大學可以幹的事很多，但不包括走堂: 唔chur唔知身體好
凌晨二時。
我問道：「Ron，會唔會我地一直都估錯左，唔係平行時空。」
「嗯，平行時空都係假設黎。因為實在無理由兩個人都坐係同一個位上，完全唔合乎邏輯。有其他時空既可能性都唔高。」Ron不是一個不說道理的人，這是我和他很投緣的原因。
但若果不是平行時空，那又是甚麼呢？繞了一個大圈，問題又重新回到起點。
由今早上課到現在奔波了整整一天，腦袋的功能開始停頓，無法再思考這道複雜的難題，我們五人只好繼續呆坐在特別室01內，時間一分一秒流逝......
....突然有種急速向下墜的感覺，嚇得我急忙張開眼。原來我不小心睡著了，醒來的時候，是凌晨三時左右，特別室01的燈已關掉一半。
環看四周，最先看到的是Tommy。Tommy嘛......他十之八九是橫豎沒有事可以做，就排好三張椅子，在上面睡著了。
Hazel也進入了夢鄉，睡姿卻比Tommy好多了。嘴唇張開了一點兒，頭俏俏傾斜，烏黑的長髮因此俺蓋了小部分面孔。
Ron垂頭喪氣的坐在一角。低著頭，雙手合作祈禱狀。而且幾乎一動不動地維持著這個動作，看起來也是睡著了。
Shirley坐在特別室01內靠窗邊的位置，右手托著下巴，身子倚在窗邊。雙眼仍舊很精神，注視在窗外的不斷被狂風打擊的樹葉。
很靜，世界只剩下空調的聲音。
或許我離開椅子時發出的聲音太大，把Ron吵醒了。他抬起頭，看到是我，便問道：「Kevin你訓醒喇？」
「係啊 ，頭先累到不知不覺咁訓著左。我係咪嘈醒左你？」
「唔係，我都冇訓到，我係度諗緊野。Kevin，如果有機會知道晒佢地發生咩事既話，你同Hazel會唔會願意一試？
「係咩方法先？」
「方法當然係走堂。」Ron斬釘截鐵。
「我冇聽錯丫嘛，走堂？」
「對，我地冇辦法分身，上緊堂既我地係唔會見到其他人做緊咩，惟有走Professor King既堂先有可能知道其他人去左邊。」
「我唔想走Professor King既堂。」
「你第一堂咪走過囉。」Ron嘲諷我。
「第一次我個鬧鐘唔知點解鬧唔醒我，意外黎，之後我都準時上足晒堂。之後我覺得Professor King係一個好既教授，所以我決定左今個sem唔再走佢既堂。況且走堂咪好似Tommy咁，如果冇我地係度提醒既話，佢去左第二個世界都仲係懵然不知。Ron，呢個唔係一個明智既辦法。」我反駁道。
「係囉，你之前咪話過唔好一齊去，要有人係呢邊照應住。」看著窗外的Shirley原來一直有聽我們的對話。
「我係有咁講過，但係我發現係呢一邊，根本做唔到啲乜野。間房又有伍凱利係度睇實，所以......」
「即係...你會唔會覺得咁做太魯莽？如果呢度真係再冇人話番比我地聽既話，我地就一世都唔知自己去過第二度。」突然我腦海想起一些事情。「你想講《綠袖子》可以幫到手？」
「對，我頭先就係諗緊解決進入第二個世界前既記憶失踨問題。」Ron用食指托一托眼鏡。「Tommy同Shirley只係唔記得前半部分，後半部分上課情況既記憶則冇唔見到。不過後來佢地一聽到《綠袖子》就記番起部分既斷片。所以，
我個計劃大概係咁：星期四，十一月五號我地唔去上Professor King個堂，咁理所當然就會被捉到去『平行世界』上堂，而伍凱利亦冇可能從中破壞。」
「係。」
「去到個日既傍晚6時正，預先較定既《綠袖子》個陣就會響，咁自然就可以回憶番岩岩做過既野。」
「幾好喎，Ron果然醒目，諗到可以我地自己喚醒自己既記憶。」Shirley對Ron豎起了一隻大拇指。
我打斷Shirley的說話：「咪住，我又突然醒起啲野。唔好忘記，就算有記憶，下個禮拜一照樣會比另一個世界所吸引。」
就像今早Tommy和Shirley的行為一樣：無意識地被吸引出課室。
