自修室，學界既蘭桂坊: 61

「飲酒!?」我好驚訝Shirley竟然會提議飲酒，因為我自己都未飲過。
肥鈞，Jojo都一齊望住Shirley，睇嚟佢地都嚇一跳。

「做咩咁望住我喎，啲大人一齊玩嗰陣時都會飲酒架啦，我地依家個個都過哂十八歲，所以我咪提議下，等我地都可以好似大人咁玩嘛。」

我地幾個聽到Shirley咁講都呆咗呆。

「好呀，我都好想試下飲酒呀，睇戲成日見到啲人醉咗個樣，我都好想體驗下醉咗之後嘅感覺究竟係點架。」肥鈞笑淫淫咁講，條死仔佢郁下條尾我都知佢想點啦。

「我無乜所謂，你地飲我都可以飲下。」我道。




「我唔飲酒，你地飲啦。」Jojo道。
「唔好咁掃興啦，難得成班一齊玩，飲少少無事嘅，乜都要試下嘛。」肥鈞又道。
「一陣睇下點啦。」Jojo講完就將個電視台轉咗去康熙來了。

「嘻嘻，我知道Jojo最後都會同埋我地玩嘅。咁不如我地依家襯Venus仲沖緊涼，落去買咗酒先啦。」Shirley道。
「好。」我同肥鈞齊道。

跟住我同Shirley肥鈞就落咗去樓下一間便利店買酒，第一次買酒，咩都唔識，我地決定乜都買啲，紅酒，啤酒，嗰汁酒，菠羅啤，鹿茸大補酒…

拎住咁多酒，好鬼重，正當我地想上去嘅時候，肥鈞叫我地上咗去先，佢仲有啲嘢想買，我同Shirley無理佢就上返去。





入返酒店房，Venus都沖完涼，佢見到我地拎住咁多酒都好驚訝。
「嘩，咁多酒嘅?」
「我地諗住今晚飲酒呀。」Shirley道。
「我都唔明，台灣有咁多特色嘢飲，點解唔飲嗰啲要飲酒。」Jojo插咀道。
「哈哈，講咁多藉口唔想飲，你實係驚醉啦。」我笑道。
「收皮啦你，我地個個都未飲過，話唔定係你醉先呢?」
「咁即係你都肯飲啦?」

我咁樣講完，Jojo無理我，繼續睇康熙來了。





「咁點呀，Venus你玩唔玩?」Shirley問。
「好呀，我都想試下飲酒好耐架啦。」

等咗陣，肥鈞就上返嚟，拎住個骰盅。
「你地睇下我買咗啲咩?」
「wow，連骰盅都有埋，我地依家個feel真係好大人呀。」Shirley道。
「事不疑遲，我地依家開始玩啦!!」肥鈞道。

我地幾個圍埋一圈咁坐喺中間張床，本身話唔玩嘅Jojo，見到我地四個圍住坐，康熙來了又做完，都走咗過嚟。

肥鈞將個骰盎放喺中間，成個大佬咁。
「嗱，我以前上網睇過啲飲酒game，有個叫做789飲到嘔，我地不如試下玩呢個game先啦。」
「死啦，我剩係聽到個game名已經覺得好邪惡啦。」Venus笑道。
「快啲講點玩啦!」Shirley道。





「你地靜靜地聽我講。好，首先呢我地要斟定杯酒放喺度先，叫做公共杯，然後就逐個逐個開始搖骰仔，呢度有個骰盅，我地只需要用兩粒骰仔，輪流搖，搖到三，四，五，六，十，十一，十二嘅話呢就唔洗飲。搖到七都唔洗飲，但係就要斟酒喺個公共杯，斟幾多都得，搖到八嘅話呢，就飲個公共杯裡面嘅酒嘅一半，搖到九就要飲哂佢，當你地擲到相當數字嘅話就要倒轉順序。」肥鈞成個專家咁向我地解釋。

「嘩…搖到九就真係仆街啦。」我道。
「咁二呢?」Venus問。
「呀係喎，二呢就即係可以自己揀一個人，叫佢飲。」肥鈞道。
「你地明白哂未，明白嘅話就開始啦，就我開始先啦。」
「喂，我地都未斟酒。」Shirley道。
「噢，咁斟咗先啦。」
「喂，肥鈞第一個搖先呀，斟杯鹿茸大補酒俾佢先啦。」我笑道。
「頂，一開始唔好打大佬啦，飲下啤酒先啦。」肥鈞道。
「係囉，我都係咁話。」Shirley講完，就斟咗一杯仔啤酒。

