我參加了籃毛毛演奏會: 十八樓
從遠方既電梯位置，有一個牌寫住十八樓。而哩一層十八樓係有啲咩係度既呢？
走廊上空無一人，只有幾間房間既門口燈照亮附近既環境，同其他樓層唔同既係，哩一度有一種豪華既感覺。
地下鋪上紅地毯，每隔幾步就有一盤花做裝飾，走廊牆壁上掛住幾塊西式鏡子，行去走火通道大概雖要數十步。
我同大叔講
”大叔，我知我班朋友係邊，佢地比人困咗係十六樓，不如我地去救佢地先。”
”咁我個仔點算？”
”如果救完我班朋友，可以叫埋佢地一齊幫手。”
當我行到其中一塊鏡既時候，我比鏡中既影像嚇親。我話
”嘩屌，我做乜變咗孫悟空。”
如果我冇估錯，應該係變藍毛毛既藥發揮到一半既時候，我及時食到解藥先變成咁。
同藍毛毛一樣既特徵就係我好多毛，但係同佢地唔同就係我比佢地更具有人既形態。
我同大叔埋怨咁講
”死啦，咁多毛，點做好...”
”當我係後生仔發緊育果時，初初生毛我都有少少驚，但係當毛愈黎愈多既時候，就係你成長既證明。
當一條毛生長到極長既長度既時候，代表你已經成功活過了無數既日子，而且涯過唔少既風浪，
就有如經過惡劣天氣既樹木先可以屹立不到，唔會受到強風既吹襲而倒下...”
我擰轉頭望向大叔，同佢講
”大叔你望下我塊面...”
大叔居然想轉移話題，佢話
”不如我地行快少少...”
正當行到去第四間房既時候，房門突然打開咗！
真係一件突如其來既考驗，我因為身形較瘦削既關係，可以啱啱好喱係花盤後面，
而大叔居然使用職業特工隊式既壁虎功，爬上牆壁與牆壁之間，努力地撐開身體。
由於房門遮擋既關係，我睇唔到係邊個從房門走出黎，唯有等一陣啦。
房門即將關上，而眼前既人居然就係大嬸同藍毛毛！？
大嬸同藍毛毛講，
”你覺唔覺啱啱捉返黎果個男人都幾唔錯，有陣成熟男人既味道。”
”媽咪～”毛毛點了一吓頭。
我心諗唔通佢地讚緊我？真係有少少唔好意思。我偷笑了一吓。
”但係另一個後生仔就有種智障既感覺，成十幾歲人仲笠住個碗係個頭到。”
當大叔聽到哩一番話後，都要強行忍笑，唔小心甩咗一吓手，差啲失咗手跌落去。
佢地行緊去電梯到，之後乘搭電梯去到十六樓。
大叔佢都落番黎，望住我個髮形同我講，
”我地入一入佢地間房，睇吓有冇收埋啲有關哩一度地方既野。”
”但係唔係鎖咗間房咩？”
”冇鎖我係打唔開。”
佢又從背囊拎出一啲工具，佢今次會點做呢？係唔係會好似電視咁用兩條鐵線打開門？
只見佢兩三下動作，成度門已經被拆出黎了。
如果哩一間房真係大嬸間房，咁我地應該可以獲得好多有關藍毛毛佢地既線索。
大叔佢將啲工具放番入背囊，佢話
”我地入去解開哩度既迷團...”
就咁企係門口，都感受到有啲陰涼既感覺，連毛髮咁茂盛既我都忍唔住打冷震。
可能係熄燈既關係，成間房都好似陰陰森森咁，簡直寒氣逼人。
”洗唔洗開到個冷氣咁大。”大叔指住牆上既冷氣機控制版。原來咁寒係關個冷氣機事...
大叔打開房燈，而我跟隨住大叔既腳步向室內邁進。
突然，大叔停低腳步，而我唔小心撞上佢既背脊。我話
”哎呀，做咩無拉拉剎制。”
大叔佢無理會我，只見佢抬頭望住掛係牆上既相架。口中喃喃自語咁講
”估唔個呀嬸都有一個咁既家庭。”
我望一望張相，相中有一個年輕既女人，並且拖住一個細路，
而係佢旁邊，有一個男士，但佢既樣卻被刻意撕開咗，睇黎大嬸真係好憎佢。
望真啲張相，大嬸當年係有幾番姿色，有幾分似謝安琪，只不過歲月不饒人，先變成而家個樣。
不過而家唔係做哩種事既時候，我拍一拍大叔膊頭，示意我去另一邊，我話
”我去大廳果邊睇吓有咩線索。”
”咁我睇吓房到有咩線索。分開行動會比較快，要等佢地番黎之前走人。”
”你點知佢地幾時會番黎？”
”佢地開門果時就會有聲，我地到時就爬上冷氣槽走人。”
係喎，哩一度係工廠大廈，有冷氣槽都好正常，不過我諗我地都唔知佢幾時開門...
