自修室，學界既蘭桂坊: 63

第二日，琴日我地飲到醉哂，結果我地瞓到成一點幾先起身。Shirley同Jojo兩個起身時懵懵下咁，睇嚟佢地乜都唔記得哂。

我起咗身之後，諗住過去睇下肥鈞佢地點，點知佢地原來一早就醒咗，開門嘅肥鈞笑笑口，同我單一單眼，睇嚟醉咗嘅Venus應該都抵受唔住肥鈞呢隻淫賤猛獸嘅進攻，失咗身俾佢。

梳洗完之後，我地就立即出發，照住我地嘅行程，今日，我地係去淡水。
淡水聽到個名就知，呢度個氣氛平淡如水，周圍都籠罩住輕輕嘅薄霧，空氣都清新過人，天氣仲因為薄霧而變得無咁熱，喺呢度，個人身心都舒暢啲。

同琴日嘅西門町相比，個分別就好似香港嘅旺角同南生圍咁。

無食早餐嘅我地，一去到淡水就不停搵嘢食，我地去到淡水老街，好可惜，一入到嚟，原來都係好多人。





醫肚要緊，我地不停覓食，雞卷，鵝肉，肉羹，油飯，滷肉飯，牛肉麵，經過琴日嘅教瞓，我地依家樣樣剩係食少少，少食多滋味，開心好多。

之不過，行行下掛住周圍搵嘢食，呢度太多人，我地無啦啦走失咗。
搵咗一陣，我剩係見到Jojo。

「喂，你見唔見到佢地呀?」我叫住佢。
「嘩，嚇死我啦，無啦啦行行下得返自己一個。」
「我都係，唔緊要啦，我地行住先，應該好快就會搵返佢地。」
「嗯嗯。」





我同Jojo一路行，我忽然醒起琴日拍嗰段片。

「喂，你想唔想知你琴日飲醉酒做咗啲咩呀?」我笑道。
「吓，我做咗啲咩呀，我剩係以為自己一飲醉就瞓著咗咋…」
「緊係唔係啦，你邊有咁正常，我俾啲正嘢你睇。」

我拎部電話出嚟，開返琴日段片俾佢睇。
「唔準影呀。」Jojo又喺度四圍撥。
「頂，好低能呀我。」Jojo笑道。




「呢啲小兒科嚟架咋，睇落去啦。」
「我控制唔到自己呀!!!」
「妖!!!!」
「但係點解…個鏡頭個位會喺呢度嘅…」Jojo都慢慢意識到我地玩緊女上男下。
「唔好問我，問你自己，你知唔知你嗰陣揼我揼得幾大力?」
「頂…點解我會唔記得哂自己做過啲咩…飲酒真係好恐怖…我以後都唔要再飲。」Jojo道。

播到黑畫面，我就停咗條片。
「無啦，係咁多。」
「吓?我唔信囉，後面仲有成分鐘，一定仲有嘢。」
「唔係呀，你信我啦，黑畫面嚟架咋。」
「唔得，我要睇，你一定做咗啲衰嘢先唔俾得我睇。」講完Jojo就係咁伸手搶我部電話。

我係咁避嚟避去，死都唔俾部電話佢。
「嗱，你唔肯俾我，我就當你對我做咗啲衰嘢架啦。」




「痴線，我先唔係啲咁嘅人。」
「咁你做咩唔俾我睇姐?」
「信我啦…你唔會想睇到。」
「唔得，我要睇!!!」
「你唔肯俾我睇即係你心虛，你借醉行兇!!」Jojo係咁伸手打我。
「你真係要睇?」
「係呀，俾我啦，婆媽!」

我唯有伸手俾部電話佢。
佢見到咁就即刻搶咗部電話，行埋咗一邊，噤個play掣。

「車厘龜，我仲係好鍾意你呀…」

「Shit!!!!!」Jojo紅都面哂。
「係咪衰呢…我都叫咗你唔好睇…」我拎返部電話。




「喂，delete咗佢呀…」
「唔得，呢啲珍貴片段，我緊係要好好收藏啦，哈哈。」我笑道。
「頂…你好賤…」

Jojo嬲包包咁走咗去。
我追上去，之不過我就算點聊佢，佢都唔肯理我。

我跟住佢行咗好耐，都仲未見到Shirley佢地。
Jojo一路唔肯同我講嘢，搞到個氣氛好鬼尷尬。
行行下，我地經過一間粥鋪，見到粥鋪，我就醒起老闆娘同的士佬嘅故事。

「喂，你仲記唔記得個失憶老闆娘呀?」

Jojo都仲係唔肯理我，我唯有繼續講。
「原來呢，佢同嗰日同我地一齊去迪士尼嗰個的士佬呢，係夫妻嚟架。」




「吓!?」果然，呢樣嘢果然足夠震撼到佢，令到佢開聲應我。

就係咁，我就同佢講咗的士佬同老闆娘嘅故事俾佢聽。
「嘩…真係好慘呀…佢地兩個都…」Jojo道。
「係…唔知佢地依家點呢?」我道。
「邊個喺度講我壞話!!!!!!!!!!!!!!」後面傳嚟一陣吼叫聲。