[男籃]一球穿Jump: 第廿二回 – 極限

正如我同佢地咁講，我將個波射去籃框靠右既位置，希望佢避開Ivan彈去隊友身邊。此外，我亦落左D西，令個波中框後向下墜，等元山班高佬冇左身高既優勢。
 
「達」一如所料，個波中左框邊後急速向下，而犀牛、阿傑同高佬三個亦有意識地衝去搶個波。咁有組織有預謀，想搶唔到都難，最後由阿傑搶到個波做埋個lay up攞兩分。呢個4 point play之後，我地只落後37:45。
 
但係呢個時候我真係頂唔住，係元山開左波之後，只係跑番去做防守都有困難。元山雖然個勢唔夠我地好，但始終都係有實力。三兩下手勢就做到個攻勢上黎，一個小跳步入到籃底攞兩分。
 
「咇咇」我忍唔住叫阿傑嗌左個暫停。
 
我癱軟係場邊既後備席，大家都圍住我。李SIR「阿駿，你覺得點﹖冇事丫麻﹖」我將情況一五一十咁講左俾李SIR知，而家我既身體狀況，應該唔適合繼續比賽落去。
 




李SIR「阿駿，你休息一下，等其他兄弟繼續追分先。」
 
可惡，咁辛苦追到只係落後8分，但呢個時候要我坐係場邊，咩都做唔到。點解我要咁唔爭氣。。。
 
元山班人見機不可失，打算發動新一輪，盡早拉開比分，唔好夜長夢多。呢個時候，一把溫柔而熟識既聲音係我耳邊響起，「駿，你冇事丫麻，頭先見你唔妥，擔心死我喇。」係MACY。佢由觀眾席行左過黎後備席，俾左支水我，「哦，應該冇事既，係個頭忽然之間好痛者，休息一下冇事架喇。」我安慰著MACY。「如果唔舒服唔好勉強喇，身體緊要呀。」「唔，知道喇。」我拍一拍MACY隻手，希望令佢安心。
 
「嘩。」元山個邊既啦啦隊發出震耳既歡呼聲，我就知道元山入左波。雖然隊友們好落力咁打，但佢地始終同元山係實力上都係差左D，勉強至可以唔俾人地拋離，要追分，真係談何容易。
 
第三節完，我地落後緊37:47。
 




「李SIR，我OK喇，俾我落場啦。」雖然我休息左一陣係好左少少，但係依照覺得不尋常地頭痛。李SIR「駿，唔好心急，身體要緊。我知你好想落場同班兄弟搏，但我認為你今日身體狀態唔係好適合再落場，你休息多幾分鐘睇下點先啦。。。」「但係。。。我地仲要追分」「你對你D兄弟冇信心咩﹖」「唔係，之但係。。。」「好喇，唔好但係喇，你都圍埋黎講戰術啦。」
 
李SIR話我地係第四節要同元山放手一搏，每一球都要係有充分信心下先好起手，亦即係盡量壓入籃底，係近D距離射，一來命中率高D，二來有機會就博Ivan犯規。
 
第四節頭幾分鐘，博到Ivan第4犯，元山被迫換左佢落場，令到我地有機可乘，但都係勉強同元山打成平手，亦即係我地又少左幾分鐘去追分。
 
「李SIR，我地冇時間喇，快D換我出去啦。」李SIR「駿，身體要緊呀﹗」「我知道自己身體而家係可以繼續比賽呀李SIR，我唔想最後一年打B grade有遺憾，你都唔想架可﹖」李SIR「。。。」我見到李SIR開始諗，加多句「李SIR，你比我同你博埋呢次啦。」
 
李SIR「好啦，不過你一有唔妥就要即刻話我知。」「得啦~。」
 




隊友們見我出返場，個個都精神為之一震，加上對方冇左個Block Shot王Ivan，梗係強攻佢內線啦。但係奇怪既係，我再冇去到「停頓時空」既情況，就算我幾專注，都去唔到，就好似咩都冇發生過咁。
 
但係，對住冇左Ivan既元山內線，我地依然稍勝一籌，踏入第四節最後二分鐘，我地追到53:57，只落後4分。