大學可以幹的事很多，但不包括走堂: 我不入地獄，誰入地獄
「不入虎穴，焉得虎子。要真真正正搵出真相，除左親身嘗試同經歷，我諗唔到更好的方法。方法當然是走堂，然後進入平行時空。首先問下有冇人係極唔願意一試既，請舉手。」Ron續道。
過了數秒，大家互望著對方，沒有人舉手。
「或者我咁問，邊個想去所謂另一個世界既，請舉手。」
這次我們六人同時舉起手，伴隨著堅定的眼神。
看到Hazel舉手，我非常擔心，這可不是遊戲，這是連世界上頂尖的科學家也未接觸過的領域 – 平行時空，比美國登陸月球還要危險，若果失敗了，跌入其他未知的時空，從此一去不返…….
還有，Tommy幹嘛也舉了手。他不是這件事的受害者嗎？但看到他堅定的眼神，我知道他是認真的。
舉著手的Ron再開口：「嗯，我知大家都好想去，作為科幻小說迷，我都好想睇下平行時空到底係點。但我擔心既係，如果大家都去晒另一個世界，咁就會冇人係呢個世界照應，咁樣就算搵到答案都係得我地自己知，其他人無辦法得知，只會徒勞無功。雖然好殘酷，但我覺得一個去就已經夠，其他人應該留番係度。」
一個人去？那更加不能讓Hazel去冒險。這時我看一看Hazel，Hazel也望了過來，四目交投，沒有說甚麼，但已經彼此交流了意見：「你唔可以去！」
「我不入地獄，誰入地獄，由我黎啦。」我搶先說。
「唔得，係都我黎去，我睇過咁多科幻小說，就算有咩突發情況我都可以應付到。」
「我去得喇，你地班男仔係度做照應啦。」Ivy說。
「唉，咁爭落去唔係辦法，而家都已經咁夜，聽朝仲要上Professor King堂，再唔決定聽朝唔夠訓遲到咁就弊。我提議用番最公平既辦法 – 抽籤。」
「而家我地好似冇籤。」Hazel攤開雙手，無奈地說。
Tommy很快骨碌骨碌的喝完餘下的半瓶酒：「唔使怕，我岩岩飲晒呢枝喇，就用轉樽代替抽籤，個樽頭指到邊個就邊個去。講明先，就算轉到我我都會照走堂，係另一個世界走堂。」說罷就將手中的空瓶平放在我們圈內的中心，扭轉手腕，準備令空瓶旋轉。
大家屏住了呼吸。
「三、二、一！」
空瓶不知轉了多次圈，重覆地順著指著我、Hazel、Shirley、Ivy、Ron、Tommy。終於空瓶的轉速漸漸減慢，結果很快就要揭曉。
空瓶停下了，樽頭向著……她。
風停了，整個草地隨之而沉默。
我無法形容她當時的心情，不過若果是向著我的話，我會失落中帶點擔憂。作個比喻，即使之前作了犧牲的心理準備，有捐軀的覺悟，但當死亡到來的時候，人始終都是人，難免會害怕。
「嗯，係我。」Shirley低下頭，低聲說了一句。
「頭先我見大家咁投入都冇諗到咁多，而家先發現得我一個人去有啲驚。」我有股衝動想去安慰她，或是乾脆直接頂替她。
「對在決鬥裡輸的男人給予同情，你知道有多麼殘忍嗎？」弦外音山治在腦海中對我說，這句話打住了幾乎做錯事的我。
對，若果我頂替她的話，就是輕視Shirley的決心，我不想令已經有覺悟的Shirley有遺憾。
還是鼓勵的說話最合適，Ron首先說：「Shirley，拜託你了，你好勇敢。」
Tommy也誠懇地說了句：「謝謝你，Shirley，我唔知可以點報答你。」
Shirley轉而望向天空，臉上帶點哀愁地說：「過左今晚之後，會唔會以後再…再見唔到大家？」
Hazel立道：「點會以後都唔見呢，而家Tommy咪仲係我地身邊，我地六個人，加埋好錫我地既組爸媽，『二世祖』永遠都唔會分開。」
