自修室，學界既蘭桂坊: 64

我呆一呆，呢把聲，好熟。
屌你老味!幻覺嚟架姐!呢度台灣嚟架!!!
但係喺台灣又會講廣東話嘅又有幾多個吖…
我拎一拎轉頭，就見到的士佬一個人威風凜凜咁企咗喺度。

「的士佬，呢度台灣嚟架，點解你會出現架!!!」我大叫回應佢。
「吓??揸的士唔俾去旅行架!?你依家職業歧視呀?成個台灣你行哂呀??」

俾佢咁樣講一講，我無話可說。
「唔係...只係估唔到又咁啱撞到姐…」





的士佬走過嚟，見到得我同Jojo兩個。
「咦，睇嚟你揀好咗啦喎。」的士佬搭一搭我膊頭。

我get到佢個意思，連忙道。
「唔係呀，我地幾個頭先…」

的士佬都未俾我講完，就打斷我。
「唔洗講，明架啦。」
「靚仔，見同你咁有緣，就等我帶你遊下淡水啦。」的士佬邊行邊講。




「你好熟呢度架?」Jojo問。
「當年我同阿欣結婚，就係嚟台灣渡蜜月，淡水呢個地方係我地兩個最鍾意嘅，估唔到過咗咁多年，呢度變咗咁多。」

「你依家返嚟呢度，會唔會觸景生情架…?」Jojo問。
「哈哈，我就係想咁樣，當年嘅我地就好似你地咁青春，咁有愛。」的士佬苦笑道。

佢咁樣講一講，搞到我地兩個都好尷尬。

我地兩個跟住佢行，行行下，見到佢上咗架車。
「嚟啦，跟我上車。」




「點解你連喺台灣都有車架!?」我問。
「自駕遊呀低能仔!上車啦!」

上到車，的士佬就繼續講。
「Jojo，你係咪都知道哂我同阿欣嘅事?」

Jojo聽到的士佬咁樣問，呆一呆。
「我諗算係掛，阿楠大致上都講哂俾我知。」
「嗯，咁就得啦，既然你地兩個都知，咁我就可以講。」
「做咩?」我問。
「實不相暪，其實今次呢個台灣之旅，係我嘅告別之旅，我打算喺呢度回味完過去同阿欣一切嘅經歷之後，就永遠離開佢，唔再去搵佢。」

佢咁樣一講，我地兩個都好震驚。
「點解…點解你要咁做?」Jojo問。
「係囉，你走咗，得返佢一個女人仔，你叫佢點捱，仲有佢成日唔記得嘢，邊個去提佢收鋪?邊個送佢返屋企?」我好激動。





的士佬垂頭，沉思咗一陣，就講。
「因為我近排發現…佢好似開始記得返起以前嘅嘢。前排我去食粥嘅時候，阿欣竟然同我講佢以前細個喺山上面玩嘅經歷，仲提起佢有個青梅竹馬嘅男仔，呢啲嘢佢係唔應該記得…」

「吓?佢記得返嘢咁咪好囉，你唔係一直都想佢重拾記憶，同你重聚架咩?」我問。

「我從來都無講過我想咁樣，我只係想用一個新嘅身份去守護住佢，但萬一佢記得返起我，我對於佢嚟講就唔再係一個陌生人，而係一個傷害佢，令到佢變得一無所有嘅賤男人…」

「咁又係…你唔會知佢記得返起你呢樣嘢係好事定壞事，如果阿欣佢仲係憎你嘅話，你地見面只會兩個都受苦…」Jojo道。

的士佬聽到Jojo咁講，不停點頭。
「你果然明白我。」

「但係你唔去見佢，咁樣係逃避喎!你犯咗錯唔係應該主動去承認，希望佢原諒你咩!?你當年去搵返佢都係想咁姐，萬一佢原諒咗你，你又走咗去，你咁樣又會傷多佢一次呀。」我大叫。                                                     





