自修室，學界既蘭桂坊: 59
同肥鈞講完，我就即刻問Shirley去唔去台灣旅行，佢一聽到即刻就應承。
正，我地兩pair情侶一齊去旅行，應該好好玩。
事不疑遲，我地第二日就約咗出嚟喺間coffee shop傾個旅行點搞。
「第一次自己去旅行，我地跟團定自由行?」肥鈞問。
「緊係自由行啦，跟團都無得自己玩，又要跟人地個行程。」我道。
「好呀，咁自由行囉，咁我地就要自己plan行程呀機票住宿嗰啲架啦啵。」
「我地依家放假咁得閒，大把時間搞啦。」
跟住我地就去買咗本旅遊書，由朝傾到晚，大家第一次咁樣合作，一個搞機票，一個搞住宿，Shirley同我就計劃好成個旅行嘅行程。
傾到夜晚，大致上都搞掂哂啲嘢，大家都好攰。
我地坐哂喺度，飲埋最後一啖咖啡。
「終於搞掂哂，我依家好期待呀。」我道。
呢個時候，Venus忽然開腔。
「你地覺唔覺，好似硬係差咁啲嘢。」
「無呀，要準備嘅嘢都準備哂啦，聽日我地去買齊啲嘢就行得添啦。」肥鈞道。
「唔係呀，係差咁個人。」
Venus咁樣一講，個個即刻如夢初醒咁樣。
「係喎，我地無叫Jojo…」眾人齊道。
「有冇搞錯呀你地，你地姐妹嚟咁都唔記得佢。」我道。
「頭先我地個個都勁專心搞自己負責嗰樣嘢，搞到無為意…」Shirley道。
「唔緊要啦，依家叫埋佢咪得囉，我地又唔係已經喺飛機上面，你地依家打俾佢講啦。」肥鈞道。
講完，Venus就即刻打俾Jojo。
雖然我聽唔到佢地之間嘅對話，但從對話嘅速度中，我感覺到對電話裡面嘅Jojo每一句都諗咗好耐先講。
講咗幾分鍾，Venus就收咗線，然後拎拎頭。
「佢話佢應該唔同我地去喎。」Venus道。
聽到Venus咁講，我地都好失落。
「佢有冇話點解唔去?」我問。
「佢話佢自己未必有錢…要返暑期工先有。」
聽到呢句，本身個個都係諗住問阿媽拎錢去旅行嘅我地都有啲慚愧。
「唉，平時我地做咩都五個一齊，依家jojo唔嚟，硬係有啲奇怪咁。」Venus道。
「唔係嘅…以前去溫書就話姐，依家去旅行，我地兩對情侶，個感覺唔同嘅…可能佢驚自己無伴會尷尬又搞到我地無玩得咁盡興…」肥鈞道。
「同埋，我地四個，book房嗰啲應該都方便啲…好似係。」肥鈞續道。
「嘩，你咁講嘢架，等我極力說服佢嚟，等你無得乘機…」我專登唔講落去。
肥鈞聽到我咁講，鼓起泡鰓。
「咁佢唔嚟我都控制唔到，依家又唔係我叫佢唔好嚟，我都係有嗰句講嗰句姐。」
「算啦算啦，唔好嘈，我睇下點再勸下佢一齊嚟啦。」Venus道。
都夜，我地兩pair人就分開返屋企，送完Shirley返屋企，我拎起部電話，搵下花師奶。
「喂。」
「喂?」
「依家放假有咩做?」
「喺屋企煲緊劇，hehe。」
「睇咩劇?」
「求婚大作戰。」
「咩嚟…一聽個名就知係愛情劇，好毒。」
「毒你個頭，好感人囉，放假係咁架啦。」
「好啦咁，入正題，做咩唔同我地去旅行啫?」
「我咪話咗我無錢…」
「我唔信，考完DSE咁辛苦，你阿媽無俾錢你去玩咩?」
我講完呢句，對面就靜咗，我知我要繼續聊佢。
「哦，你一定係驚做電燈膽，電燈膽電燈膽電燈膽電燈膽電燈膽電燈膽。」
「妖!!點呀低B，你咪當我係囉，我不嬲都做開架啦。」
「哈哈哈，你以前都唔係咁架，你唔係唔Care拍拖呢樣嘢架咩。」
「我係唔恨拍拖，但唔代表我唔介意做電燈膽囉。」
「唔會啦，我地不嬲做咩都係五個一齊嘅，之前嗰次去迪士尼都係咁，你唔嚟我地仲唔慣啦。」
「都唔同，你地到時都要照顧自己女朋友，我就一個戇居居。」
「最多我抵諗啲，照顧埋你啦，哈哈哈。」
「痴線，我先唔要xdddd」
「唉，我睇下點啦…依家日日喺屋企，我都覺得自己好霉。」花師奶續道。
「坐言起行!!你睇下你，日日喺度坐，坐到個囉大哂，計我話，依家就即刻執嘢同我地去旅行，我地定咗下星期去，你仲有六日諗!」
「唔好同我玩倒數!!!」
「時間無多，到時我地上哂飛機，你就要毒足三個月，哈哈。」
「唉…其實真係唔得，媽咪應該唔會俾我一個人去旅行。」花師奶道。
「藉口…唔係路!!」我打咗好多個嬲嬲樣。
「同你一樣!Hehe。」
「超，鄙視你。」我又打咗好多嬲嬲樣。
「超級反彈網!!」
「唉，你哂氣，浪費我口水。」
講完，我就即刻收埋部電話，唔同佢講嘢，扮下嬲先。
第二日，我地四個繼續搞旅行嘅嘢，又要買喼又要買背囊，雖然要用好多錢，但老媽子見到考DSE咁辛苦都肯俾錢我。
搞掂哂啲嘢，我地幾個都好期待個旅行。
喺度傾緊到時要食啲咩玩啲咩嘅時候，有人打俾Venus，傾咗幾句之後，我見到Venus個樣好開心咁，我地一齊問佢做咩。
「Jojo話可以同我地一齊去旅行啦，佢仲話佢依家過緊嚟添。」
「好嘢，我地終於齊人啦。」Shirley道。
「頂…依家先講，咁啲房…」肥鈞道。
「哈哈，睇嚟你無得同Venus同房啦，佢地間房就加多張床，你同我同房啦，Hehe。」
「我唔要hehe呀…我要heshe呀…」肥鈞叫到好似死老豆咁。
睇嚟我扮嬲真係有用，佢始終都係會同我地一齊去。
好快，Jojo就嚟到，佢一嚟我就串佢。
「車，搞咁多嘢咪又係嚟。」
「我呢啲叫貴人事忙，緊係要最後關頭先出現架啦。」
「懶人多屎尿咋掛，你睇下，我地搞掂好哂你先嚟，你就剩係負責玩!!」
「哈，你咪當我係囉。」
聽到Jojo咁講，雖然嬲嬲地，但始終佢最後都肯嚟，都幾開心。
「好啦，今次真係可以講，出發啦我地五個!!」