《妳做咩將成碗譚仔倒落我個頭上面！？》: 第三章(上)
「唔知呢，可能係見到靚女怕羞掛！」
「嘩！文青蛻變左做靚仔之後，連講野都『零舍不同』(用普通話讀) WO！」阿娜放低書包，然後坐左係我隔離。
的確。係中四開學之後，除左日日俾人讚靚仔之外，仲多左好多人同我傾計。係無限既吹噓之中，我既虛榮心不知不覺間出左黎，變得比以前更有自信，連以前無可能講得出口既說話依家都變得易如反掌。
「我又無話個靚女係你。哦！原來有人係自戀狂！」
由於要秘密進行呢個暑期減肥計劃，所以我雖然成個暑假都同住阿娜WTSAPP，但就係忍住唔約佢出街。
開學既前一晚，我打左俾阿娜約佢開學日去M記食早餐，諗住俾佢一個驚喜，等佢成為第一個見到「全新的我」既人，然後睇佢出晒水……咳咳…… O晒嘴個個樣。
佢鬧我古古惑惑唔知搞邊科，但都係應承左。
之但係預期既野，同事實總有出入。
個日朝早，我企係門口執正晒個樣，先走左埋去拍一拍已經坐左係M記既阿娜，然後指住自己個樣話 : 「Surprise！」
佢拎轉頭望到我之後，對眼碌大左少少，但就好快變番平時既笑樣，然後對住我講 : 「嘩你係咪去左韓國整容呀，靚仔左WO！BTW咁就係Surprise啊？你最起碼都去完韓國買個手信番黎俾我，咁先叫Surprise架麻！」
車！都唔係我構思既畫面咁既！
不過唔靠美醜樣黎睇人既，先係我認識既阿娜黎架麻！果然，阿娜佢唔同其他港女，出淤泥而不染、濯清漣而不妖！
「喂做咩望住我發呆WO，快D去叫野食啦，就快遲到喇遲到王！」阿娜一手幫我攞住左個書包，然後推左我背脊一下。
「咁究竟約我放學係未知所謂何事呢司徒先生，唔係就係想我聽你花言巧語下話！」阿娜右手托住下巴挨左落枱面，對住我奸笑左一下。
「咁……咁不如你估下！」我用左手托住下巴挨落枱面，個動作就好似阿娜既一面鏡咁。
我同阿娜雙眼對望，成個情景睇起上黎好搞笑又好溫馨 ; 加上面對既係「人如其名」嫋娜娉婷既阿娜，令我心跳開始不自然咁加速。
「我估……唔通……你想問我借錢！？我無架！」都唔知阿娜係真傻定假傻咁回應我 : 「不過好似依家咁樣放左學之後兩個人留係班房既畫面，我就淨係諗番起早幾日阿風又係咁約我，之後同我表白咋！」
咩話！？又係個個籃球界張智霖？佢唔係俾阿娜拒絕左架喇咩，乜原來仲一直係度死纏爛打！
「下點解我唔知架！日日同你WTSAPP都唔見你提過既，學校裡面又收唔到風！」唔知點解，我竟然覺得阿娜會應承左阿風，所以好激動咁雙手捉住左阿娜對手 : 「阿娜！你無應承到佢啊可？」
「你咁大反應做咩WO！」阿娜既語氣帶住一份喜悅，雙眼望住被我捉實既雙手，臉上微微泛紅 : 「咁……咁不如到你估下！」
「我估無！啊唔係，係唔洗估一定無！」我將阿娜雙手捉得更緊。
同阿娜認識以黎既呢一年半載裡面，雖然聽過好多身邊既人話佢眼角高、唔會睇上我呢D氣餒既說話，但係我大多一笑置之。
因為我硬係有種感覺，覺得阿娜對住我同其他男仔係有少少唔同。
***********************************************************************
阿娜求其係枱面攞起左枝筆，然後捉起左我隻右手，係掌心寫低左8個數字。
「拿，呢個就係我既電話。如果你有一日係學校飲晒D水既話，就去A班叫我斟啦！我願意接受吩咐架，哈哈！」
唔知過左幾多晚既心理掙扎之後，我先終於敢WTSAPP佢。
「喂，HELLO！」
「點啊司徒珞先生，咁夜搵我斟水啊！？」
「你點解會知道我個電話號碼既！」
「要搵你電話號碼有幾難啊，你咁出名！況且……我仲要等你吩咐架麻！」
從此以後，每日同阿娜通訊已經成為左我既習慣，風雨不改。
再之後，我就開始約佢出街。當然啦出到黎我地都只係好似普通朋友咁行下食下。
但係偶爾既推推撞撞、打打鬧鬧，都已經係不知不覺間拉近緊我同阿娜既距離。
「如果要我揀既話……我個人就比較中意阿珞咁既男仔。」阿娜雙眼躲避我既目光。
中三復活節假期，學校為我地一班學生領袖舉行左個兩日一夜既長洲訓練營。
所謂既學生領袖，其實就係幫學校爭光既棋子。以畫筆為學校帶黎過一班記者採訪既我，就梗係一早俾校長踢左入會。
而運動出眾既蛋撻同音樂女神阿娜都係其中一名成員。
係漫漫長夜裡面，十幾個人當然就梗係堆埋一堆玩「誠實與大膽」。
「嘩！你咁樣算唔算係表白呀？！！得米囉阿珞！」蛋撻一手推左落黎，搞到我撞左落旁邊既阿娜身上，令到佢差D跌左落床。
我即刻用左手跨過阿娜，拉番佢番黎。
「喂咁你問呢D問題要阿娜點答姐，呢個情況下梗係揀個最熟既黎講架啦！你話係咪喇，阿娜？」我左手依舊放左係阿娜左手手臂上無放開，然後望住佢，就好似一對情侶先會做既親密動作。
「咪……咪就係囉！」阿娜一臉尷尬咁講，視線亦都轉左埋黎，同我緊密咁連接住。
我隱若可以見到佢嘴角上揚既表情，同埋視線間多左既一份曖昧。
***********************************************************************