「丫係喎，點解我一直都冇諗到，果然個人太累就好易出錯。死火，又要重頭再諗過。」然後Ron用拳頭敲一敲前額。
「哈哈，咁又唔使重新諗。既然《綠袖子》可以喚醒記憶，我諗當我地星期一被『吸引』既時候播《綠袖子》都可以喚醒番我地。」
Ron和Shirley的目光轉過來向著我，一臉「so de su ne〈原來如此〉」的模樣。
我沾沾自喜：「所以個鬧鐘應該較係下星期一既上午9時30分。其實星期四個次都可以照聽，不過係知道晒所有野後要等成整整三日，我就最討厭等待個種感覺，好似等死咁。跟住仲要聽兩次《綠袖子》，就算未親身試過，淨係諗我都
毛管棟。」
「我都好討厭，上次聽過一次我一直都有陰影。我好佩服Tommy肯聽第二次。」可惜Tommy在熟睡狀態，聽不到這句話。
Ron道：「咁我都係跟大隊吧。」
我接著說：「所以星期一九點半個陣就重要喇，個結果成唔成功就係睇《綠袖子》播放呢一刻。呢樣就係我地要冒險既事。」
「我地會唔會賭得太大？失敗左既話......」Shirley說出她的憂慮。
「哪怕我地得一個人成功都好，成功既話代表我地掌握到留係呢個世界既辦法。知道晒整件事而又清醒既話，就唔使再怕黑子既阻撓，最後當然大家都可以番黎，件事亦可以告一段落。老實講我覺得機會頗大的。同埋我諗只要大家都有強大既意志力以及堅持，成功既機會會大好多。」最後我再補充一句：「當然，最好緊係大家都成功。」
「不過......」我猶豫，也看一看在夢鄉中的Hazel。
怎麼說我也不想Hazel去承受這些，卻不能不告訴她我會走堂，否則的話她會覺得我是個自私的人，甚麼也不告訴她，恨我一生。我告訴她的話，她又會有機會跟隨我們，然後我又不想Hazel去承受......
這套邏輯在我內心循環了很多遍。
「Hazel嘛，就由你去問佢啦。」Ron對我打眼色。
「點解係我？」我諤然。
「心照啦，嘻嘻。唔好以為你地唔講我地就唔覺先得架，第時同Hazel出左pool記得請我地食出pool飯。」Shirley也對著我笑咪咪。
「聽者有份！」
原來這已經是組內公開的秘密，我還天真地以為我和Hazel的曖昧隱藏得非常好。縱使有一萬個不願意，我還是決定將一切告訴她。我行到她的身邊，輕輕拍一下她的肩膀，待她有點意識的時候，在她的耳邊低聲說：「Hazel，有啲野想同你講。」
「嗯，係咩事？」Hazel擦一擦眼睛。
我將剛才的一切都告訴她。她聽到我們要走堂的時候很驚訝，說了一些「真係要咁做？」之類的說話，聽到《綠袖子》三個字更加是木無表情。
說明完畢，Hazel沉思了一陣子。
「既然係咁，我都願意參與埋一份。頭先其他組既如無意外下次唔會見到佢地，如今你地都走晒，課室得番我同黑子既話我會好寂寞。」Hazel說。
最壞的情況發生了，Hazel答應與我們「冒險」一次。話雖這樣說，Hazel肯走堂的主因應該不是她所說的。
為了什麼？會是為了我嗎？
「Hazel，你諗清楚未架？」
我的問題反而令到Hazel不耐煩：「做咩啊？我緊係諗清諗楚先決定去。」
我還想問Hazel會否因為我才去走堂，但是話到口邊就停住了。
「唉，咁好啦，個日我預大家由屋企或者Hall番黎要一個鐘，所以11月5日10時30分，課室等，預祝大家成功，不見不散。」
「不見不散。」
對不起Professor King，最後我也迫不得已不上你的堂。不過我保證，下星期一我就會回來。無論遇上甚麼樣的阻濟，我都會回來，大家都會回來。
窗外的傳來了一陣陣鳥啼聲，天色也由黑轉成灰色，日出了。
深夜過後太陽還是會由東方昇起，我們班也會有日出嗎？
只有三小時的睡眠肯定是有損健康的，加上特別室01內沒有被單床褥，在半睡半醒的情況下只能當是打瞌睡。