肥鈞搖咗幾搖，一開，兩個一，即係二。
「哈哈，仲話斟鹿茸大補酒，柒頭，飲啦!」肥鈞指住我。




「抵死。」Jojo笑了笑。
「唉，願賭服輸，飲囉。」我拎起杯啤酒，一啖就吞咗落口。

第一次飲酒，唔係好慣，啤酒嘅味道我從來都未試過，好苦好澀，一啲都唔好飲。
「點呀，醉未呀?」肥鈞笑道。
「痴線，繼續啦!」

下個就到Venus，佢搖到都五，無事發生。
到Jojo，搖到七，佢倒到個杯滿一滿，好奸咁望住我地笑。
到Shirley，佢又係搖到七。
「又係七，咁點呀?」
「咁樣呀…咁樣不如倒多杯啦，刺激啲嘛。」肥鈞道。

Shirley聽到就扁住咀咁加一杯，睇嚟其實佢係想飲酒多個無事。
「依家已經有兩杯酒啦，等我繼續加啦!!」肥鈞道。





肥鈞自信滿滿咁搖，一開，九。
成間房一陣爆笑。
「屌，快啲飲哂佢，鹿茸大補酒侍候!」我大叫。
「無得咁樣，係斟咗呢啲我就剩係飲呢啲架姐。」講完，肥鈞就立即啪哂嗰兩杯酒。

肥鈞一飲完，塊面即刻紅卜卜咁，我地都係咁笑佢係咪醉咗，佢就死都話自己無醉，但係佢講嘢就愈嚟愈大聲。

接住嚟我地都玩咗幾輪，每個人都有輸過下，大家以前都未飲過酒，飲咗陣個個都有啲醉意，但Venus已經坐唔直，挨咗喺肥鈞身邊。

去到呢一輪，個酒池已經加到有五杯酒，仲要有兩杯鹿茸大補酒，邊個擲到九就真係仆街。
我一擲，三，無事，我舒一口氣，我唔係驚醉，我係唔想飲，啲酒真係好鬼難飲。

飲咗幾杯嘅Shirley都發覺原來自己唔係好飲得，擲到四嘅佢都鬆一口氣，然後挨喺我身邊。
Venus已經醉到不省人事，攤咗喺度，我地都廢事叫佢擲。





到Jojo，Jojo玩咗咁耐到依家都只係飲咗兩杯，佢同未玩之前其實都無咩分別，搞到我好想睇佢飲。

Jojo一擲，我地幾個都聚精匯神咁望住個骰盅，一開。
三同六，等於九!!!
YES!!!我地幾個都齊聲高呼一聲。Jojo攣大個口得個窿，好似仲未接受到個現實。

「嗱，無得賴啦，飲啦!」我拎杯鹿茸大補酒埋去。
Jojo見到我地幾個望住佢，都知無得避，唯有逐杯逐杯慢慢飲，佢飲嗰陣時一直嗱埋口面咁，大家都飲過，都知道會好辛苦。

飲到第三杯時，佢就開始頂唔順，想嘔想嘔咁。
「喂，唔得唔好死頂喎，一陣嘔到成床都係就唔好啦。」我道。
「食屎啦你，呢啲時候仲喺度潤我。」
「哈哈哈，躁啦躁啦，醉啦醉啦。」

飲完之後佢不停喺度用手撥風俾自己，著住背心短褲嘅佢，我睇到佢手臂心口都紅哂，睇嚟佢好熱。

「唉呀，我唔得啦我唔得啦。」Jojo暈陀陀咁講。

見到佢咁慘咁樣，我決定幫幫佢。
「唉，我幫你頂埋佢啦。」我拎埋剩低嗰兩杯酒，一口氣飲哂佢。

「不如我地完啦，再飲我地聽日連身都起唔到，哂咗一日。」我續道。
之不過三個女仔都無出聲，個個都醉醺醺咁樣。

「嗯嗯，我扶Venus返去嗰邊先，你地今晚喺呢邊瞓啦。」肥鈞一邊扛起Venus一邊同我講，佢走嘅時候同我單一單眼，嗰一刻我覺得佢同陰謀誠係無分別。