[男籃]一球穿Jump: 第二回 – 開學鳥

好快就到新學年開學，我同犀牛同高佬連續三年同班之後，今年終於要分開。我同高佬繼續同一班，犀牛就入左去精英班，同D書蟲一齊。我地都有問佢點解咁勁可以入到精英班，佢只係答「個排冇拖拍，咪多左時間溫書囉。」
 
但始終我地唔同班，個感覺都怪怪的。
 
犀牛「你地係咪真係基架，小息同LUNCH我地都一齊打波架啦，只係上堂見少左之麻。」
 
高佬「我知呀，係阿駿之麻，講到好似生離死別咁。唔好理佢喇，我地星期六去你屋企打機﹖」
 
但願如此。
 




高佬「喂，今年我地班際分開打喎，你估犀牛個理羸定我地羸丫拿﹖」
 
「唔知喎，仲有其他班架麻，你估佢地死架。仲有呀，我地理D人我地都未夾過，平時打波就覺得佢地一般，夾落睇下點先啦。」
 
我地學校傳統上會一開學就攪班際籃球，等唔同GRADE打完之後，就會係揾決賽兩隊既人一齊打校隊，同其他學校打比賽。舊年我地班係B GRADE輸左俾班中四，得第二，但都有得打學界。可惜我比賽前個星期六打街場時扭親隻腳，所以學校最尾冇幫我註冊。而我地學校最後打到分區既四強就止步。
 
個晚我地係MSN度吹水。「上年如果我唔係扭親，一定贏陳李桂芳啦」
 
犀牛「人地連羸左5屆分區喇，你估話羸就羸﹖FF少陣啦7頭」
 




高佬「咪囉，你估你LBJ一個打五個咩。係喎犀牛，你個班有冇五個人打﹖」
 
犀牛「屌我都唔知呀，班友仔淨係職補習，上年佢地都好似得五個人玩，最後咪包尾囉」
 
「咁今年靠你喇，我唔想學界見你唔到」
 
犀牛「555」
 
我知道，犀牛好想同我同高佬三個一齊打學界。舊年差我，係我自己唔爭氣。可惜今年犀牛入左班怪獸班，唔好話贏波，運打波班友都未必識，所以客觀黎講犀牛入選校隊既機會真係好細。另一方面，如果咁好彩佢個班入到決賽，係學界要我地拍佢地真係死得，一定分組賽都過唔到。
 




我將我既諗法話左俾高佬知，睇下我地有冇計諗到。傾傾下唔係講左女仔就係講左打機。最後只係知道要見步行步，等犀牛入到決賽先算，學界既野，至多咪淨係打我地三個囉。