第二早通識課剛好是補眠的時機，我和Hazel拖著疲累的身軀，行了五分鐘左右的腳程〈感覺像行了二十分鐘〉到達通識課的大講堂，一坐下就呼呼大睡，完全沒有上課的樣子，講堂這個地方對我們倆來說，是一處有空調、很舒適、兩小時沒人打擾的補眠地方。
匆匆上完星期二的課，發覺已經一整天沒有洗澡，頭髮變得油膩，下巴開始長出刺手的鬚根了，是時候回一回家。不過在這之前要做的，就是先送Hazel回家。Hazel住在油尖旺區，距離校園也只是一程巴士而已。之前的星期二，偶爾我也會要求和Hazel一起乘這條路線的巴士。
我們上了巴士的上層，找了兩個空的位置坐下，Hazel靠窗而坐。由於睡得太多的關係，在巴士上反而沒有睡意。看了一會兒街景，我嘗試打開話匣子，不過話題總是離不開兩日後的「行動」。
「你估我地會唔會係第二個世界見到大家？」
「緊係會啦。」
「咁肯定？」
「呢個係女人既直覺，嘻嘻。」Hazel露齒的笑著。
這個笑容給了我無窮的信心。只是我心裡知道，這個笑容純粹是一種保護色。
真的，Hazel表現得愈不在乎，愈令我覺得她在掩飾，我內心反而更難受。一直都不是很大膽的她今次突然願意走堂和聽《綠袖子》，一定是有著一個人支持她，幫助她戰勝恐懼，而那個人，如無意外，就坐在她的身邊。原來我在她心目中的位置是這麼重要。而作為男人的我呢？心中雖然把Hazel放
在第一位，卻沒有透過行動表現出來，相反一直埋藏在心內。
要讓Hazel知道我有多想保護她和愛惜她，表達的方法應該剩下一個而已，我大概知道現在要做甚麼了。
「我......」我發出這個音足足有數秒之久，期間我的腦海一片空白，完全喪失措詞的能力。平時FF的時候看似很容易，但一到了荷槍實彈的真實環境，勇氣完完全全給壓制。
「喂，到站喇，仲『我』乜鬼，仲唔落車？」
該死的口吃！
回家的路途中我們並排行著，我多番嘗試想抓住她近在咫尺的手，可是最終也沒有做到。我十分沮喪，連簡簡單單的一句表白，也無法完成。
「好啦，多謝你送我番屋企。」
轉眼間來到Hazel家的樓下，她l準備行到大廈的門口，我正在眼白白望著Hazel離去，這一刻錯過了，要到不知何時才再有這個機會。這是我要的結果嗎？
「等等。」我連忙跑出兩步，一手捉著她嫰滑的右手，把她捉停了，她回頭看著我。
「我....我想以後都可以送你番屋企。同埋......拖住你隻手，可以嗎？」終於，我鼓足勇氣說出這一句。
她靦腆的問道：「你咁樣.....叫做向我表白？」臉上掛著一絲喜悅。
我深深吸了一口氣，豁出去地說道：「係。Hazel，我鍾意左你好耐，你......可唔可以做我既女朋友？」我等待Hazel的答覆。
若果現在有鏡子的話，我必定會看到紅透臉的自己，這一刻實在太緊張了。
幸好Hazel沒有讓我等太久，她嫣然一笑，鬆開我輕輕捉著的右手，再把雙手輕放在我的肩上。「我等左呢句好耐喇。Kevin，平時勇敢既你去左邊啊？怕羞到你丫。」
我順勢擁抱著Hazel。人生的第n次表白，第一次成功，心情極為興奮。
「Kevin，你心跳得好快。」
「係啊，緊張嘛。」同時間我也感受到Hazel左胸傳來急快的心跳。
「這麼說，我就是你的初戀了？」
「你又知？」這時我雙手抱著Hazel纖瘦的腰，我第一次在這麼近的距離和
Hazel談話。
「O-Camp個陣大家都講過自己既status架啦，個陣你話自己A0 嘛。」
「係啊，知你叻喇之前中學拍過拖。」
「咁我而家既status係咩丫？」
「O2囉！都我唔差，正式O1，嘻嘻」我學著Hazel的笑聲，再次擁抱她。
2012年10月30日，一個一生都要記著的日子。
「聽日我會再黎，一齊返Campus。」臨別時我不忙加上一句。Hazel報以微笑，推開大廈的大門，身影進入了大廈。
嘴唇還殘留著Hazel的餘溫。