”大叔，你連道門都拆埋出黎，門都唔洗開啦...”
大叔二話不說，求其將道門擺番原位，再跟住搵啲野頂住道門。
之後我地就各自行動，睇吓有咩發現。
大廳並無咩特別，只係一個普普通通既港式大廳，
一張布料梳化，一個木造電視櫃，一部電視，一張飯檯，兩套碗筷，好典型既一個家。
我坐係梳化到閉目養神一陣，因為我真係好倦，都未試過好似今日咁辛苦，如果平時係哩個時候我可能已經訓緊教。
我望一望牆上既鐘，原來已經四點幾。
係梳化上有個電視搖控，我好好奇電視究竟做緊咩呢？
我禁搖控上既POWER制，再迅速咁調細個音量，以防驚動其他人。
”85台，嘩，咩黎嫁，粵語長片，簫聲震武林。”
我諗如果哩一段時間播既係「吹簫震老人」應該可以幾高收視，金枝欲孽2都要行埋一二面。
”11台，嘩屌，點解前幾日下午睇既係把酒當歌，夜晚睇又係把酒當歌，而家睇又係把酒當歌，執柒咗個台算啦。”
算啦，谷鬼氣，轉去睇新聞算啦...
”話時話，我入會場之前接受個訪問，唔知我會唔會上電視呢？”
就係我等緊上鏡既同時，我開始對哩一個電視櫃進行探索。
從一個櫃筒之中，我搵到一本相簿，相片主要都係得大嬸同個細路，而有男士既相都被撕開。
當我翻開最後一頁既時候，發現仲有一張相係未撕。
果一張相只係得年輕大嬸同果位男士，男士從背後擁抱住年輕大嬸，兩個都露出幸福既表情。
此時，大叔叫我，
”細路，有野發現。”
”好，等一陣。”我回答大叔。
開咗咁耐電視，點解仲未有關於籃毛毛演唱會既報道既？唔理啦，熄電視去大叔房到睇睇先。
哩一間書房擺咗好多文件，書桌上放咗一部電腦，而大叔就用緊部電腦，係佢面上我睇到一絲笑容。
”啱啱我係一個文件夾到發現一張人名表，當我打開佢既時候發現我個仔個名！
唔只咁樣，佢地記錄埋佢係邊一樓層間房到。”
”咁仲有咩發現？”
”有，桌面有一個文件夾，你幫我打開睇吓係咩黎。”
”好呀，咁你可唔可以借一借過位黎。”
”咁近都要我讓開？”
”你用緊電腦喎，你至少都比我用滑鼠先click到桌面果個文件夾。”
”桌面係指檯上面，唔係電腦果個desktop”
”係咩！？唔好意思...”
我拎起個文件夾，翻開每一頁，入面只係記載住一啲入貨同出貨既記錄，仲有就係合作既公司。
令我最為介意既係其中有一間公司既名被隱藏，但係往來既記錄就最多，
哩一間公司究竟同藍毛毛佢地有咩關係既呢？
咦？哩度寫住今日早上九點鐘就會有交易，而交易地點就會係二十樓。我叫大叔望一望
”大叔，你望一望哩度。”
大叔望完之後沉思咗一陣，之後行黎行去，好似係度諗緊計畫，我見佢行開咗，就用住部電腦先，試吓同外界聯絡。
到底有咩方法可以請求其他人幫助呢？
上Facebook發表最新動態？上高登叫巴打幫手？
試下上Facebook睇吓點先。
嘩，成67個通知！用咁耐Facebook真係第一次咁多，平時都只不過得10個人讚，其中有啲仲要係我黎。
無理由呀，我都冇發表任何野，唔通有人Tag我？
我click通知果個圖案，「Joe Lam與其他67位朋友對你的分享讚好」，我分享咗啲咩呢？
當我禁去個人檔案果一頁，發現惡夢來臨！今次真係水洗都唔清啦...
點解我會分享芝麻街既H漫，我唔明，真係R到頭到大埋，最仆街既係我既中文老師留言話
「年輕人血氣旺盛沒什麼大不了，但多看這一些低俗、幼稚、變態及色情的東西，早晚會影響心智！
勤有功，戲無益。明天我會來跟你談談。
讚好 · · 分享 · 約於 3 小時前 ·
有 80 個人對此讚好。 」
唉，好灰，平時係學校建立既印象化為烏有，到底係邊個做既！
係啦！我知道啦！佢地趁我暈咗果時拎咗我部電話，之後部電話去到綠毛毛手中。
由於我未熄個網頁，而綠毛毛就讚好哂啲內容之後睇！
早知用個難啲既密碼鎖，唔求其用個「M」字算啦。
睇黎Facebook已經行唔通，佢地應該當咗我係痴線佬。等我上高登到問吓班巴絲先。
不過上高登問應該開係咩台？講故台？創意台？吹水台？
我唔知呀！
大叔此時停下腳步，講咗句
”一於咁做...”