我參加了籃毛毛演奏會: 夢境還是現實?

”醫生！”

邊個八婆嘈住我訓教...

”小姐，麻煩你出去一下先。”

”唔得，我要見住佢醒。”

”小姐，真係唔得，你企係到會影響我地做野。”





”都話唔得囉。”

”姑娘，幫哩位小姐做全身麻醉之後拖佢出去。”

”喂，等等！做咩做咩？咳...咳...”

我感覺到有人正係到觸碰我既眼皮，佢接住我既眼窩位，
之後兩隻手指一撐，強烈既光芒射入我既眼簾。

我而家係邊，係唔係已經死左啦？




由於我既眼睛仲未適應到附近既環境，
一切事物都好朦朦朧朧，身處係邊仲未知。

”先生，你叫咩名呀？”

”我高登個名...叫...毒村拓哉...”

”先生，我唔係問你膠名，問緊你真名。”

”我叫詹武十。”





”你知唔知點解自己係到呀？”

我點解係到...
呀！我變完毛毛後比警察爆頭，但係我居然大難不死！
我係唔係變到布布咁啦？有283智商！連高登仔都輸比我？
等等先！我記得我變成毛毛個喎，但係點解我講到野？

我大為緊張地摸一摸塊面，估唔到又白又滑！仲要乜毛都冇哂！
眼晴終於見清楚哂所有野，原來我係一間醫院到，眼前有一位醫生同姑娘。
呀怡到底點？黃毛毛到底點？
我好心急地問醫生，

”你有冇見過一隻白毛毛同黃毛毛？”





”你等一等，你既朋友出面等緊你。”

醫生同姑娘行出病房，而入黎既就係呀怡、呀強同兩位陌生女人。
果兩個陌生女人，一個係極似楊秀惠，一個就係金髮混血美女。
呀怡佢變返做人呀，實在係令我好感動，
其餘兩個女人見到我流眼淚就上前幫我扶乾。

我問佢地，

”你地係邊個？”

似楊秀惠果一個女仔話

”咪玩啦，我咪係揚惠囉，heehee。”





唔撚係掛？揚惠到底發生左啲咩事？點解成個人唔同哂？
又高又瘦又有身材又有樣！到底我昏迷期間發生左啲咩事？

我問另一個金髮既女人，佢講



























”我就係黃毛毛...”







吓！？到底係咩一回事？
當我之前聽到黃毛毛話佢唔係德仔果時已經好大打擊，
而今次黃毛毛唔係德仔而係金髮靚女，簡直係一個衝擊。
而家我思緒實在太混亂，頭開始痛。

醫生見到我露出咁痛苦既表情，就講

”你地出一出去比病人休息吓先。”

”等...我仲有...好...好多野想知。”

黃毛毛握住我既手，同我講
”遲吓講你知。你好好休息吓。”

”再等一等...大家...可唔可以話比我知我昏迷左幾耐？”

醫生突然插口，同大家講

”好啦！探病時間完啦！請大家快啲出去啦。”

大家都冇答我問題，定係唔敢答我呢？
等等...我好似又見到啲唔應該見到既事...
眾人出緊門口之時，呀強居然拖住呀怡隻手...

到底我昏迷期間發生過啲咩事？哩一個係夢境定係現實？
我奮力打自己一巴，想讓自己清醒一下，但係原來已經係清醒。
醫生見到我既舉動，感到相當震驚，立即捉緊我隻手。
佢問我

”你做咩？”

”醫生...你答我，我昏迷左幾耐？”

”接近一年...”

一年？點解哩一年可以咁大變化？
揚惠突變楊秀惠、黃毛毛變金髮靚女、呀怡同呀強一齊，
一時之間我實在係接受唔到。

我再繼續問醫生，

”醫生，哩一個唔係夢黎嫁嗎？”

”唔係夢。”

”你可唔可以話比我知哩一年之間發生咩事？”

醫生將凳拉到我床邊，坐係到同我講清楚一切，

”你仲記得你係點樣入黎？”

”我冇記錯我果日變為毛毛之後又頭部中槍...”

”冇錯，果日你頭部中槍，送到黎醫院都已經奄奄一息，
但係好幸運既係你冇傷及重要位置。”

”頭部都唔算係重要位置？”

醫生聽到我講完哩一句之後，彈出好多既醫學理論，
話咩腦幹，凝血性唔知乜乜，
但係我一句都聽唔明...
我又問醫生，

”咁你地點解有辦法幫我變返做人？”

”當毛毛既事件報光之後，政府就開始關注哩一件事。
之後就派出幾位專家開始對調味粉分析。
大概兩個月既時間，專家佢地成功將藥粉既配方重組，
再之後用一個月時間研究解藥。”

”就係咁簡單？”

”就係咁簡單，其實唔難。”

估唔到咁簡單既事就為難左大嬸同藍毛毛...
佢地窮一生黎令其他人變為毛毛，但係都唔諗方法配解藥，
聽到都令人傷感。

”醫生，我會唔會有後遺症嫁？”

”哩一層我地未知。你都係趕快去休息一下啦。