕撫著我既臉頰。「原諒我琴晚既幼稚，好嗎？」
「珞仔呀嗚！」我再也按捺不住自己，直接攬落去。
阿修，又話等我醒左之後同我講咩事……你又呃我。
*******************************************************************