[男籃]一球穿Jump: 第一回 – 夢
細個作文既時候，一定有過呢個題目，「我的志願」。十級老套但一定有，你問一百個大人佢既志願係乜佢地都答唔到，點解先生們會覺得一個中學生會答到﹖
有D同學會作話「我想做醫生」，有D就話「我要做百萬富翁」。我心諗呢D咁既答案又「行」、又唔型，真係膠刀肺豉脾。我記得中一個陣做呢條題目時我俾左一個可能老師從來都冇見過既答案，「我要做籃球員」。
當然，AS EXPECTED，零分重做。老師話香港冇職業籃球賽，所以冇呢種職業，又所以唔可以叫夢想喎。是但啦，我都明如果佢俾高分我，又俾我老媽子知道，佢會好麻煩，結果我交左篇50分既「我要做體育老師」算數。
但係，做一個籃球員的而且確係我既夢想。
「啪」。好痛，成個波一野飛埋黎中左塊面，眼鏡都即刻飛左落地下。「睇波啦阿駿，打波係度遊魂。」有冇攪錯，我係受害者啦，仲要俾人鬧。
呀，唔記得介紹自己添。我叫沈子駿，高高的四眼仔一個，岩岩讀完中三放緊暑假，每日做既野就係返學校--- 打波。我地班男仔FD個個都鐘意打籃球，所以就算放暑假，都會有好多人返學校打波，日日就好似打緊NIKE LEAGUE咁，不停跟隊、跟隊再跟隊。
當然，你呢一刻問我，係咪仲有個叫夢想既野叫籃球員既係我心入面，我一定會答「咪玩啦，校隊都未打過你仲問我係咪第時想打職業。遠左D喎兄弟。」但係，如果有機會，我一定會試，出盡力咁試。
岩岩同我一隊個2個叫犀牛同高佬，係由中一已經一齊玩既兄弟。每次跟隊我地都會一隊，如果其中一個唔係度既時候我地會寧願唔打，所以有好多人都懷疑我地係HEHE。咁又當然，我地唔係。雖然佢地叫犀牛同高佬，但千祈唔好以為佢地好大隻同埋好高。岩岩相反，犀牛係一個好廋既男仔，得個一百磅D，主力係射中遠距離，籃底永遠唔使預佢。高佬呢，做係5呎多少少，主力做KEY波。因為佢重心低，速度快之餘腳步都好靈活。而我，就打底，接到高佬D波就一係爆入去，一係分出去俾犀牛射3分。
我地呢個組合，有籃板、有KEY波同有3分，係自己FORM都可以話幾屈機。所以我好ENJOY同佢地一齊打波，仲傻到以為可以一直打到永遠，去到80歲都可以繼續一齊打波。