這一刻我們都很感觸，我們由O-Camp初相識到現在只有短短的兩個月，時間很短，感情卻很深厚，如親兄弟姊妹般，彼此間沒存在著半點隔膜。
「『二世祖』真係好好既一組，雖然冇其他組玩得咁癲咁喪，但勝在好團結，好開心可以同你地一齊過左咁多美好既時光。起初入到黎大學，我以為大學生只會掛住讀書拍拖，同你扮Friend，係為左啲 source，好攻心計，好難識到深交朋友。不過識到你地證實左我一直都錯左。我真係好驚，但如果聽日真係可以搵到方法幫到Tommy的話，我好願意一試，大家係咪會支持我？」
「呢層緊係啦。」Hazel說著，用手搭著Shirley的肩膊以作鼓勵。
我不知道Shirley明早不上課是不是就會去了平行時空，還是變成普通的曠課。
是次計劃由始至終，都是我們在有限的資料中猜想出來，成功的可能性有多大，誰都答不上來。
既然我們選擇了這條路，就應該有勇氣地行下去，永不後悔。
「不如我地跳一次Camp fire啦，幫Shirley壯壯膽。」遇到這些突兀情況，我有點不知所措，胡混給了個提議。
「哈哈，好呀，我成個月冇跳過喇。」Shirley擠出一個微笑。
「好白痴既提議，不過我鍾意。」Tommy站了起身，原地跳了兩下，像極了平常打籃球的熱身動作。
由於坐得太久之故，站起來有點兒站不穩。站起來之後我拿出電話，在長長的歌曲單中選了「成吉思汗」，將音量調至最大，林子祥沉厚的聲線頓時打破了長久的寂靜。
HOO HA HOO HA HOO HA HOO HA
HOO HA HOO HA HOO HA HOO
聽到熟悉的音樂，大伙兒聞歌起舞，哼著歌，跳起O-Camp學的舞蹈來。
風沙之中追追趕趕彼此熱烈在歌唱 HOO HA HOO …
「成吉思汗」過後，另一首歌的前奏緊隨而起。
「嘩，係『狂歡』！」
「呢首刺激喇！」
「我仲好記得點跳，揼揼揼揼……」雙手握著拳頭，上下互相碰撞。
「抹枱抹枱抹枱抹枱…….切菜切菜切菜切菜……抺窗抺窗抺窗抺窗……」
大家就在前奏不斷「抹枱」、「切菜」和「抹窗」。
面上充滿著熱望 興奮地看看 心聲急促跳蕩…
…問月光 問月光 誰人能將酒喝光
彎月下的草地上坐著六個少男少女，六瓶酒瓶，一堆花生殼。狂歡過後，大家又坐在一起。
「痴線，跳到出晒汗。」十分鐘的運動令血液運行得很快，加上酒精，大家的臉都變成紅蘋果。而且已經汗流浹背，背上留下一層深色的汗水。
「哈哈，出晒汗，大家就唔會知我臉上既係汗定係眼淚。」運動的產生的荷爾蒙果真的會令人忘記煩惱，Shirley就是一個例子〈當時沒有想到Shirley可能醉倒了，開始語無論次〉。
Ivy用紙巾抹走臉上的汗水，說道：「知唔知O-Camp個陣有人話過我地組好kai、好摺？起初我都覺得Kevin好似傻傻地咁，原來有時都幾關心人，幾搞笑。」
「緊係啦，係你開頭認識得我唔深。攰死我喇，時候唔早，我諗大家都係早啲返Hall返屋企沖涼早啲訓。」
Ron道：「同意，不過臨散水前Shirley聽埋我講最後一句。」
「諗落Tommy都應該要做埋，我想你地兩個聽朝係Whatsapp group到同我地報
個平安。因為而家知道既實在太少，大家要保持住聯絡，一有咩唔妥就打比我地啦，我地一定會竭盡所能幫你地。而且咁樣亦都等我地知道你地係咪去左另一個世界，定係仲係呢個世界。」
「簡單啦，我會每五分鐘都發個訊息比你地。」
「冇問題。」Shirley也點頭示意。
討論結束，大家各自歸家或是返宿舍。今晚喝了酒，還跳了Campfire，累得很。回家泡個熱水澡後，便倒頭大睡。