「我都話我依家唔想佢記得返起我咯!我再去見佢，就只會令佢繼續重拾以前嘅記憶。我唔會博佢會原諒我，所以我已經決定咗，走!」

「唉，就算你咁樣走咗去，你都會成日掛住佢，你自己都唔會好受。」Jojo嘆氣。

聽到呢句說話由Jojo把口講出嚟，唔知點解我覺得佢好似都有好大感受。
我望一望Jojo，佢又望一望我，睇嚟佢意會到我嘅諗法，於是立即避開。
喺呢一刻，我真係好想捉一捉佢隻手，等佢知道，其實我明…
之不過我最後都係唔夠膽做。

「咁你諗住走去邊?離開香港定點?」我問。
「我仲未諗定，可能返番大陸，又可能剩係以後唔去灣仔，唔去香港島。」

的士佬講完，就無再講嘢喺度揸車，我同Jojo見個氣氛咁凝重，都無再出聲。
過咗陣，開始有啲不安，唔知佢會車我地去邊，我始終都係忍唔住。





「喂，你諗住車我地去邊呀?」
「就講就到，落車啦。」

落咗車，呢度我地當然未嚟過，但睇過旅遊書，我估呢度係淡水天元宮。
跟住的士佬行咗陣，我地就入到去，呢度開咗好多櫻花。

「嘩，櫻花呀，好靚呀。」Jojo見到啲櫻花就衝過去，佢好開心，笑得好燦爛。

的士佬望住Jojo，望得好入神。
「你個笑容，同當年嘅阿欣好似…」

Jojo聽到的士佬咁講，笑咗笑。
「哈哈，係咪好掛住人呢?」

講完，Jojo就捉住我。




「喂，呢度咁靚，我地影相吖?」
「好呀。」

我地走到去天元宮附近，天元宮係一座高塔，周圍一點一點嘅櫻花伴住我地，眼底下嘅周圍都佈滿粉紅色，我拎住部電話幫Jojo影相，喺櫻花底下顯得佢好清新脫俗。

幫Jojo影咗陣相之後，我就同的士佬講。
「不如你幫我地影相吖?」
「無問題。」

我同Jojo走到一祼大大嘅櫻花樹下面，呢度有張長椅，我地一齊坐喺度，我搭住佢膊頭擺好甫士影相。

我地一齊坐喺度，微風吹過，令我記返起當日我地一齊坐喺維園嘅情景。
「喂，你覺唔覺呢，除咗啲櫻花之外，呢度其實有幾分似維園。」
「係咩，哈哈，係有啲似嘅…」

當日喺維園，係我真真正正第一次知道Jojo嘅心意。到依家我都唔會唔記得，當時佢挨喺我膊頭，同我講嘅說話，同埋趙學而嘅歌聲…

「無論你喜歡誰，請你記住留下給我這位置…」我不自覺咁唱咗最佳位置呢首歌出嚟。
「喂，做咩無啦啦唱歌呀?」Jojo道。
「只想你依然，亦想得起我不是，任你處置…」我無理佢。
「仲要唱錯哂，下一句係時常在內心一隅，空出幾吋為我堅持…呀。」
「呢句唔啱feel，所以我特登唔唱。」
「Jojo…」我望住佢。

忽然，一塊花瓣趺咗落Jojo臉上，朵花瓣喺佢塊面上面，映襯得佢塊面好紅，我伸手諗住幫佢掃走塊花瓣。
佢都望住我，我同佢嘅距離好近。此情此景，我又諗返起琴晚，同佢喺床上面接近面貼面嗰一刻。

車厘龜，我仲係好鍾意你呀…
車厘龜，我仲係好鍾意你呀…
車厘龜，我仲係好鍾意你呀…

「車厘龜…」

佢錫過我塊面，但我未錫過佢，呢一刻，唔係小小楠，係理智同我講，我好想錫佢，唔係，係需要錫佢。
我伸手，輕輕撥走喺佢臉上嗰塊花瓣，然後慢慢哄埋去。
Jojo無縮，我見到佢慢慢咁瞇埋眼。

咀了。
當我張咀唇觸碰到佢張咀唇嘅時候，我由頭皮，鼻哥，耳仔，去到身體每一個部分，都輕輕咁有啲發毛嘅感覺…


小小楠無扯到，跟住一齊發毛。

莫非，呢個先係真正觸電嘅感覺?