[男籃]一球穿Jump: 第廿七回 – 我真係冇辦法唔放棄籃球

「你以後唔可以再參加高強度既運動比賽。」
 
呢句話深深咁震懾左既心靈，要我以後唔可以打比賽。。。。。
 
黃醫生「冇錯，因為我地相信引發今次你病發既原因係高強度既運動，令到你血液流動加快，對大腦內既陰影做成壓力，令佢壓住你腦內既神經線。因此，如果你繼續進行呢D運動既話，你個病會好大機會復發，好彩既係暈到，好似今次咁，唔好彩既可能有更嚴重既後果。作為醫生，我一定要警告你，千祈唔好再參加高強度既運動比賽。」
 
「但係。。。我地學校岩岩先入左去校際4強，我唔可以唔理隊波。。。醫生，有冇D藥食左可以醫得好我，又或者暫時減輕發病機會﹖」
 
黃醫生「我都好明白你既心情，但係，我地仲要同你做多D檢查，先至可以確定係良性定係惡性腫瘤，而確定前我地唔會立亂開藥俾病人食，以免有不良副作用。而我地同你排到最快既期去做掃瞄係下個月8號，所以我勸你都係打消呢個念頭。」
 




「醫生，一定仲有其他方法既，你一定仲有方法可以幫到我既。。。」
 
黃醫生「醫病你有方法，但你要明白而家係未確診你有邊種病，所以我地唔可以開始個治療住。希望你明白。」  
「就係咁，我離開左醫院。我完全唔知點面對，點解我會有呢個病，點解我要Miss左球隊既比賽，我地咁辛苦先入到淘汰賽。我係醫院附近坐左一陣，唔想面對任何人，因為冇人會知道我既感受。最後，我打左俾李SIR，同佢傾左陣佢就叫我係佢屋企等佢，再重長計議。」
 
MACY「咁你點解唔話俾我知呀，我可以同你一齊分擔丫麻。」
 
「對唔住，我好亂。我根本諗唔到點同你地講，我唔知點樣面對好呀。」
 
李SIR「件事唔係你諗得咁複雜架阿駿。唔舒服，請病假係人之常情，病左要好好休息亦都好合理，唔會有人怪你架。」「仲有，打多一場，打少一場，有咩所謂﹖最緊要你地記住大家一齊打波既時光，我相信大家一定會好努力咁打埋你個份，羸唔羸都係其次，大家係埋一齊先至係重點麻。俾你羸到學界咁又點﹖係終點﹖定起點﹖使唔使比你羸埋甲一、港隊、去埋打NBA﹖咩先叫滿足﹖其實籃球隊行到今時今日已經係羸左啦。」




 
「但係。。。」我好似明左D野，但又好似仲係唔明。「我好想繼續打波呀。」
 
李SIR「而家邊個唔俾你打波者，醫生叫你唔好參加比賽之麻。仲有，醫生都講到明係係佢決定治療方法前一個保險D既做法，可能你最後都冇事呢。」
 
「咁又係。。。」始終做多過我廿年人，李SIR既論據令我無從反駁。講完之後我個人輕鬆左唔少，仲同MACY同李SIR一齊返左屋企。一返到去已經見阿爸阿媽坐左係度等我返黎。
 
我嘆一口氣，將我今日既情況話左俾佢地知。可能頭先已經同MACY交代左一次，我今日仲更加暢暢叫交代左成件事。見到阿媽聽到我個腦有腫瘤事忍唔住落淚，阿爸安慰佢之餘我仲用李SIR頭先既觀點安慰番阿媽。
 
當我交代哂成件事之後大家都安靜無言。過左一陣，李SIR打破沉默「沈生沈太，你地都唔好咁擔心，阿駿佢生性架喇，佢會好好咁照顧自己身體，我亦會係學校多D睇住佢。係呢，時候都唔早喇，我都唔打攪你地，如果我有咩幫到手既即管話俾我知。」




 
MACY「世伯伯母，咁我都走先喇，拜拜。」
 
點知呢個時候我阿媽出招「其實我都煮多左飯，不如你地就留低食餐便飯，當係多謝你地照顧左阿駿一日丫。係呢，MACY呀可，你係咪阿駿女朋友呀，個衰仔我叫極佢都唔肯帶女朋友仔返黎見我地，黎黎黎，你一於留係度同我地食餐飯。」
 
李SIR「哈哈，多謝你既好意呀，不過我約左人呀今晚，唔阻你地家庭聚會喇，哈哈」說罷就著鞋走人。而MACY就係阿媽極力游說下留低左食飯。
 
此刻，氣氛緩和左不少。