自修室，學界既蘭桂坊: 25

我怒氣沖沖咁走出個廁所，行返入自修室，果然，嗰四條仔都係啱啱行返埋位。
當我返到埋位時，Jojo叫我。
「喂，做咩借尿遁，俾個藉口自己輸呀?Hehe。」

輸輸輸，我先無咁易輸呀。
「收皮啦你。」
「車，講下笑就叫人收皮，唔講囉。」

我無理佢，繼續做返我份卷，做完之後，我就喺度諗。
我要喺佢地面前同Shirley有啲親密接觸，宣示主權，等佢地知道Shirley係我女朋友，自我收皮。




我見Shirley好專心咁背緊書，襯佢唔為意，哄埋去鍚咗佢一啖。
無啦啦俾我鍚咗啖嘅Shirley，笑咗笑。
「做咩呀你。」
「無呀，太耐無見你，掛住你。」
「嘻嘻，做乜鬼你今日咁痴纏。」

對面嘅人睇到啦，你地咪洗旨意打佢主意呀。

溫到八點，又係時間食飯，我地照舊落去自修室下面間熟食中心開餐。
一坐低，我就講返我喺廁所聽到嘅嘢俾佢地聽。





「咦…好鬼變態呀佢地。」Shirley道
「啲男仔係咁架啦，成班咸濕佬，話唔定你地兩個以前都係咁啦。」Jojo附和。
「你地嗰陣係咪咁樣架?」Shirley同Venus異口同聲。
「哈哈哈，緊係唔係啦。」我同肥鈞心都寒埋。

我見講起佢地幾個，就繼續講。
「雖然嗰四條友係變態，但係其中一個我覺得佢幾靚仔喎。」
「你係咪講緊戴粗框眼鏡嗰個呀，我都覺呀。」Venus一聽到我咁講，即刻知我係講緊小豬頭。





「係呀，唔知點解，你當我歧視啦，我覺得變態嘅剩係嗰三仔友，嗰個小豬頭應該ok架。」我道。

「嘩，你咁樣真係好以貌取人囉。」肥鈞道。
「係咁架啦，喂，Jojo，諗諗佢吖，肥妹係時候脫毒啦。」
「你都痴線，我嚟係溫書嘅，所有異性彈開，yeah!」
「咁車厘龜呢?」Shirley笑道。
「佢?佢係咁啱嗰陣時我心情好，你好彩喇。」Jojo望向我。
「哈哈，分明係我太靚仔啦。」
「慳啲啦你，唔好扮哂嘢走數呀，埋單啦。」

係喎…屌。


食完飯，我地就返上自修室。
一返到上去，就見到嗰四條友掉咗位，個小豬頭坐咗喺Jojo對面，Jojo張枱仲多咗張memo紙，上面寫住:「Hi :)」





我一望到，就哄埋去Jojo到。

「Wowwwww，真係嚟料啦。」
「妖，你講到佢地咁變態，我先唔會睬佢。」
「當識個朋友姐，唔好咁啦。」
「拜拜，收線啦。」
「車，仲諗住有嘢睇，唔好玩嘅。」

結果到最後，Jojo都係無應到個小豬頭，請咗佢食檸檬。

送Shirley返屋企嘅時候，我地講返起呢件事。
「有靚仔主動搵都唔睬人，你話佢係咪徙料吖?」我道。
「咁唔係一定靚仔就要睬人嘅，好多時要講feel架嘛。」
「都係嘅…」




「但係佢睬你喎，嘻嘻。」
「你又知?」
「我點會唔知，嗰陣時我坐喺Andy側邊，成日拎轉頭偷望你，見住你同佢傾得好開心架，搞到我嗰陣真係有少少吃醋架。」

「哈哈，係咩，咁我同佢係ok好傾嘅…」
「你會唔會鍾意咗佢架，嘻嘻?」Shirley輕聲道。
「痴線，唔好講佢地啦，我地三日無見啦，咩啦。」
「咩呀?」未等佢應完，我已經咀咗埋去。
「喂呀，我未病好哂架，會傳染俾你架。喂!!!」